«استانا ارەنا»، «بارىس ارەنا» مەن «الاۋ» سەنىمگەرلىك باسقارۋدان شىعارىلا ما

استانا. KAZINFORM - «استانا ارەنا» ستاديونى، «بارىس ارەنا» سپورت كەشەنى مەن «الاۋ» مۇز سارايى قانشالىقتى ءتيىمدى باسقارىلىپ وتىر؟ ولار سەنىمگەرلىك باسقارۋدان شىعارىلۋى مۇمكىن بە؟ بۇل سۇراققا استانا قالاسىنىڭ دەنە شىنىقتىرۋ جانە سپورت باسقارماسى جاۋاپ بەردى.

بيىل قاڭتار ايىندا باسەكەلەستىكتى قورعاۋ جانە دامىتۋ اگەنتتىگىنىڭ استانا قالاسى بويىنشا دەپارتامەنتى «استانا قالاسىنىڭ اكتيۆتەر جانە مەملەكەتتىك ساتىپ الۋ باسقارماسى» م م ءىس- ارەكەتتەرىندە «استانا ارەنا» ستاديونىن، «بارىس ارەنا» سپورت كەشەنىن جانە «الاۋ» مۇز سارايىن ساتىپ الۋ قۇقىعىنسىز سەنىمگەرلىك باسقارۋعا بەرۋ كەزىندە كەتكەن مونوپولياعا قارسى زاڭنامانى بۇزۋ بەلگىلەرىن انىقتاعان ەدى.

- باسقارما 2020 -جىلى اتالعان وبەكتىلەردى ساتىپ الۋ قۇقىعىنسىز سەنىمگەرلىك باسقارۋعا بەرۋ بويىنشا تەندەر وتكىزگەن. تەندەر ناتيجەلەرى بويىنشا «Mtex management» ج ش س جەڭىمپاز دەپ تانىلىپ، ونىمەن 15 جىلعا شارت جاسالعان. زاڭناماعا سايكەس، تەندەردى وتكىزۋ باسەكەلەستىكتى دامىتۋ قاعيداتتارىن ساقتاي وتىرىپ، بارلىق الەۋەتتى باسقارۋشىلار ءۇشىن قاتىسۋدىڭ تەڭ جاعدايلارىن قامتاماسىز ەتۋگە ءتيىس. الايدا، بۇل سپورت كەشەندەرىن بەرۋگە تەندەر جاريالانعان كەزدە قۇجاتتامادا قاتىسۋشىلار شەڭبەرىن شەكتەيتىن تالاپتار جازىلعان، - دەپ اتالىپ وتكەن اگەنتتىك اقپاراتىندا.

وسى ورايدا، ەلوردانىڭ دەنە شىنىقتىرۋ جانە سپورت باسقارماسى «Mtex management» كومپانياسىنىڭ 2020 -جىلدان بەرگى قىزمەتىنە تالداۋ جاسالعانىن اتاپ وتەدى.

- 2024 -جىلى قازاقستان رەسپۋبليكاسى ۇكىمەتىنىڭ 2012 -جىلعى 4 -جەلتوقسانداعى №1546 قاۋلىسىمەن بەكىتىلگەن «مەملەكەتتىك مۇلىكتى باسقارۋ تيىمدىلىگىن مونيتورينگىلەۋ قاعيدالارىن بەكىتۋ تۋرالى» قاۋلىسىنا سايكەس، استانا قالاسى اكىمدىگىنىڭ تاپسىرىسى بويىنشا مونيتورينگ وبەكتىلەرىن باسقارۋدىڭ تيىمدىلىگىنە كەشەندى تالداۋ جۇرگىزىلدى. تالداۋ وندىرىستىك-تەحنيكالىق، تەحنولوگيالىق، قارجىلىق- ەكونوميكالىق، قۇقىقتىق، ەكولوگيالىق جانە وزگە دە پارامەترلەردى قامتىدى. زەرتتەۋ ناتيجەسىندە مۇلىكتىڭ دامۋ بولجامدىلىعى تۇرعىسىنان ونىڭ جاي- كۇيىنە كەشەندى باعا بەرىلدى. ساراپشىلاردىڭ قورىتىندىسىنا قاراعاندا، «Mtex management» ج ش س تاراپىنان مەملەكەتتىك مۇلىكتى باسقارۋ ءتيىمدى دەپ تانىلدى، - دەلىنگەن ەلوردالىق باسقارمانىڭ Kazinform اگەنتتىگىنە بەرگەن جاۋابىندا.

سپورتتىق نىسانداردى باسقارۋ ساپاسىن ارتتىرۋ جانە وڭتايلاندىرۋ ناتيجەسىندە مەملەكەتتىك بيۋدجەتتىڭ شىعىندارى قىسقارعانى انىقتالعان.

- بۇل نىسانداردى سەنىمگەرلىك باسقارۋعا بەرۋدىڭ نەگىزگى ماقساتتارىنىڭ ءبىرى وسى ەدى. ال باسەكەلەستىكتى قورعاۋ جانە دامىتۋ اگەنتتىگى تاراپىنان ايتىلعان ماسەلەلەرگە توقتالساق، ناقتى زاڭ بۇزۋ فاكتىلەرى انىقتالعان جوق، ياعني زاڭناماعا سايكەس قۇقىقتىق باعا بەرۋدى تالاپ ەتەتىن بەلگىلەر عانا تىركەلدى. وسىعان بايلانىستى بۇل ماسەلە ءتيىستى قاراۋ ساتىسىندا تۇر، - دەپ ناقتىلادى باسقارمادان.

باسقارما جاۋابىنداي كورسەتىلگەندەي، ناقتى قورىتىندىلار ءتيىستى تالقىلاۋ ناتيجەلەرى بويىنشا بەلگىلى بولماق.