استانا الداعى 10 جىلدا قالاي وزگەرەدى

استانا. KAZINFORM - استانادا قالا اكىمى جەڭىس قاسىمبەكتىڭ، يندۋستريا جانە قۇرىلىس ءمينيسترى ەرسايىن ناعاسپايەۆتىڭ، وڭىرلىك اكىمدىكتەر مەن ۋربانيستيكا سالاسىنداعى حالىقارالىق ساراپشىلاردىڭ قاتىسۋىمەن سەمينار-كەزدەسۋ ءوتتى.

جيىندا ەلوردانىڭ الەۋمەتتىك- ەكونوميكالىق دامۋ ناتيجەلەرى سارالانىپ، 2035-جىلعا دەيىنگى نەگىزگى دامۋ باعىتتارى بەلگىلەندى، دەپ حابارلايدى ەلوردا اكىمدىگىنىڭ رەسمي سايتى.

ءىس-شارا مەملەكەت باسشىسىنىڭ تاپسىرماسى مەن «تازا قازاقستان» اتتى ءىرى ەكولوگيالىق باستاما اياسىندا ۇيىمداستىرىلدى.

قالا اكىمى جەڭىس قاسىمبەكتىڭ ايتۋىنشا، استانا تۇرعىندارىنىڭ سانى 1,5 ميلليون ادامعا جەتىپ، جىل سايىن شامامەن 7 پايىزعا ءوسىپ كەلەدى. وسىعان وراي قالانىڭ جاڭا باس جوسپارى قابىلداندى. وندا حالىق سانى 2,3-2,5 ميلليون ادامعا دەيىن ارتادى دەپ بولجانعان. سونداي-اق، ەسكى تۇرعىن ۇيلەردى جاڭارتۋ باعدارلاماسى تالقىلاندى. 2030-جىلعا دەيىن 206 اپاتتى ءۇيدىڭ تۇرعىندارى جاڭا باسپاناعا كوشىرىلەدى. قالانىڭ قۇرىلىس ساياساتى الەۋمەتتىك ينفراقۇرىلىمدى دامىتۋعا، اباتتاندىرۋعا جانە جاسىل ايماقتار قۇرۋعا باسىمدىق بەرەدى.

قالا اكىمىنىڭ ايتۋىنشا، بارلىق جۇمىس «ادامدارعا ارنالعان قالا» قاعيداتىنا نەگىزدەلىپ وتىر. ياعني، باستى نازار تۇرعىنداردىڭ ءومىر ءسۇرۋ ساپاسىنا، قولجەتىمدى ءارى ىڭعايلى ورتا قالىپتاستىرۋعا اۋدارىلعان. ينجەنەرلىك ينفراقۇرىلىم الدان الا جوسپارلانىپ، دامۋ قارقىنى تۇرعىندار قاجەتتىلىكتەرىنەن وزىق ءجۇرۋى ءتيىس.

استانادا كولىك جۇيەسىن دامىتۋ دا باستى باعىتتاردىڭ ءبىرى سانالادى. قوعامدىق كولىكتىڭ ۇلەسىن قازىرگى 41 پايىزدان 71 پايىزعا دەيىن ارتتىرۋ كوزدەلىپ وتىر. بۇل رەتتە اۆتوبۋس پاركى جاڭارتىلىپ، جاڭا جولايرىقتار سالىنادى. سونىمەن قاتار، LRT جوباسىن ىسكە اسىرۋ جالعاسۋدا. العاشقى جەلىنىڭ سىناق رەجيمىندە ىسكە قوسىلۋى بيىلعى قىركۇيەككە جوسپارلانعان.

ەكولوگيا جانە كوگالداندىرۋ ماسەلەسى دە ەرەكشە نازاردا. سوڭعى ءۇش جىل ىشىندە استانادا 2,5 ميلليوننان استام اعاش وتىرعىزىلدى. قالادا كوگالداندىرۋ ەرەجەلەرى قابىلدانىپ، اعاشتاردى تسيفرلاندىرۋ جۇيەسى ەنگىزىلدى. قوعامدىق كەڭىستىكتەر مەن كوشەلەردى اباتتاندىرۋ، جاعالاۋلاردى كوركەيتۋ جۇمىسى جۇرگىزىلۋدە. كىشى تالدىكول اۋماعىندا ەكوپارك سالىنىپ جاتىر، سونداي-اق Green Line جاياۋ جۇرگىنشىلەر جولى مەن Damu پاركى قولعا الىنعان.

ەلوردادا كرەاتيۆتى يندۋستريا مەن وقيعالى تۋريزم دە دامىپ كەلەدى. قالادا حالىقارالىق مادەني جانە سپورتتىق ءىس-شارالار ءجيى وتەدى. بيىل استانادا الەمدىك جۇلدىزداردىڭ كونسەرتتەرى دە جوسپارلانعان.

سەمينار سوڭىندا قالا اكىمى استانانىڭ الداعى دامۋى قالالىق قىزمەتتەردىڭ تولىقتاي ۇيلەسىمدى جۇمىسى مەن حالىقارالىق ۇزدىك تاجىريبەلەردى ەنگىزۋگە بايلانىستى ەكەنىن اتاپ ءوتتى.

ايتا كەتەيىك، استانا - بۋراباي باعىتىندا «Burabay Express» جاڭا ەلەكترپويىزى ىسكە قوسىلدى.