ۇساق جاندىكتەر كوبەيدى: استانالىقتار نەگە شاعىمدانىپ ءجۇر
الەۋمەتتىك جەلى قولدانۋشىلارى جاندىكتەردىڭ اسىرەسە كوشەلەردە جانە جاسىل جەلەك كوپ اۋماقتاردا جيى كەزدەسەتىنىن جازىپ جاتىر. كەي جەرلەردە ءتىپتى سەرۋەندەۋ دە قولايسىز بولىپ كەتكەن. ۇساق جاندىكتەر كوزگە، اۋىزعا، قۇلاققا كىرىپ، كيىم مەن دەنەگە جابىسادى.
تۇرعىنداردىڭ ايتۋىنشا، كۇن جەلسىز بولعاندا شىركەيلەر ەرەكشە بايقالادى، ال جەل ولاردان ۋاقىتشا ارىلۋعا كومەكتەسەدى.
سونداي-اق، استانالىقتار بۇرىن-سوڭدى كۇزدە كوپ شىركەيلەردى بايقاماعانىن ايتىپ، ولاردىڭ پايدا بولۋ سەبەبىنە قىزىعۋشىلىق تانىتىپ جاتىر.
ماماندار جاندىكتىڭ ءتۇرىن انىقتادى
Tengrinews.kz رەداكسياسى وسى ماسەلەگە بايلانىستى استانا قالاسىنىڭ قورشاعان ورتانى قورعاۋ جانە تابيعاتتى پايدالانۋ باسقارماسىنا جۇگىندى.
باسقارما ماماندارى شىركەيدىڭ كوبەيگەنىن راستادى. دەگەنمەن ولاردىڭ قالانى جاپپاي قاپتاپ كەتكەنى بايقالماعان.
جاندىكتەر كوبىنە ءشوپ پەن بۇتا وسكەن اۋماقتاردا، سونداي-اق، سۋ ماڭىندا كوبىرەك كەزدەسىپ وتىر.
وسىعان بايلانىستى ماماندار ارنايى زەرتتەۋ جۇرگىزىپ، سىناما العان. كەيىن جينالعان ۇلگىلەر زەرتحانادا ميكروسكوپپەن تەكسەرىلگەن.
ساراپتاما ولاردىڭ ادامعا زيانسىز بىرنەشە ۇساق جاندىك ءتۇرى ەكەنىن كورسەتتى. اراسىندا تسيكادكالار (Cicadellidae)، جاپىراق بۇرگەلەرى (Psyllidae) جانە وسىمدىك بيتتەرىنىڭ قاناتتى تۇرلەرى (Aphididae) بار.
نەگە ءدال قازىر كوبەيدى؟
باسقارما ماماندارى جاندىكتەردىڭ قىركۇيەكتە كوبەيىپ، بەلسەندى بولۋىن تابيعي ءارى ۋاقىتشا قۇبىلىس دەپ ءتۇسىندىردى. بۇل، ەڭ الدىمەن، وسىمدىك بيتتەرىنىڭ تىرشىلىك كەزەڭىنە بايلانىستى.
وعان قوسا، كۇن رايىنىڭ قۇبىلۋى مەن جەلسىز اۋا جاندىكتەردىڭ ءبىر جەرگە توپتاسۋىنا قولايلى جاعداي تۋعىزادى. سوندىقتان ولار تۇرعىندارعا ادەتتەگىدەن كوپ كورىنۋى مۇمكىن.
«كۇن رايى وزگەرىپ، جاندىكتەردىڭ تارالۋ كەزەڭى اياقتالعان سوڭ ولاردىڭ سانى دا، بەلسەندىلىگى دە بىرتىندەپ ازايادى»، - دەپ ءتۇسىندىردى باسقارما وكىلدەرى.