بۇل تۋرالى استانا قالاسى اكىمدىگىنىڭ «ەڭبەك موبيلدىلىگى ورتالىعى» ك م م ديرەكتورى ومار ولجاس مالىمدەدى.
ونىڭ ايتۋىنشا، قالادا جۇمىسپەن قامتۋ مۇمكىندىكتەرىن كەڭەيتۋگە باعىتتالعان باعدارلامالار حالىقتىڭ ءارتۇرلى ساناتىن قامتىپ وتىر.
- جاستاردى قولداۋ ءۇشىن «جاستار پراكتيكاسى» باعدارلاماسى جۇزەگە اسىرىلىپ جاتىر. باعدارلاما جوعارى جانە تەحنيكالىق، كاسىپتىك ءبىلىم بەرۋ ۇيىمدارىنىڭ تۇلەكتەرىنە، سونداي-اق جۇمىس تاجىريبەسى جوق ازاماتتارعا ارنالعان، - دەدى ول.
وقۋىن اياقتاعان ازاماتتار باعدارلاماعا 5 جىل ىشىندە قاتىسا الادى. پراكتيكا 12 ايعا دەيىن جالعاسادى جانە بۇل ۋاقىت ەڭبەك وتىلىنە ەسەپتەلەدى.
- قاتىسۋشىلارعا 30 ايلىق ەسەپتىك كورسەتكىش كولەمىندە جالاقى تولەنەدى. 2026-جىلى بۇل 129750 تەڭگەنى قۇرايدى، - دەدى ورتالىق باسشىسى.
سونىمەن قاتار زەينەتالدى جاستاعى ازاماتتارعا ارنالعان «كۇمىس جاس» جوباسى دا ىسكە اسىرىلىپ جاتىر.
- اتالعان باعدارلاما 50 جاستان اسقان ازاماتتاردى 36 ايعا دەيىن جۇمىسپەن قامتۋدى كوزدەيدى جانە تۇراقتى تابىس تابۋىنا مۇمكىندىك بەرەدى. سونىمەن قاتار ۋاقىتشا جۇمىس ىزدەگەندەرگە قوعامدىق جانە الەۋمەتتىك جۇمىس ورىندارى ۇسىنىلادى. بۇل جۇمىستارعا قاتىسقاندارعا 24 ا ە ك كولەمىندە جالاقى تولەنەدى (2026 -جىلى - 103800 تەڭگە)، ال قاتىسۋ مەرزىمى 12 ايعا دەيىن، - دەدى ول.