استانا، الماتى جانە شىمكەنتتىڭ جەكە ديزاين-كودى ەنگىزىلمەك

استانا. KAZINFORM - بۇگىن پارلامەنت ماجىلىسىندە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە استانانى جانە رەسپۋبليكالىق ماڭىزى بار قالالاردى دامىتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنىڭ تانىستىرىلدى.

زاڭ جوباسى استانا قالاسىن دامىتۋ ماسەلەلەرى جونىندەگى كەڭەستە بەرىلگەن مەملەكەت باسشىسىنىڭ حاتتامالىق تاپسىرماسىن، سونداي-اق پرەزيدەنت اكىمشىلىگى باسشىسىنىڭ استانانى دامىتۋ تاسىلدەرىن رەسپۋبليكالىق ماڭىزى بار بارلىق قالالارعا تاراتۋ جونىندەگى قارارىن ورىنداۋ ءۇشىن ازىرلەندى. زاڭ جوباسى ارقىلى 1 كودەكسكە جانە 6 زاڭعا تۇزەتۋ ەنگىزىلەدى. زاڭ جوباسى جەر قاتىناستارى، ساۋلەت جانە قۇرىلىس، كوشى-قون، جارناما، ەكولوگيا جانە باسقا دا سالالارداعى ماسەلەلەردى شەشۋگە باعىتتالعان.

«سىرتقى جارنامانى جولدار مەن كوشەلەردى بوياۋ ارقىلى ورنالاستىرۋ قالالاردىڭ ەستەتيكالىق كەلبەتىنە تەرىس اسەر ەتەدى. سونداي-اق، قالانىڭ سىرتقى كەلبەتىنىڭ ناشارلاۋىنا قوعامدىق ورىنداردا اۋديو جارنامانىڭ كەڭ تارالۋى سەبەپ بولىپ وتىر. قازىرگى كەزدە اتالعان ارەكەتتەر ەرەجە بۇزۋ ارەكەتىنە جاتپايدى جانە زاڭنامادا وعان قارسى ەشقانداي اكىمشىلىك شارالار كوزدەلمەگەن»، - دەدى ۇلتتىق ەكونوميكا ۆيتسە-ءمينيسترى باۋىرجان وماربەكوۆ.

وسىلايشا، قالالاردىڭ سىرتقى كەلبەتى بويىنشا ماسەلەلەرىن شەشۋ ماقساتىندا كەلەسى زاڭنامالىق وزگەرىستەر ۇسىنىلدى:

- «جەرگىلىكتى مەملەكەتتىك باسقارۋ جانە ءوزىن-ءوزى باسقارۋ تۋرالى» زاڭىنا رەسپۋبليكالىق ماڭىزى بار قالا مەن استانا ءماسليحاتىنىڭ قۇزىرەتىن ديزاين-كودتى بەكىتۋ جونىندەگى نورمامەن، ال اكىمدىكتەردىڭ قۇزىرەتىن ستاتسيونارلىق ەمەس وبەكتىلەردى ورناتۋ مەن جۇمىس ىستەۋى بويىنشا قاعيدالاردى بەكىتۋ جونىندەگى نورمامەن كەڭەيتۋ؛

- «استانا مارتەبەسى تۋرالى» زاڭىنا ەلوردادا ءبىرىڭعاي ديزاين-كودتى ەنگىزۋ جانە ونىڭ جالپى ەرەجەلەرىن ايقىنداۋ؛

- «جارناما تۋرالى» زاڭى اياسىندا: عيماراتتاردىڭ/تۇرعىن ءۇيدىڭ مەنشىك يەسىنە تالاپتاردى بۇزا وتىرىپ ورناتىلعان جارناما وبەكتىسىنە دەمونتاج جونىندەگى تالاپتاردى قولدانۋ؛

- اشىق كەڭىستىكتە اۋديو جارنامانى تاراتۋعا تىيىم سالۋ؛

- تروتۋارلاردا، ۆەلوجولداردا، اۆتوجولداردا جانە كوشەلەردە سىرتقى جارنامانى ورنالاستىرۋعا تىيىم سالۋ.

اتالعان نورمالاردى اكىمشىلىك قۇقىق بۇزۋشىلىق تۋرالى كودەكسىنە ەنگىزۋ ماسەلەسى پىسىقتالىپ جاتىر.