«بەيجىڭ پالاس» بيزنەس-ورتالىعىندا ۇيىمداستىرىلعان جارمەڭكە قازاقستاندىق ماماندار مەن قىتاي كومپانيالارىنىڭ وكىلدەرىن ءبىر الاڭعا جينادى. ءىس-شارانى قازاقستانداعى قىتاي كاسىپكەرلەرىنىڭ باس قاۋىمداستىعى مەن قازاقستاننىڭ قىتايدا ءبىلىم العان تۇلەكتەر قاۋىمداستىعى بىرلەسىپ ۇيىمداستىردى. استانا حالىقارالىق ۋنيۆەرسيتەتى قولداۋ كورسەتتى.
جارمەڭكەگە ەنەرگەتيكا، قۇرىلىس، وڭدەۋ ونەركاسىبى، تاۋ-كەن ءوندىرىسى، تەحنولوگيا، اۋىل شارۋاشىلىعى جانە كاسىبي قىزمەت كورسەتۋ سالالارىنداعى كاسىپورىندار قاتىستى.
جۇمىس ىزدەۋشىلەرگە قارجى جانە سالىق سالاسى، اۋدارما، ادام رەسۋرستارىن باسقارۋ، اقپاراتتىق تەحنولوگيالار، تەحنيكالىق جانە باسقارۋشىلىق باعىتتار بويىنشا بوس جۇمىس ورىندارى ۇسىنىلدى.
قىتاي كومپانيالارى قازاقستاندىق ماماندارعا قىزىعۋشىلىق تانىتىپ وتىر
جارمەڭكەنىڭ اشىلۋىندا قىتايدىڭ قازاقستانداعى ەلشىلىگىنىڭ ەكونوميكالىق-ساۋدا ماسەلەلەرى جونىندەگى كەڭەسشىسى ۆان مياو ەكى ەل اراسىنداعى ەكونوميكالىق ىنتىماقتاستىقتىڭ دامۋىنا توقتالدى. ونىڭ ايتۋىنشا، قازاقستاندا جۇمىس ىستەيتىن قىتاي كاسىپورىندارى جەرگىلىكتى مامانداردى جۇمىسقا تارتۋعا جانە ولاردىڭ كاسىبي دامۋىنا كوڭىل ءبولىپ كەلەدى.
ۆان مياو قازاقستاندىق قىزمەتكەرلەردى جۇمىسقا ورنالاستىرۋ كاسىپورىنداردىڭ جەرگىلىكتى ەڭبەك نارىعىنا بەيىمدەلۋىنە ىقپال ەتەتىنىن اتاپ ءوتتى. سونداي-اق ول جۇمىس ىزدەپ جۇرگەن جاستاردى جارمەڭكەدە ۇسىنىلعان مۇمكىندىكتەردى پايدالانۋعا شاقىردى.
قازاقستانداعى قىتاي كاسىپكەرلەرىنىڭ باس قاۋىمداستىعىنىڭ باس حاتشىسى ليۋ يۋە بۇل ەكى ۇيىم بىرلەسىپ وتكىزىپ وتىرعان بەسىنشى جۇمىس جارمەڭكەسى ەكەنىن ايتتى. ونىڭ سوزىنشە، سوڭعى بەس جىلدا قازاقستانداعى قىتاي كاسىپورىندارى جەرگىلىكتى كادرلاردى دايارلاۋ، جۇمىسقا قابىلداۋ جانە باسشىلىق قىزمەتتەرگە قازاقستاندىق مامانداردى تارتۋ باعىتىنداعى جۇمىستارىن جالعاستىرىپ كەلەدى.
سونىمەن قاتار ول قازاقستان مەن قىتاي اراسىنداعى ىنتىماقتاستىق اياسىندا جاسىل ەنەرگەتيكا، سيفرلىق ەكونوميكا جانە جاساندى ينتەللەكت باعىتتارىنىڭ ماڭىزى ارتىپ كەلە جاتقانىن اتاپ ءوتتى.
قانداي ماماندارعا سۇرانىس بار؟
جارمەڭكەدە قىتاي ۇلتتىق مۇناي-گاز كورپوراتسياسىنىڭ (CNPC) ورتالىق ازياداعى كادر رەسۋرستارى دەپارتامەنتى باسشىسىنىڭ ورىنباسارى ەلميرا قاسەنوۆا كومپانياداعى جۇمىسقا ورنالاسۋ مۇمكىندىكتەرى تۋرالى اقپارات بەردى. ونىڭ ايتۋىنشا، CNPC قازاقستاندا ۇزاق جىلداردان بەرى ينۆەستيتسيالىق جوبالاردى جۇزەگە اسىرىپ كەلەدى جانە جەرگىلىكتى مامانداردى جۇمىسپەن قامتۋعا قاتىسادى.
كومپانيا وكىلى قازىرگى ۋاقىتتا بىرنەشە باعىت بويىنشا كادرلارعا سۇرانىس بار ەكەنىن جەتكىزدى. اتاپ ايتقاندا، ادام رەسۋرستارىن باسقارۋ، قارجى، قۇقىق، ساتىپ الۋ، كورپوراتيۆتىك كوممۋنيكاتسيالار جانە اقپاراتتىق تەحنولوگيالار سالالارىنداعى ماماندار قاجەت.
جارمەڭكەگە كەلگەن ۇمىتكەرلەر كومپانيا وكىلدەرىمەن تىكەلەي سويلەسىپ، جۇمىسقا ورنالاسۋ تالاپتارى، قىزمەتتىك مىندەتتەر مەن مانساپتىق ءوسۋ مۇمكىندىكتەرى تۋرالى اقپارات الدى.
قىتايدا ءبىلىم العان تۇلەكتەرگە قانداي مۇمكىندىك بار؟
قازاقستاننىڭ قىتايدا ءبىلىم العان تۇلەكتەر قاۋىمداستىعىنىڭ ءتورايىمى ايگەريم نەگمەتجان شەتەلدە ءبىلىم العان جاستاردىڭ ەكى ەل اراسىنداعى كاسىبي جانە ىسكەرلىك بايلانىستاردى دامىتۋداعى رولىنە توقتالدى. ونىڭ ايتۋىنشا، قىتاي ۋنيۆەرسيتەتتەرىنىڭ تۇلەكتەرى كاسىبي بىلىممەن قاتار قىتاي ءتىلىن، ەلدىڭ مادەنيەتىن جانە ىسكەرلىك قارىم-قاتىناس ەرەكشەلىكتەرىن مەڭگەرەدى. بۇل ولاردىڭ ەڭبەك نارىعىنداعى مۇمكىندىكتەرىن كەڭەيتۋگە ىقپال ەتەدى.
قاۋىمداستىق الداعى ۋاقىتتا دا تۇلەكتەردىڭ جۇمىسقا ورنالاسۋىنا، كاسىبي بايلانىس ورناتۋىنا جانە تاجىريبە الماسۋىنا كومەكتەسەتىن الاڭداردى دامىتۋدى جوسپارلاپ وتىر.
ءىس-شارا بارىسىندا جۇمىس بەرۋشىلەر ۇمىتكەرلەرگە بوس جۇمىس ورىندارىن تانىستىرىپ، ولاردىڭ سۇراقتارىنا جاۋاپ بەردى. ۇيىمداستىرۋشىلاردىڭ مالىمەتىنشە، جارمەڭكەنىڭ نەگىزگى ماقساتى - قازاقستانداعى قىتاي كاپيتالى بار كاسىپورىنداردى جەرگىلىكتى ماماندارمەن بايلانىستىرۋ جانە جاستاردىڭ جۇمىسقا ورنالاسۋ مۇمكىندىكتەرىن كەڭەيتۋ.
El.kz