سپورت كەشەنى تۇران داڭعىلى، 4/1 مەكەنجايىندا ورنالاسقان. ساۋداعا جالپى اۋدانى 4043,4 شارشى مەتر عيمارات پەن وعان جاپسارلاس قۇرىلىستار، سونداي-اق 510 ءتۇرلى جابدىق پەن نەگىزگى قۇرال شىعارىلعان. ولاردىڭ اراسىندا جاتتىعۋ زالدارى، كارديوجاتتىعۋ ايماقتارى، باسسەيندەر، SPA كەشەنى مەن كەڭسەلەرگە ارنالعان جابدىقتار بار.
نىسان العاش رەت 15 -قازاندا ساۋداعا قويىلعان. ول كەزدە باعاسى 2,91 ميلليارد تەڭگە بولعانىمەن، ساتىپ الۋشى تابىلماعان.
كەيىن باستاپقى باعاسى 30 پايىزعا ارزانداتىلعان. ناتيجەسىندە 3 -قاراشاداعى ساۋدادا كەشەن 2,3 ميلليارد تەڭگەگە ساتىلدى.
ونى كىم ساتىپ العانى ازىرگە بەلگىسىز.
جەر تەلىمى ساتىلعان مۇلىكتىڭ قۇرامىنا كىرمەيدى. جاڭا يەسى جەردىڭ قۇنىن كاداسترلىق باعالاۋ بويىنشا بولەك تولەۋى كەرەك.
ساۋدا شارتىنا سايكەس، جاڭا يەسى بەس جىل بويى كەشەننىڭ نىسانالى ماقساتىن وزگەرتە المايدى. عيمارات سپورت، ساۋىقتىرۋ جانە وڭالتۋ باعىتىندا جۇمىسىن جالعاستىرۋى ءتيىس.
بۇعان دەيىن Fitnation استانا اكىمدىگىنە قاراستى «داۋلەت» مەملەكەتتىك كوممۋنالدىق قازىنالىق كاسىپورنىنىڭ بالانسىندا بولعان. مەملەكەت مەنشىگىنە وتكەن سوڭ كەشەن ەرەكشە قاجەتتىلىكتەرى بار بالالاردى وڭالتۋ ءۇشىن دە پايدالانىلعان.
ايتا كەتەيىك، بۇعان دەيىن استانادا قايرات بورانبايەۆتان تاركىلەنگەن قوناقۇيدىڭ جەكەشەلەندىرىلۋى مۇمكىن ەكەنى حابارلانعان ەدى.