ول ەلوردالىق ءماسليحاتتا وتكەن قوعامدىق تىڭداۋدا استانانىڭ تۋريزم سالاسىنداعى قازىرگى كورسەتكىشتەرى مەن الداعى جوسپارلارىنا توقتالدى.
حالەل اكىمجانوۆتىڭ ايتۋىنشا، 2026 -جىلدىڭ ءبىرىنشى جارتىجىلدىعىندا ەلورداعا 830 مىڭ تۋريست كەلگەن. بۇل وتكەن جىلدىڭ سايكەس كەزەڭىمەن سالىستىرعاندا كوپ. قازىر قالادا 100 دەن استام تۋريستىك نىسان مەن 340 قوناق ءۇي بار. ەكسكۋرسيالىق قىزمەتتى 140 تان استام كاسىبي گيد كورسەتەدى.
- جاقىن ارادا اۋماعى 10 مىڭ شارشى مەتر بولاتىن زاماناۋي جابىق Ailand اتتراكسيون پاركىن ىسكە قوسۋ جوسپارلانىپ وتىر. جاڭا نىساندار ەكسكۋرسيالىق باعىتتاردى كەڭەيتىپ، قالا قوناقتارىنا ەلوردامەن تانىسۋدىڭ جاڭا مۇمكىندىكتەرىن ۇسىنادى، - دەدى باسقارما باسشىسى.
سونىمەن قاتار قوناق ءۇي ينفراقۇرىلىمىن دامىتۋ ءۇشىن ينۆەستورلارمەن ءبىرقاتار جوبا پىسىقتالىپ جاتىر. باسقارما باسشىسى ەلوردانى شەتەلدىك تۋريستەرگە تانىتۋ باعىتىندا دا جۇمىس جۇرگىزىلىپ جاتقانىن ايتتى.
بۇدان بولەك، بيىل ماۋسىم ايىنان باستاپ استانانىڭ 2026- 2031 -جىلدارعا ارنالعان تۋريزمدى دامىتۋ ستراتەگياسى ازىرلەنىپ جاتىر. ونىڭ نەگىزگى ماقساتى - تۋريستەر سانىن كوبەيتۋ، ولاردىڭ قالادا بولۋ مەرزىمىن ۇزارتۋ جانە تۋريستىك شىعىن كولەمىن ارتتىرۋ.
ستراتەگيانى ازىرلەۋ ءتورت كەزەڭنەن تۇرادى. وسى ۋاقىتقا دەيىن استانامەن سالىستىرۋعا كەلەتىن سەگىز قالاعا تالداۋ جاسالىپ، شەتەلدىك التى باسىم نارىق زەرتتەلگەن. سونداي-اق 9 مىڭعا جۋىق تۋريست اراسىندا جۇرگىزىلگەن ساۋالناما ناتيجەلەرى سارالانعان.
ونىڭ ايتۋىنشا، قازىر تۋريستىك اعىننىڭ ناقتى كولەمى مەن ونىڭ قالا ەكونوميكاسىنا قوساتىن ۇلەسى باعالانىپ جاتىر. 12-تامىزدا ساراپشىلار، تۋريستىك بيزنەس وكىلدەرى جانە ءماسليحات دەپۋتاتتارىنىڭ قاتىسۋىمەن ستراتەگيالىق سەسسيا وتكەن.
- وندا تۋريزم سالاسىن ودان ءارى دامىتۋ جانە استانانى تۋريستىك باعىت رەتىندە تانىتۋ ماسەلەلەرى تالقىلاندى. قازىر ستراتەگيانى ازىرلەۋدىڭ ءۇشىنشى كەزەڭىنە كوشتىك. بۇل كەزەڭدە ينفراقۇرىلىمدى دامىتۋ، قىزمەت كورسەتۋ ساپاسىن ارتتىرۋ، ەلوردانى تانىتۋ جانە تۋريزمنىڭ باسىم باعىتتارى بويىنشا باستامالار ازىرلەنەدى. قورىتىندى كەزەڭدە جول كارتاسى، ماستەر- جوسپار جانە نەگىزگى تيىمدىلىك كورسەتكىشتەرى جۇيەسى دايىندالادى. ستراتەگيانى ازىرلەۋ جۇمىستارىن بيىل قاراشا ايىندا اياقتاۋدى جوسپارلاپ وتىرمىز. ودان كەيىن قۇجات استانا قالاسى ءماسليحاتىنىڭ قاراۋىنا ۇسىنىلادى، - دەدى حالەل اكىمجانوۆ.
بۇعان دەيىن استانادا باتپاقتى جەردىڭ ورنىنا 4 ميلليارد تەڭگەگە ەكوساياباق سالىنعانىن جازدىق.