ۆەدومستۆو مالىمەتىنشە، ۇلىتاۋ وبلىسىندا وتكەن جىلدان بەرى كاسىپورىن اۋماعىنان ۇرلىق جاساعان بىرنەشە قىلمىستىق توپتىڭ ارەكەتى توقتاتىلعان.
قابىلدانعان شارالاردىڭ ناتيجەسىندە كەلتىرىلگەن شىعىننىڭ 94,5 پايىزى وتەلگەن.
تەرگەۋ بارىسىندا جەرگىلىكتى قىلمىستىق توپتاردىڭ جەتەكشىلىگىمەن ارەكەت ەتكەن ادامداردىڭ قۇرامىندا باعالى مەتالدار كوپ كەن قورىتپالارىن ۇرلاۋ سحەماسىن ۇيىمداستىرعانى انىقتالعان.
بيىلدىڭ وزىندە پوليتسەيلەر ءىرى كولەمدە شىعىن كەلتىرىلگەن ءتورت ۇرلىق دەرەگىن اشقان.
سونىمەن قاتار 7 -مامىر كۇنى كومپانيا اۋماعىنان جانارماي ۇرلاۋعا قاتىستى زاڭسىز ارەكەتتەردىڭ جولى كەسىلگەن.
جەدەل ءىس- شارالار بارىسىندا ۇرلىقتى ۇيىمداستىردى جانە جانار- جاعارماي ماتەريالدارىن ساتۋمەن اينالىستى دەگەن كۇدىككە ىلىنگەن ادامدار ۇستالدى.
پوليتسيا مالىمەتىنشە، ءبىر توننادان استام جانارماي، ءىرى كولەمدەگى اقشا، كولىك قۇرالدارى، وق-ءدارىسى بار قارۋ جانە وزگە دە زاتتاي دالەلدەمەلەر تاركىلەنگەن.
تەرگەۋ بارىسىندا ۇرلىقتىڭ ارنايى تەحنيكاعا جالعان جانارماي قۇيۋ جانە قۇجاتتاردى قولدان جاساۋ ارقىلى جۇزەگە اسىرىلعانى بەلگىلى بولدى.
سونداي-اق كۇزەت قۇرىلىمدارىنىڭ كەيبىر قىزمەتكەرلەرىنىڭ كومەكتەسكەنى انىقتالعان.
- قازىرگى ۋاقىتتا تەرگەۋ-جەدەل ءىس-شارالارىنىڭ كەشەنى جۇرگىزىلىپ جاتىر. قارجىلىق-شارۋاشىلىق قۇجاتتارعا تالداۋ جاسالۋدا، كەلتىرىلگەن شىعىن كولەمى انىقتالىپ جاتىر. الدىن الا مالىمەت بويىنشا شىعىن اسا ءىرى كولەمدە بولۋى مۇمكىن، - دەدى ءىىم ۇيىمداسقان قىلمىسقا قارسى كۇرەس دەپارتامەنتىنىڭ وكىلى قۋاندىق الپىس.