كورمە اياسىندا كولىك ينفراقۇرىلىمى، حالىقارالىق جۇك تاسىمالى، قويما لوگيستيكاسى جانە سالانى دامىتۋ ماسەلەلەرى تالقىلانىپ جاتىر.
كورمە العاش رەت 1997 -جىلى وتكىزىلگەن. سودان بەرى الماتى مەن استانادا ۇيىمداستىرىلىپ كەلەدى. بۇل جولى 36 جاڭا قاتىسۋشى قوسىلدى. العاش رەت 700 دەن استام كومپانيانى بىرىكتىرەتىن تۇركيانىڭ قىزمەتتەر ەكسپورتتاۋشىلارى قاۋىمداستىعى قاتىسىپ وتىر. سونىمەن بىرگە بەلارۋس، لاتۆيا، ليتۆا، تۇركيا جانە ەستونيا ۇلتتىق توپتارى ءوز ەلدەرىنىڭ كومپانيالارىن تانىستىرادى.
بيىلعى كورمەنىڭ ەكسپوزيتسياسىندا تەڭىز پورتتارى مەن تەمىرجول اكىمشىلىكتەرى، لوگيستيكالىق ورتالىقتار، كولىك تەحنيكاسىن وندىرۋشىلەر، ۆاگون جاساۋ جانە جوندەۋ كاسىپورىندارى، قويما جابدىقتارىن جەتكىزۋشىلەر ءوز شەشىمدەرىن ۇسىنىپ جاتىر. جۇك وڭدەۋ مەن ساقتاۋ تەحنولوگيالارىنا، وندىرىستىك جانە لوگيستيكالىق ۇدەرىستەردى اۆتوماتتاندىرۋعا ارنالعان قۇرال- جابدىقتار دا تانىستىرىلعان.
ۇيىمداستىرۋشىلاردىڭ ايتۋىنشا، ىسكەرلىك باعدارلاما ءۇش كۇنگە جوسپارلانعان. ونىڭ اياسىندا كولىك سالاسىنداعى ايەل كوشباسشىلاردىڭ ءرولى، كادر دايارلاۋ، تالىمگەرلىك، كۇردەلى جوبالىق جۇكتەردى تاسىمالداۋ جانە قويما لوگيستيكاسى ماسەلەلەرى تالقىلانادى. سونداي- اق حالىقارالىق كولىك دالىزدەرى مەن قازاقستاننىڭ ترانزيتتىك الەۋەتىن دامىتۋعا ارنالعان كەزدەسۋلەر وتەدى.
- بۇگىن «جاڭا ءداۋىردىڭ كوشباسشى ايەلدەرى» اتتى سەسسيا ءوتتى. وندا كولىك سالاسىن دامىتۋداعى ايەلدەردىڭ ءرولى، كادر دايارلاۋ جانە تالىمگەرلىك ماسەلەلەرى تالقىلاندى. الداعى كۇندەرى قويما لوگيستيكاسىنا ارنالعان كونفەرەنتسيادا زاماناۋي قويمالاردىڭ قانداي بولۋى كەرەكتىگى جانە ولاردىڭ تۇراقتى جۇمىس ىستەۋى ءۇشىن نە قاجەت ەكەنى ءسوز بولادى. سوڭعى كۇنى ساراپشىلار كولىك اپتاسىنىڭ قورىتىندىسىن شىعارىپ، الداعى جوبالاردى تالقىلايدى، - دەدى كورمە ۇيىمداستىرۋشىسى گۇلزانا ءابدۋشارىپوۆا.
ايتا كەتەيىك، كورمە 16-قازانعا دەيىن جالعاسادى. كەلەسى جىلى TransLogistica Kazakhstan كورمەسىن الماتىدا وتكىزۋ جوسپارلانعان. بۇل شارانىڭ 30-مەرەيتويلىق كورمەسى بولماق.
بۇعان دەيىن قازاقستاندىق 20 كومپانيا «يننوپروم. بەلارۋس» حالىقارالىق كورمەسىندە يننوۆاتسيالىق ونىمدەرىن تانىستىرعانى تۋرالى جازعان ەدىك.