قالا تۇرعىندارىنىڭ ءبىرى وتباسى سۋ ءۇشىن 80 مىڭ تەڭگەدەن استام ارتىق تولەگەنىن ايتتى. «استانا سۋ ارناسى» كاسىپورنى ەسەپتەگىش كورسەتكىشتەرىن ۋاقىتىلى بەرۋدىڭ ماڭىزىن ءتۇسىندىرىپ، تولەمنىڭ دۇرىستىعىن قالاي تەكسەرۋگە بولاتىنىن ايتتى.
- ءوزىمىز دە بايقاماي، 80 مىڭ تەڭگە ارتىق تولەپپىز. ەندى سۋ ەسەپتەگىشتەرىنىڭ كورسەتكىشىن اي سايىن ءوزىمىز جازىپ الىپ، ناقتى تۇتىنعان كولەمگە ساي تولەۋ ءۇشىن «گورۆودوكانالعا» جىبەرۋ كەرەك ەكەن. ال ءبىز تۇبىرتەكتەرگە سەنىپ، تولەي بەردىك. نەگە بۇل تۋرالى الدىن الا ەشكىم ەسكەرتپەيدى؟ - دەپ جازدى استانا تۇرعىنى.
وسىعان بايلانىستى Kazinform ءتىلشىسى «استانا سۋ ارناسى» ش ج ق م ك ك-دان تۇسىنىكتەمە الدى.
كاسىپورىن وكىلدەرىنىڭ مالىمەتىنشە، سۋمەن جابدىقتاۋ جانە سۋ بۇرۋ قىزمەتتەرى ءۇشىن تولەمدى دۇرىس ەسەپتەۋ ماقساتىندا تۇتىنۋشىلارعا سۋىق جانە ىستىق سۋ ەسەپتەگىشتەرىنىڭ كورسەتكىشتەرىن اي سايىن تاپسىرۋ ۇسىنىلادى.
مۇنى ءتيىستى راديومودۋل بولعان جاعدايدا قاشىقتان، بايلانىس ورتالىعى، WhatsApp جانە Telegram بوتتارى، رەسمي سايت، سونداي-اق باسقا دا بەلگىلەنگەن ارنالار ارقىلى جاساۋعا بولادى.
- ەسەپتەگىش كورسەتكىشتەرىن ۋاقىتىلى تاپسىرۋ سۋدىڭ ناقتى تۇتىنىلعان كولەمىنە قاراي تولەم ەسەپتەۋگە جانە بولجامدى ەسەپتەۋلەردىڭ الدىن الۋعا مۇمكىندىك بەرەدى، - دەپ ءتۇسىندىردى كاسىپورىن.
ەگەر تۇتىنۋشى ەسەپتەگىش كورسەتكىشتەرىن تاپسىرماسا، تولەم 2025-جىلعى 16 -قازاندا بەكىتىلگەن سۋمەن جابدىقتاۋ جانە سۋ بۇرۋ قىزمەتتەرىنىڭ كولەمىن ەسەپتەۋ ادىستەمەسىنە سايكەس ەسەپتەۋ جولىمەن شىعارىلادى.
سوندىقتان تۇبىرتەكتەگى سوما سۋدىڭ ناقتى تۇتىنىلعان كولەمىنەن وزگەشە بولۋى مۇمكىن. ناقتى كورسەتكىشتەر الىنعاننان كەيىن سالىستىرۋ جۇرگىزىلىپ، ءتيىستى قايتا ەسەپتەۋ جاسالادى.
ەسەپتەگىش كورسەتكىشتەرى ۇزاق ۋاقىت بويى تاپسىرىلماسا، كاسىپورىن وكىلدەرى باقىلاۋ كەزىندە سۋدىڭ ناقتى شىعىنىن قازىرگى جانە بۇعان دەيىن تىركەلگەن كورسەتكىشتەردىڭ ايىرماسى بويىنشا انىقتايدى. وسى مالىمەتتەر نەگىزىندە ءتيىستى كەزەڭدەردەگى تولەمدەر قايتا ەسەپتەلەدى.
«استانا سۋ ارناسى» ماماندارى ارتىق تولەمنىڭ بار-جوعىن قالاي تەكسەرۋگە بولاتىنىن ءدا تۇسىندىردى. ول ءۇشىن تۇتىنۋشىلار ەسەپتەگىشتەردىڭ ناقتى كورسەتكىشتەرىن ءبىرىڭعاي ەسەپ ايىرىسۋ ورتالىعىنىڭ (ب ە ا و) تۇبىرتەكتەرىندەگى مالىمەتتەرمەن سالىستىرۋى كەرەك.
ايىرماشىلىق انىقتالسا، «استانا سۋ ارناسىنا» جۇگىنۋ قاجەت. ماماندار تاپسىرىلعان كورسەتكىشتەردى، ەسەپتەلگەن تولەمدەردى جانە سۋدىڭ ناقتى شىعىنىن تەكسەرەدى.
قاتە ەسەپتەلگەنى انىقتالسا، تولەم قايتا ەسەپتەلەدى. ارتىق تولەنگەن سوما تۇتىنۋشىنىڭ جەكە شوتىندا ساقتالىپ، كەلەسى تولەمدەرگە ەسەپتەلەدى.
كاسىپورىن وكىلدەرى تولەم مەن قايتا ەسەپتەۋگە قاتىستى وتىنىشتەردىڭ ءارقايسىسى جەكە قارالاتىنىن ايتتى. قاتە ەسەپتەلگەن سومالار انىقتالعان جاعدايدا ولاردى تۇزەتۋ شارالارى قابىلدانادى.
«استانا سۋ ارناسى» تۇرعىندارعا ەسەپتەگىش كورسەتكىشتەرىن تۇراقتى تۇردە تاپسىرىپ، قۇرىلعىلاردىڭ تەحنيكالىق جاعدايىن قاداعالاۋدى جانە تولەمگە قاتىستى سۇراقتار تۋىنداسا، ۋاقىتىلى سالىستىرىپ تەكسەرۋگە ءوتىنىش بەرۋدى ۇسىنادى.