استانا حالىقارالىق اۋەجايىندا 2500 دەن استام جولاۋشى ءوز رەيسىن كۇتىپ وتىر
30-جەلتوقسان كۇنى ساعات 15:00 - 00:00 ارالىعىندا جالپى سانى 29 رەيستى ورىنداۋ جوسپارلانعان. الايدا، ونىڭ 21 ى ەلورداداعى قولايسىز اۋا رايىنا بايلانىستى كەشىكتىرىلسە، 8 رەيس كەيىنگە قالدىرىلدى.
قازىر استانا حالىقارالىق اۋەجايىندا 2500 دەن استام جولاۋشى ءوز رەيسىن كۇتىپ وتىر، دەپ حابارلايدى Kazinform ق ر كولىك مينيسترلىگىنىڭ باسپا ءسوز قىزمەتىنە سىلتەمە جاساپ.
مينيسترلىكتىڭ باسپا ءسوز قىزمەتىنىڭ مالىمەتتەرىنشە، اۋا رايى سالدارىنان اۋە جولدارى كەستەسىنىڭ بۇزىلۋىنا بايلانىستى ق ر كولىك ءمينيسترى مارات قارابايەۆ جەدەل شتاب قۇرىپ، استانا حالىقارالىق اۋەجايىنا بارلىق اۋە كومپانياسىنىڭ وكىلدەرىن جينادى. ارنايى قۇرىلعان توپ پەن اۋە كومپانياسىنىڭ وكىلدەرى جولاۋشىلار اراسىندا ءتۇسىندىرۋ جۇمىستارىن جۇرگىزىپ، ساۋالدارىنا جاۋاپ بەرىپ جاتىر.
اۋەجايداعى جولاۋشىلار ءۇشىن Terminals Astana Airport Management باسشىلىعى 2 مىڭنان استام پورتسيا ىستىق تاماق پەن ىستىق سۋسىن تاراتتى. رەيستەرى كەشىككەن جولاۋشىلاردىڭ اراسىندا بالالار مەن جاسوسپىرىمدەر دە بار. ولارعا مەرەكەلىك كوڭىل- كۇي سىيلاۋ ءۇشىن اياز اتا مەن اقشاقار ويىن ويناتىپ، جاڭا جىلدىق سىيلىقتار تاراتۋدا. ودان بولەك، استانا قالاسىنىڭ ونەرپازدارى رەيسىن كۇتىپ وتىرعان جولاۋشىلارعا ارناپ ونەرلەرىن كورسەتۋدە.
ايتا كەتەرلىگى، جولاۋشىلار اۋا رايى قولايسىزدىعىنان بولعان كەلەڭسىزدىككە تۇسىنىستىك تانىتىپ، قاجەتتى كومەك كورسەتىپ جاتقان ماماندارعا العىستارىن ءبىلدىرىپ جاتىر.
قازىر استانا حالىقارالىق اۋەجايىنىڭ اۋە ايلاعى اشىق. الايدا، اۋەايلاقتاعى اۋا رايى ءالى دە ۇشۋ جانە قونۋ ءۇشىن قولايسىز. سوندىقتان اۋە كومپانيالارى رەيستەرىن كەشىكتىرۋ جانە كەيىنگە قالدىرۋ تۋرالى شەشىم قابىلداۋدا.
«اۋەجاي جولاۋشىلارعا تاۋلىك بويى قىزمەت كورسەتەدى. ەگەر ءسىز 30-31 جەلتوقسان كۇندەرى اۋە كولىگىمەن ساپارعا شىعۋدى جوسپارلاعان بولساڭىز، رەيسىڭىزدىڭ ستاتۋسىن اۋەجايدىڭ nn-airport.kz رەسمي سايتىنان قاراۋعا نەمەسە 87172702999 ءنومىرى بويىنشا Call ورتالىققا حابارلاسۋعا بولادى»، - دەلىنگەن حابارلامادا.