«كىتاپ وقيتىن ۇلت» جوباسى اياسىندا وتكەن «مىڭ كىتاپ - ءبىر وقىرمان» كەزدەسۋىندە وقۋشى كىتاپ وقۋدىڭ ساباق ۇلگەرىمىنە، وقۋعا دەگەن ىنتاسىنا جانە ومىرىنە قالاي اسەر ەتكەنى جايلى وي ءبولىستى، دەپ حابارلايدى El.kz ينتەرنەت پورتالى.
كەزدەسۋ سماعۇل ءسادۋاقاس ۇلى اتىنداعى №78 مەكتەپ- گيمنازيانىڭ كىتاپحاناسىندا ءوتتى.
مەكتەبىمىزدە وقۋشىلارمەن قاتار ەرەسەكتەر دە قاتىساتىن كىتاپ كلۋبى بار. سونىمەن بىرگە وقۋشىلار ءوز باستاماسىمەن كىتاپ بۇرىشىن اشتى. بۇل باستامالار بالالاردىڭ ساۋاتىن ارتتىرىپ، كىتاپ وقۋعا دەگەن قىزىعۋشىلىعىن وياتۋدى كوزدەيدى. قازىر وقۋشىلار ۋاقىتىنىڭ كوپ بولىگىن ۇيالى تەلەفون مەن ينتەرنەتكە ارنايدى. سوندىقتان ولاردىڭ نازارىن كىتاپقا اۋدارىپ، ۇلى عالىمدارىمىز بەن جازۋشىلارىمىزدىڭ ەڭبەكتەرىمەن تانىستىرۋ، ساۋاتتى ۇرپاق تاربيەلەۋ اسا ماڭىزدى. ءبىزدىڭ ماقساتىمىز - بالالاردىڭ كىتاپ وقۋدى كۇندەلىكتى داعدىسىنا اينالدىرۋ،- دەدى №78 مەكتەپ- گيمنازيا ديرەكتورىنىڭ تاربيە ءىسى جونىندەگى ورىنباسارى عاليا وماشيەۆا.
بەسىنشى سىنىپ وقۋشىسى كاۋسار بايسقاقوۆانىڭ ايتۋىنشا، كىتاپ وقۋ ونىڭ ساباق ۇلگەرىمىن جاقسارتىپ، دۇنيەتانىمىن كەڭەيتۋگە جانە اينالاسىنداعى دۇنيەگە جاڭاشا كوزقاراسپەن قاراۋعا اسەر ەتكەن.
بۇرىن كوپ نارسەنى بىلە بەرمەيتىنمىن. كوپ كىتاپ وقىعاننان كەيىن تالاي نارسەنى ءتۇسىنىپ، جاڭا دۇنيەلەردى ءبىلدىم. كوزقاراسىم وزگەردى. قازىر ساباعىم جاقسى، كىتاپ وقۋدىڭ ارقاسىندا وقۋعا دەگەن ىنتام دا ارتتى،- دەيدى وقۋشى.
ول بىرنەشە جىلدىڭ ىشىندە ءتۇرلى جانرداعى 1000 نان استام كىتاپ وقىپ ۇلگەرگەن. كاۋساردىڭ سۇيىكتى اۆتورلارىنىڭ ءبىرى - دۋلات يسابەكوۆ. ال ەرەكشە اسەر قالدىرعان شىعارمالاردىڭ قاتارىندا «گاۋھار تاس» پوۆەسى بار. ونىڭ ايتۋىنشا، بوس ۋاقىتىنىڭ كوپ بولىگىن تەلەفون مەن ينتەرنەتكە ارنايتىن قازىرگى بالالار ءۇشىن كىتاپ وقۋدىڭ ماڭىزى ەرەكشە.
مەنىڭشە، كىتاپ وقۋ ءوز ءتىلىڭدى ءبىلۋ، ءبىلىمىڭدى ارتتىرۋ جانە وقۋ ۇلگەرىمىڭ ءۇشىن ماڭىزدى. ماعان قاعاز كىتاپتار كوبىرەك ۇنايدى. ويتكەنى ەلەكتروندى كىتاپتار كوزگە جانە دەنساۋلىققا زيان كەلتىرۋى مۇمكىن. قاتارلاستارىمنىڭ اراسىندا قاعاز كىتاپتى دا، ەلەكتروندى كىتاپتى دا وقيتىندار بار،- دەيدى بەسىنشى سىنىپ وقۋشىسى.
كەزدەسۋ بارىسىندا وقۋشىلار كاۋساردان سۇيىكتى شىعارمالارى، كىتاپ وقۋ داعدىسى جانە وزگەلەرگە وقۋعا ۇسىناتىن كىتاپتارى تۋرالى سۇرادى. سونىمەن قاتار مۇعالىمدەر وقۋشىلارعا كاۋسار ۇسىنعان كىتاپتاردىڭ ءبىرىن وقىپ، كەلەسى ساباقتا العان اسەرلەرىمەن ءبولىسۋدى تاپسىردى.