CTS باسقارما ءتوراعاسى اسىلبەك دۇيسەبايەۆتىڭ ايتۋىنشا، پويىزدار جۇرگىزۋشىسىز جۇرگەنىمەن، ءار قۇرام ىشىندە وپەراتور تۇراقتى تۇردە بولادى.
- ماشينيست پويىز ىشىندە بولادى، ءبىراق ونى جۇرگىزبەيدى. ول تەك توتەنشە جاعداي تۋىنداعان جاعدايدا باسقارۋدى ءوز قولىنا الادى. سونىمەن قاتار جولاۋشىلارعا باعىت-باعدار بەرىپ، قاجەت كەزدە كومەكتەسەدى، - دەدى ول LRT ينفراقۇرىلىمىنا ارنالعان باسپا ءسوز تۋرى بارىسىندا.
LRT پويىزىنىڭ وپەراتورى ەرجان سادىربايەۆ بارلىق وپەراتوردىڭ تەمىرجول سالاسىندا كەمىندە 10 جىل ەڭبەك ءوتىلى بار ەكەنىن ايتتى.
ونىڭ سوزىنشە، پويىزداردا جولاۋشىلارعا ارنالعان ارنايى توقتاتۋ تەتىگى قاراستىرىلماعان.
- ارنايى باتىرما تەك باسقارۋ پۋلتىنىڭ استىندا ورنالاسقان. ول پويىزدى جۇرگىزگەن كەزدە عانا پايدالانىلادى. ءبىز راتسيا ارقىلى ديسپەتچەرلىك ورتالىققا بىردەن حابار بەرەمىز. قاجەت بولعان جاعدايدا بارلىق پويىز توقتاتىلادى، - دەدى ول.
ستانسيالار مەن پويىزدارداعى قاۋىپسىزدىك كامەرالار مەن داتچيكتەر ارقىلى باقىلانادى. ولاردىڭ بارلىعى ۇشقىشسىز پويىزداردى باسقارۋ ورتالىعىنا قوسىلعان.
ورتالىقتاعى ديسپەتچەرلەر پويىز قوزعالىسىن ناقتى ۋاقىت رەجيمىندە باقىلاپ وتىرادى. سونىمەن قاتار ماماندار كولىككە قاتىستى وقيعالاردى سارالاپ، زاڭبۇزۋشىلىقتاردى فوتو مەن ۆيدەوعا تىركەيدى. بۇدان بولەك، مارشرۋتتىق اۆتوبۋستاردىڭ ديسپەتچەرلىك قىزمەتى مەن حالىقتى اقپاراتتاندىرۋ جۇيەسىنىڭ جۇمىسىن ۇيلەستىرەدى.
LRT قوزعالىس ديسپەتچەرى مەدەت التىنبەكتىڭ ايتۋىنشا، ءار ستانسيادا كەزەكشى قىزمەتكەرلەر بولادى.
- ەگەر ستانسيادا قانداي دا ءبىر توتەنشە جاعداي بولسا، ونىڭ ءبارى كامەرالار ارقىلى باقىلانادى. ءبىز كەز كەلگەن پويىز بەن ستانسيانى ءار بۇرىشتان كورە الامىز، — دەدى ول.
ونىڭ ايتۋىنشا، كۇردەلى جاعداي تۋىنداسا، پويىز جاقىن ستانسياعا دەيىن جەتكىزىلىپ، سول جەردە جولاۋشىلارعا جەدەل كومەك كورسەتىلەدى.
- ەگەر ەسىك جابىلماي قالسا نەمەسە بىرەۋ قىسىلىپ قالسا، جۇيە ونى داتچيكتەر ارقىلى بىردەن انىقتايدى، - دەدى ول.
جەڭىل رەلستى كولىك جەلىسى ءۇشىن بارلىعى 19 پويىز قاراستىرىلعان. ونىڭ 15- ءى كۇندەلىكتى باعىتقا شىعادى، ال 4-ەۋى رەزەرۆتە بولادى.
پويىزداردىڭ پايدالانۋ جىلدامدىعى ساعاتىنا 60 شاقىرىم. ال ەڭ جوعارى جىلدامدىعى ساعاتىنا 80 شاقىرىمعا دەيىن جەتەدى. ءار پويىزدا 148 وتىراتىن ورىن بار. 4 بولىكتەن تۇراتىن قۇرامدار تولىق تولعان كەزدە 600-دەن استام جولاۋشىنى تاسىمالداي الادى.
ەسكە سالساق، LRT جولاۋشىلار ءۇشىن 16- 17 -مامىردا اشىلادى. كولىك كۇن سايىن ساعات 06:00-دەن 23:00-گە دەيىن قاتىنايدى. وپەراتوردىڭ باعالاۋىنشا، جوبا ىسكە قوسىلعان العاشقى كەزەڭدە تاۋلىگىنە 25 مىڭنان 45 مىڭعا دەيىن جولاۋشى تاسىمالدانادى.