استانا بارلىق قازاقستاندىققا ورتاق - جەڭىس قاسىمبەك كوشى-قوندى شەكتەۋ تۋرالى

استانا قالاسىنىڭ اكىمى جەڭىس قاسىمبەك وزگە وڭىرلەردەن ەلورداعا كوشۋگە شەكتەۋ قويۋ باستاماسى تۋرالى پىكىرىن ءبىلدىردى، دەپ حابارلايدى Kazinform.

«قازاقستان - ۋنيتار مەملەكەت. ءبىز مۇنداي سۇراقتاردى قويا المايمىز. ەلوردا بارلىق قازاقستاندىققا ورتاق جانە مۇندا ءبارىنىڭ كەلۋىنە قۇقىعى بار. جالعىز جاۋاپ وسى بولۋى مۇمكىن. ەكىنشى ءبىر ماسەلە - ەلوردا ينفراقۇرىلىمىنىڭ وسىنداي كوشى-قونعا دايىندىعى. شىنىندا دا، كوشى-قون قارقىنىنان ارتتا قالۋشىلىق بار، اسىرەسە كوممۋنالدىق-ينجەنەرلىك جانە الەۋمەتتىك ينفراقۇرىلىمدا بايقالادى. سوندىقتان قازىر ءتيىستى شارالار قابىلدانۋدا. جوعارىدا ايتىلعانداي، كوپتەگەن مەكتەپتەر، مەديتسينالىق نىساندار، بالالارعا ارنالعان مەكتەپكە دەيىنگى ءبىلىم بەرۋ نىساندارىنىڭ قۇرىلىسى قارقىندى جۇرۋدە»، - دەپ ءتۇسىندىردى اكىم ورتالىق كوممۋنيكاتسيالار قىزمەتىندە.

استانا اكىمى باسقا وڭىرلەردە جالاقىسى جوعارى جۇمىس ورىندارى كوپ اشىلسا، كوشى-قون دا وزگەرەتىنىن جەتكىزدى.

«جىل سايىن قالانىڭ جاڭا تۇرعىندارى 60-70 مىڭ ادامعا كوبەيسە، ونىڭ 35 مىڭى - تابيعي ءوسىم. ەگەر 6-7 جىل بۇرىن قالادا 25 مىڭ بالا دۇنيەگە كەلسە، بيىل 33 مىڭنان استام بالا تۋعان. ءتىپتى 35 مىڭعا دەيىن وسەدى دەپ بولجاپ وتىرمىز. استانا - ەلىمىزدەگى ەڭ جاس قالالاردىڭ ءبىرى. حالىقتىڭ ورتاشا جاسى شامامەن 30 دا»، - دەپ تولىقتىردى قالا باسشىسى.