جاس كاسىپكەر 6 جاسىنان باستاپ قامىر جايىپ ۇيرەنگەن. العاشىندا اناسىنا كومەكتەسۋدەن باستاعان بەيسەن بۇگىندە اپكەسى داريعامەن بىرگە تۇشپارا ءتۇيىپ، بۇل ءىستى شاعىن كاسىپكە اينالدىرعان. ولار كۇنىنە 8-12 كەلىگە دەيىن تۇشپارا دايىندايدى.
- بالالارىمنىڭ كۇن ءتارتىبى ناقتى جوسپارلانعان. ولار ساباقتان كەيىن قوسىمشا ۇيىرمەلەرگە قاتىسادى. ودان سوڭ تاپسىرىس كولەمىنە قاراي كۇنىنە 1-2 ساعات تۇشپارا تۇيەدى. كوبىنە دۇكەندەردەن ارنايى تاپسىرىستار تۇسەدى. مەن بالالارعا ءونىمدى ساتۋ جانە وتكىزۋ جاعىنا كومەكتەسەمىن، - دەيدى بەيسەننىڭ اناسى رىسجان حانىم.
وقۋشى ءۇشىن بۇل كاسىپ - تەك تابىس كوزى ەمەس، ەڭبەككە، جاۋاپكەرشىلىككە جانە ۋاقىتتى ءتيىمدى جوسپارلاۋعا ۇيرەتەتىن تاجىريبە. بەيسەننىڭ ايتۋىنشا، بولاشاقتا كاسىبىن ودان ءارى دامىتىپ، جاڭا ءونىم تۇرلەرىن شىعارعىسى كەلەدى.
بۇعان دەيىن قازاقستاننىڭ جەڭىل ونەركاسىبىندە 18 مىڭنان استام ادام ەڭبەك ەتەتىنىن جازعان ەدىك.