قازىر كەيبىر ۋچاسكەلەردە قۇرىلىس باستالسا، ەندى بىرىندە دايىندىق جۇمىستارى ءجۇرىپ جاتىر.
ل ر ت ەسكى تەمىرجول ۆوكزالىنا دەيىن بارادى
City Transportation Systems (CTS) كومپانياسىنىڭ مالىمەتىنشە، ەكىنشى كەزەڭ اياسىندا وڭ جاعالاۋدا بەس جاڭا ستانسيا سالۋ كوزدەلگەن. ولار سارىارقا جانە جەڭىس داڭعىلدارى بويىندا، سونداي-اق «استانا-1» تەمىرجول ۆوكزالى ماڭىندا ورنالاسادى.
بۇعان دەيىن CTS باسشىسى اسىلبەك دۇيسەبايەۆ ل ر ت جەلىسىن «حان شاتىر» ساۋدا ورتالىعى ماڭىنان كەنەسارى جانە جەڭىس داڭعىلدارى ارقىلى ەسكى ۆوكزالعا دەيىن جەتكىزۋ جوسپارلانعانىن مالىمدەگەن ەدى.
كومپانيا بۇل باعىتتىڭ وزگەرمەگەنىن راستادى. دەگەنمەن ازىرگە ستانسيالار مەن ەستاكادانىڭ قۇرىلىسى باستالعان جوق. قازىر ماماندار گەولوگيالىق زەرتتەۋ جۇرگىزىپ، الداعى قۇرىلىسقا دايىندالىپ جاتىر.
CTS وكىلدەرىنىڭ تۇسىندىرۋىنشە، نەگىزگى قۇرىلىس جۇمىستارى جەر قىرتىسىن زەرتتەۋ اياقتالعاننان كەيىن قولعا الىنادى.
ال جوبانىڭ ناقتى قۇنى مەن اياقتالاتىن ۋاقىتى ازىرگە بەلگىسىز. قۇرىلىس مەرزىمى قارجىلاندىرۋدىڭ ۋاقىتىلى بولىنۋىنە بايلانىستى انىقتالادى.
قوسشىعا باراتىن باعىتتا قۇرىلىس باستالدى
ل ر ت- نىڭ ەكىنشى كەزەڭىندەگى ماڭىزدى باعىتتاردىڭ ءبىرى - استانانى قوسشى قالاسىمەن بايلانىستىراتىن جەلى.
بۇل ۋچاسكەدە قۇرىلىس جۇمىستارى باستالىپ كەتكەن. قازىرگى ۋاقىتتا ەستاكادا مەن ونىڭ تىرەكتەرى تۇرعىزىلىپ جاتىر.
جاڭا باعىتتىڭ ۇزىندىعى 9 شاقىرىم بولادى. وسى ارالىقتا ءۇش ستانسيا سالۋ جوسپارلانعان.
بۇعان دەيىن CTS وكىلدەرى قارجى جەتكىلىكتى بولىنگەن جاعدايدا قوسشى باعىتىنداعى قۇرىلىستى 2027-جىلدىڭ سوڭىنا قاراي اياقتاۋعا بولاتىنىن ايتقان. الايدا كومپانيا سوڭعى مالىمەتىندە بۇل مەرزىمدى ناقتى راستاعان جوق.
وڭ جاعالاۋعا جانە قوسشىعا باعىتتالعان جەلىلەردىڭ قۇرىلىسى قاتار جۇرگىزىلەدى دەپ جوسپارلانىپ وتىر.
ل ر ت- نىڭ جالپى ۇزىندىعى 49 شاقىرىمعا جۋىقتايدى
ەكىنشى كەزەڭ اياقتالعاننان كەيىن استاناداعى جەڭىل رەلستى كولىك جۇيەسى ەداۋىر كەڭەيمەك. جاڭا جەلىلەر ءۇش باعىتتى قامتيدى:
«استانا-1» تەمىرجول ۆوكزالى؛
جاعالاۋ تۇرعىن الابى؛
قوسشى قالاسى.
ەكىنشى كەزەڭدە بارلىعى 26,51 شاقىرىم جاڭا جول مەن 20 ستانسيا سالۋ كوزدەلگەن.
قازىرگى قولدانىستاعى ءبىرىنشى كەزەڭنىڭ ۇزىندىعى 22,4 شاقىرىمدى قۇرايدى جانە 18 ستانسيادان تۇرادى. وسىلايشا ەكى كەزەڭ تولىق ىسكە اسقاندا ل ر ت جەلىسىنىڭ جالپى ۇزىندىعى 48,91 شاقىرىمعا جەتىپ، ستانسيالار سانى 38 گە دەيىن كوبەيەدى.
قۇرىلىسقا بايلانىستى استانادا بىرنەشە كوشەدە قوزعالىس شەكتەلەدى
ل ر ت جەلىسىن كەڭەيتۋ جۇمىستارى ەلورداداعى كولىك قوزعالىسىنا دا اسەر ەتەدى. استانا اكىمدىگىنىڭ حابارلاۋىنشا، 7-قازاننان باستاپ ەكىنشى كەزەڭنىڭ قۇرىلىسىنا بايلانىستى ءبىرقاتار كوشەدە كولىك قوزعالىسىنا ءىشىنارا شەكتەۋ ەنگىزىلدى. اتاپ ايتقاندا:
سىعاناق كوشەسىنىڭ تولە ءبي كوشەسىنەن شىڭعىس ايتماتوۆ كوشەسىنە دەيىنگى ارالىعى؛
شىڭعىس ايتماتوۆ كوشەسىنىڭ سىعاناق كوشەسىنەن قايىم مۇحامەدحانوۆ كوشەسىنە دەيىنگى ارالىعى.
ازىرگە اتالعان ۋچاسكەلەردەگى شەكتەۋلەردىڭ قاشان الىناتىنى حابارلانعان جوق. قالا اكىمدىگى جۇرگىزۋشىلەرگە جولداعى وزگەرىستەردى ەسكەرىپ، ساپار باعىتىن الدىن الا جوسپارلاۋعا كەڭەس بەردى.