«جاسىل ايماق» ج ش س ر م ك باسشىلىعى مەن ماماندارى «كازاۆيا ورمان قورعاۋ» ر م ق ك وكىلدەرىمەن بىرلەسىپ، ەلوردانىڭ جاسىل بەلدەۋىنە اۋەدەن مونيتورينگ جۇرگىزدى.
اۋە باقىلاۋىنا كاسىپورىننىڭ باس ديرەكتورى، جەدەل باسقارۋ ورتالىعى مەن ورماندى كۇزەتۋ جانە قورعاۋ ءبولىمىنىڭ باسشىلارى، سونداي-اق اۆياتسيالىق بولىمشەنىڭ ماماندارى قاتىستى.
مونيتورينگ بارىسىندا ماماندار ورمان ەكپەلەرىنىڭ جاي-كۇيىن باعالاپ، جەتۋى قيىن اۋماقتاردى شولىپ، ورمانعا قاۋىپ ءتوندىرۋى مۇمكىن جاعدايلاردىڭ بار-جوعىن باقىلاپ شىقتى.
- اۋە باقىلاۋى كەزىندەگى نازار اۋدارتقان جايتتاردىڭ ءبىرى - جاسىل بەلدەۋدە ەلىكتەردىڭ كوپتەپ كەزدەسۋى بولدى. ءارتۇرلى اۋماقتاردا 4-5 تەن توپتاسىپ جۇرگەن، جالپى سانى شامامەن 50 ەلىك بايقالدى. بۇل - استانانىڭ جاسىل بەلدەۋى تەك ادام قولىمەن قالىپتاسقان ورمان القابى عانا ەمەس، جانۋارلار دۇنيەسىنە دە قولايلى تىرشىلىك ورتاسىنا اينالىپ كەلە جاتقانىن كورسەتەدى، - دەيدى ماماندار.
بۇگىندە ەلوردانىڭ جاسىل بەلدەۋى وسىمدىكتەر مەن جانۋارلار قاتار دامىپ كەلە جاتقان ءتىرى ەكوجۇيە رەتىندە قالىپتاسىپ كەلەدى.
وسىعان دەيىن حابارلانعانداي، ەلوردانىڭ اينالاسىنداعى جاسىل بەلدەۋ الداعى ۋاقىتتا ۇلكەيە تۇسەدى، ول ءۇشىن بوس جەرلەرگە جاڭا كوشەتتەر ەگىلەدى. قازىر العاشقى جۇمىستار باستالدى. توپىراقتىڭ سورتاڭدىعىن انىقتاۋ ءۇشىن اۋەلى عىلىمي سىناقتار جۇرگىزىلەدى، سودان سوڭ كوشەت ەگۋ باستالادى. مۇنىڭ بارىنە شامامەن بەس جىلداي ۋاقىت قاجەت.