استانا حالقى جەراستى سۋىن دا تۇتىنا باستايدى - ۆيتسە-مينيستر

استانا. KAZINFORM - ونەركاسىپ جانە قۇرىلىس ءمينيسترىنىڭ ورىنباسارى قۋاندىق قاجكەنوۆ ماجىلىستە ءوتىپ جاتقان ۇكىمەت ساعاتىندا استانانىڭ سۋمەن قامتاماسىز ەتۋگە باعىتتالعان جوبالاردىڭ قۇنىن اتادى.

- استانا سۋ قويماسى 1969-جىلى 500 مىڭ تۇرعىنعا ەسەپتەلىپ سالىنعان بولاتىن. بىلتىر ەلوردا تۇرعىندارىنىڭ ءبارى سۋ بەرۋدەگى ىركىلىستەرگە تاپ كەلگەن شىعار. قالادا باسپانا قۇرىلىسى مەن حالىق سانى ءوسىپ جاتقانىن ەسكەرسەك، بۇل ماسەلە ۋشىعا تۇسپەسە، باسەڭدەمەيدى. استانامىزدى سۋمەن قامتاماسىز ەتەتىن رەزەرۆ كوز جوق ازىرگە. وسى ماسەلەنى قالاي شەشپەكشىسىزدەر، - دەپ سۇراعان ءماجىلىس دەپۋتات پاۆەل كازانسيەۆ.

ونەركاسىپ جانە قۇرىلىس ءمينيسترىنىڭ ورىنباسارى قۋاندىق قاجكەنوۆ ءدال قازىر استانا حالقى سۋدان تاپشىلىق كورەتىندەي قاۋىپ جوق ەكەنىن ايتتى.

- ەكى جىل بۇرىن جازدا استانانىڭ جەكەلەگەن اۋداندارىندا سۋ تاپشىلىعى بولعان. ءتيىستى شارالار قابىلدانىپ، 2023 -جىلدىڭ اياعىندا № 3 سۋ سورىپ، سۇزەتىن ستانسا قولدانىسقا بەرىلدى. قازىرگى تاڭدا تاۋلىگىنە 350 مىڭ تەكشە مەتر سۋ تۇتىنىپ وتىر. بىزدەگى سۋ سۇزەتىن ستانسالاردىڭ قۋاتى - 410 مىڭ تەكشە مەتر، ياعني دامۋ كەلەشەگىن ەسكەرگەننىڭ وزىندە استانادا سۋ تاپشىلىعى جوق، - دەدى ول.

قۋاندىق قاجكەنوۆ استانانىڭ رەزەرۆتى سۋ كوزىن قالىپتاستىرۋ ءۇشىن بىرنەشە جوبا قولعا الىنعانىن ەسكە سالدى.

- ونىڭ ءبىرىنشىسى — № 4 سۋ سورۋ- ءسۇزۋ ستانساسىن سالۋ. قانىش ساتپايەۆ كانالىنان سۋ بۇرۋ كانالىن دا سالۋ كەرەك. قازىرگى تاڭدا بۇل جوبانىڭ سمەتالىق قۇجاتتارى ازىرلەنىپ جاتىر. بۇل جوبا قوسىمشا 200 مىڭ تەكشە مەتر سۋمەن قامتاماسىز ەتۋگە مۇمكىندىك بەرەدى. ەكىنشى جوبا - نۇرا سۋ كەنىشىنەن سۋ بۇرۋ ارناسىن سالۋ جوباسى. وسى ارقىلى تاۋلىگىنە 308 مىڭ تەكشە مەتردەي جەراستى سۋىن الۋعا بولادى. بۇل جوبانىڭ سمەتالىق قۇجاتتارى دايىن. مامىر ايىندا ۆەدومستۆوارالىق ساراپتاماعا جىبەرۋ جوسپارلانعان. بۇل جوبانىڭ مەجەلەنگەن قۇنى 56 ميلليارد تەڭگەدەي. ءۇشىنشى جوبا - تەلمان سۋ سورۋ ستانساسىنان تەحنيكالىق سۋ بۇرۋ جوباسى. قۇنى - 17,6 ميلليارد تەڭگە. بيىل وسى جوباعا جەرگىلىكتى بيۋدجەتتەن 3,2 ميلليارد تەڭگە ءبولىنىپ وتىر. وسىنىڭ ءبارى استانانىڭ جوعارى دامۋ قارقىنىن ەسكەرگەننىڭ وزىندە كەلەشەكتەگى سۋ ماسەلەسىن شەشۋگە مۇمكىندىك بەرەدى. تاپشىلىق بولمايدى، - دەدى ۆيتسە-مينيستر.

ايتا كەتۋ كەرەك، كاسپي ماسەلەسىن شەشۋ اياسىندا قازاقستان رەسەيگە ەدىل سۋىن بىرلەسىپ رەتتەۋ تۋرالى ۇسىنىس جاساماقشى.