ق ر اۋىل شارۋاشىلىعى مينيسترلىگى ۆەتەريناريالىق باقىلاۋ جانە قاداعالاۋ كوميتەتىنىڭ استانا قالاسى بويىنشا اۋماقتىق ينسپەكتسياسىنىڭ مالىمەتىنشە، اتالعان نىساندا 2-ساناتتاعى وبەكتىلەرگە قويىلاتىن تالاپتارعا سايكەس قاجەتتى رۇقسات قۇجاتتارىنسىز ەت ونىمدەرى وڭدەلگەن. اتاپ ايتقاندا، ۆەتەريناريالىق-سانيتاريالىق قورىتىندى مەن ەسەپتىك ءنومىر بولماعان.
انىقتالعان دەرەك بويىنشا مەملەكەتتىك ۆەتەريناريالىق-سانيتاريالىق ينسپەكتورلار قوي ەتىنەن سىنامالار الىنىپ، زەرتتەۋ جۇرگىزۋ ءۇشىن «رەسپۋبليكالىق ۆەتەريناريالىق زەرتحانا» شارۋاشىلىق جۇرگىزۋ قۇقىعىنداعى رەسپۋبليكالىق مەملەكەتتىك كاسىپورنىنىڭ استانا قالاسىنداعى وڭىرلىك فيليالىنا جولداندى.
قۇقىق بۇزۋشىلىققا كىنالى تۇلعاعا اكىمشىلىك ايىپپۇل سالىندى.
شىعۋ تەگى بەلگىسىز ءىرى جانە ۇساق قارا مالدىڭ جالپى سالماعى 360 كەلى بولاتىن ىشكى اعزالارى مەن قوسالقى ونىمدەرى «استانا-ۆەتسەرۆيس» شارۋاشىلىق جۇرگىزۋ قۇقىعىنداعى كوممۋنالدىق مەملەكەتتىك كاسىپورنىنىڭ پەش-ينسينەراتورىندا ورتەۋ ارقىلى جويىلدى.
بۇل باعىتتاعى جۇمىستار جالعاسىپ جاتىر.
ايتا كەتەيىك، وتاندىق عالىمدار ەت ارقىلى جۇعۋى مۇمكىن تريحينەللەز اۋرۋىن جەدەل انىقتايتىن تەست جۇيەسىن ازىرلەپ جاتىر. جاڭا ءادىس زەرتحانالىق ميكروسكوپيالىق زەرتتەۋگە كەتەتىن ۋاقىتتى قىسقارتىپ، ناتيجەنى 15-20 مينۋتتا الۋعا مۇمكىندىك بەرەدى.