قازىر 2-قالالىق كوپبەيىندى اۋرۋحانا جانىنداعى قابىلداۋ-دياگنوستيكالىق كەشەن مەن 2-كوپبەيىندى قالالىق بالالار اۋرۋحاناسىنا جاپسارلاس عيمارات سالۋ جانە ونى رەكونسترۋكتسيالاۋ جۇمىسى اياقتالۋعا جاقىن. ەكىنشى جوبا بالالارعا شۇعىل تراۆماتولوگيالىق كومەك كورسەتۋ جۇيەسىن جەتىلدىرۋگە باعىتتالعان، دەپ حابارلايدى ەلوردا اكىمدىگىنىڭ رەسمي سايتى.
جوبالار ىسكە اسقاننان كەيىن مەديتسينالىق مەكەمەلەردىڭ ناۋقاستاردى قابىلداۋ، دياگنوستيكالاۋ جانە شۇعىل كومەك كورسەتۋ مۇمكىندىگى ارتادى. سونىمەن قاتار ەمدەۋ پروتسەسىن ءتيىمدى ۇيىمداستىرۋعا قاجەتتى قوسىمشا جاعداي جاسالادى.
2-قالالىق كوپبەيىندى اۋرۋحانا جانىنان قابىلداۋ-دياگنوستيكالىق كەشەن سالۋداعى باستى ماقسات - اۋرۋحانانىڭ ەكى كورپۋسىن ناۋقاستاردى قابىلداۋ، دياگنوستيكالاۋ جانە شۇعىل مەديتسينالىق كومەك كورسەتۋ جۇيەسىنە بىرىكتىرۋ.
كەشەندە زاماناۋي وپەراتسيالىق بولمەلەر، رەانيماتسيا ءبولىمى، قارقىندى تەراپيا پالاتالارى جانە ناۋقاستاردى شۇعىل تەكسەرۋ مەن ەمدەۋگە ارنالعان ارنايى كابينەتتەر قاراستىرىلعان.
مەديتسينالىق مەكەمەنى جوعارى تەحنولوگيالى جابدىقتارمەن قامتاماسىز ەتۋگە دە ەرەكشە كوڭىل بولىنگەن. اتاپ ايتقاندا، كەشەن كومپيۋتەرلىك جانە ماگنيتتىك- رەزونانستىق توموگرافتارمەن، سونداي-اق قان تامىرلارىن زەرتتەۋگە ارنالعان انگيوگرافپەن جابدىقتالادى.
جوبانىڭ نەگىزگى جاڭالىقتارىنىڭ ءبىرى - ءبىرىڭعاي قابىلداۋ ءبولىمىن اشۋ. وندا ناۋقاستاردىڭ جاعدايىنىڭ اۋىرلىعىنا قاراي ءتيىستى بولىمدەرگە جىبەرىلۋى ۇيىمداستىرىلادى.
مۇنداي ءتاسىل مەديتسينا قىزمەتكەرلەرىنىڭ جۇمىسىن ءتيىمدى ۇيلەستىرۋگە، ناۋقاستاردىڭ جاعدايىنا قاراي كومەك كورسەتۋ كەزەگىن انىقتاۋعا، سونداي- اق دياگنوستيكالىق جانە ەمدەۋ بولىمدەرىنىڭ ءوزارا بايلانىسىن جاقسارتۋعا مۇمكىندىك بەرەدى. جاڭا كەشەن تاۋلىگىنە 900 گە تارتا ناۋقاستى قابىلداي الادى.
قازىر نىسانداعى قۇرىلىس جۇمىسى اياقتالۋعا جاقىن. ەكىنشى ماڭىزدى جوبا - ر. قوشقاربايەۆ داڭعىلى، 64 مەكەنجايىندا ورنالاسقان 2-كوپبەيىندى قالالىق بالالار اۋرۋحاناسىنا جاپسارلاس عيمارات سالۋ جانە قولدانىستاعى نىساندى رەكونسترۋكتسيالاۋ.
جوبا اياسىندا اۋرۋحانانىڭ عيماراتى كەڭەيتىلىپ، بالالاردى قابىلداۋعا، دياگنوستيكالاۋعا جانە شۇعىل كومەك كورسەتۋگە ارنالعان قوسىمشا بولمەلەر اشىلادى.
نەگىزگى نازار بالالارعا شۇعىل تراۆماتولوگيالىق كومەك كورسەتەتىن بولىمدەردىڭ جۇمىسىن جەتىلدىرۋگە اۋدارىلعان.
قايتا جاڭعىرتۋ بارىسىندا ناۋقاستاردى قابىلداۋ جانە ولاردىڭ جاعدايى مەن شاعىمدارىنىڭ سيپاتىنا قاراي سۇرىپتاۋ ءۇشىن قوسىمشا ورىندار قاراستىرىلعان.
جاڭا نىساندار ناۋقاستاردى دۇرىس باعىتتاپ، العاشقى مەديتسينالىق تەكسەرۋ مەن دياگنوز قويۋ جۇمىسىن جاقسارتۋعا كومەكتەسەدى. سونداي-اق بالالارعا، ولاردىڭ اتا-انالارىنا جانە مەديتسينا قىزمەتكەرلەرىنە قولايلى جاعداي جاسالادى.
ەرەسەكتەرگە ارنالعان قابىلداۋ-دياگنوستيكالىق كەشەننىڭ قۇرىلىسى مەن بالالار اۋرۋحاناسىنىڭ كەڭەيۋى - استاناداعى دەنساۋلىق ساقتاۋ سالاسىن جاڭعىرتۋ جۇمىسىنىڭ ءبىر بولىگى.
اتالعان جوبالار اۋرۋحانالاردىڭ ماتەريالدىق-تەحنيكالىق جابدىقتالۋىن جاقسارتىپ، شۇعىل مەديتسينالىق كومەك كورسەتۋ مۇمكىندىگىن ارتتىرادى. ناتيجەسىندە ەلوردا تۇرعىندارىنا كورسەتىلەتىن مەديتسينالىق قىزمەتتىڭ ساپاسىن جاقسارتا تۇسۋگە مۇمكىندىك تۋادى.