پرەزيدەنت قاسىم-جومارت توقايەۆ «اتلەتيكو مادريد» فۋتبول كلۋبىمەن تابىستى ىنتىماقتاستىقتى جوعارى باعالاپ، ميگەل انحەل حيل ماريننىڭ قازاقستانعا ساپارى سەرىكتەستىكتى جاڭا دەڭگەيگە كوتەرۋگە مۇمكىندىك بەرەتىنىن اتاپ ءوتتى.
مەملەكەت باسشىسىنىڭ ايتۋىنشا، قازاقستان زاماناۋي فۋتبول ينفراقۇرىلىمىنا، جاتتىعۋ بازاسىنا جانە جاس ويىنشىلاردى دايارلاۋ باعدارلاماسىنا بەلسەندى تۇردە ينۆەستيتسيا قۇيىپ جاتىر. سونىمەن قاتار ەلدەگى فۋتبول كلۋبتارىن جەكەشەلەندىرۋ ۇدەرىسى جالعاسۋدا.
بۇدان بولەك، پرەزيدەنت فيفا-مەن بىرگە بارلىق وڭىردە بالالارعا ارنالعان 100 دەن استام جاڭا فۋتبول الاڭىن سالۋ جۇمىستارى قولعا الىنعانىنا نازار اۋداردى.
اڭگىمەلەسۋ بارىسىندا قاسىم-جومارت توقايەۆ يسپانيا قۇراماسى مەن يسپانيالىق فۋتبول مەكتەبىنىڭ جەتىستىكتەرىنە ايرىقشا توقتالىپ، وسى وزىق تاجىريبەنى تەرەڭ زەردەلەۋگە جانە ونى قازاقستاندىق دارىندى ويىنشىلاردىڭ جاڭا بۋىنىن تاربيەلەۋ ىسىندە پايدالانۋعا مۇددەلى ەكەنىمىزدى اتاپ ءوتتى.
«اتلەتيكو مادريد» كلۋبىنىڭ باس ديرەكتورى ەلىمىزدە فۋتبولدى قولداۋعا ەرەكشە نازار اۋدارعانى ءۇشىن پرەزيدەنتكە ريزاشىلىعىن جەتكىزدى.
ول الماتى وبلىسىنداعى «اتلەتيكو مادريد» اكادەمياسىنىڭ ينفراقۇرىلىمى تۋرالى وڭ پىكىر ءبىلدىرىپ، ونىڭ كەلەشەكتە فۋتبولعا ارنالعان ۇزدىك وقۋ-جاتتىعۋ كەشەندەرىنىڭ ءبىرى بولاتىنىن ايتتى.
بۇعان دەيىن پرەزيدەنت قاسىم-جومارت توقايەۆتىڭ توراعالىعىمەن قازاقستان رەسپۋبليكاسى قاۋىپسىزدىك كەڭەسىنىڭ وتىرىسى وتكىزىلگەنىن جازدىق.