قالا تۇرعىندارى مەن قوناقتارىنا ارناپ كونتسەرتتەر، ءتۇرلى قويىلىمدار جانە قوعامدىق اكسيالار ۇيىمداستىرىلادى
نەگىزگى ءىس- شارالاردىڭ ءبىرى - 7 -مامىر كۇنى ساعات 11:00- دە قازاق ەلى مونۋمەنتى الاڭىندا وتەتىن پلاتس-كونسەرت. باعدارلامادا اسكەري وركەسترلەردىڭ ونەر كورسەتۋى، مەملەكەتتىك ورگانداردىڭ ساپتىق ەسەپتەرى، ساپتىق دايىندىق ەلەمەنتتەرى جانە سالتاناتتى بولىمشەلەردىڭ كورسەتىلىمدىك نومىرلەرى بار. ءىس- شاراعا قازاقستان رەسپۋبليكاسى مەملەكەتتىك كۇزەت قىزمەتىنىڭ، قورعانىس مينيسترلىگىنىڭ، ىشكى ىستەر مينيسترلىگىنىڭ ۇلتتىق ۇلانىنىڭ، ۇلتتىق قاۋىپسىزدىك كوميتەتىنىڭ شەكارا قىزمەتىنىڭ جانە توتەنشە جاعدايلار مينيسترلىگىنىڭ وكىلدەرى قاتىسادى.
مەرەكەلىك ءىس-شارالار نۇرجول جەلەكجولى اۋماعىندا جالعاسادى. مۇندا ساعات 15:00- دە قازاقستان قارۋلى كۇشتەرى ۇلتتىق اسكەري-پاتريوتتىق وركەسترىنىڭ سالتاناتتى شەرۋى وتەدى.
مادەني باعدارلاما قالانىڭ وزگە الاڭدارىندا دا ۇيىمداستىرىلادى. «استانا ارەنا» ستاديونى اۋماعىندا Open air فورماتىنداعى ءىس-شارا وتەدى: ساعات 10:00- دەن باستاپ جارمەڭكەلەر، ساۋدا ورىندارى مەن بالالار ايماقتارى جۇمىس ىستەيدى، ال 19:00- دە قازاقستاندىق ەسترادا جۇلدىزدارىنىڭ قاتىسۋىمەن كەشكى كونسەرت ۇيىمداستىرىلادى.
وسى كۇنى ساعات 18:00- دە ازەربايجان مامبەتوۆ اتىنداعى مەملەكەتتىك دراما جانە كومەديا تەاترى ساحناسىندا كورەرمەندەرگە «تىنىشتىق كۇزەتشىسى» سپەكتاكلى ۇسىنىلادى.
7 -مامىر كۇنى ساعات 17:00- دە ەسىل اۋدانىنداعى جەتىسۋ ساياباعى جانە 8 -مامىر كۇنى م. وتەمىس ۇلى اتىنداعى وقۋشىلار سارايى ماڭىنداعى ارباتتا مەرەكەلىك كونسەرتتەر وتەدى. باعدارلاما اياسىندا اسكەري كورسەتىلىمدىك دەفيلە مەن كونسەرتتىك قويىلىمدار ۇيىمداستىرىلادى.
سونىمەن قاتار، 7-مامىر كۇنى ساعات 19:00- دە وقۋشىلار سارايى ماڭىنداعى ارباتتا ق ر ۇلتتىق ۇلانى اسكەري قىزمەتشىلەرى مەن وركەسترىنىڭ قاتىسۋىمەن مەرەكەلىك باعدارلاما وتەدى.
بۇدان بولەك، ەلوردادا پوليتسيا جانە توتەنشە جاعدايلار قىزمەتى بولىمشەلەرىندە اشىق ەسىك كۇندەرى ۇيىمداستىرىلادى. جاستار ءۇشىن ەكسكۋرسيالار، ارداگەرلەرمەن كەزدەسۋلەر جانە اسكەري-پاتريوتتىق ءىس-شارالار وتكىزىلەدى.
قالا مەكتەپتەرى مەن كوللەدجدەرىندە وقۋشىلاردى «جاس سارباز» قوزعالىسىنىڭ قاتارىنا قابىلداۋ بويىنشا سالتاناتتى راسىمدەر وتەدى. بۇل باستامالار جاستاردىڭ پاتريوتتىق تاربيەسىن قالىپتاستىرۋعا جانە ازاماتتىق جاۋاپكەرشىلىگىن ارتتىرۋعا باعىتتالعان.
استانادا وتان قورعاۋشىلار كۇنى اسكەري قىزمەتشىلەر مەن جاۋىنگەرلىك داستۇرلەرگە قۇرمەت كورسەتىپ قانا قويماي، پاتريوتيزم، زاڭدىلىق، جاۋاپكەرشىلىك جانە ەل بىرلىگى قۇندىلىقتارىن ناسيحاتتايتىن ماڭىزدى قوعامدىق ءىس-شاراعا اينالادى.
بۇعان دەيىن استانادا 300-گە جۋىق ادام قاتىسقان پاتريوتتىق فلەشموب وتكەنىن جازدىق.