ماڭىزدى جوبالاردىڭ ءبىرى - WDSOFT جاساندى ينتەللەكت جۇيەسىن قولدانا وتىرىپ، راديولوگيالىق زەرتتەۋلەردى ورتالىقتاندىرۋ. جوبا ونكولوگيالىق اۋرۋلارمەن كۇرەسۋدىڭ كەشەندى جوسپارى اياسىندا جۇزەگە اسىرىلدى. قازىر جۇيەگە ۆەدومستۆولىق باعىنىستى 19 مەديتسينالىق ۇيىم قوسىلعان.
WDSOFT جۇيەسىن پايدالانۋ ونكولوگيالىق اۋرۋلاردى ەرتە كەزەڭدە انىقتاۋعا، مەديتسينالىق كەسكىندەردەگى پاتولوگيالىق وزگەرىستەردى جوعارى دالدىكپەن تانۋعا جانە دياگنوز قويۋ ۋاقىتىن 10 مينۋتقا دەيىن قىسقارتۋعا مۇمكىندىك بەرەدى. سونىمەن قاتار جۇيە دارىگەر-رەنتگەنولوگتەردىڭ جۇكتەمەسىن ازايتىپ، مەديتسينالىق كومەكتىڭ ساپاسىن ارتتىرۋعا ىقپال ەتەدى.
2025 -جىلعى 1-تامىزدان بەرى استانانىڭ ءبىرىڭعاي ورتالىق گۇلزارىندا 360 مىڭنان استام راديولوگيالىق زەرتتەۋ جيناقتالعان. ونىڭ ىشىندە:
• 282603 رەنتگەن جانە فليۋوروگرافيالىق زەرتتەۋ؛
• 44215 كومپيۋتەرلىك توموگرافيا؛
• 3878 ماگنيتتىك-رەزونانستىق توموگرافيا؛
• 28618 مامموگرافيالىق زەرتتەۋ؛
• 949 انگيوگرافيالىق زەرتتەۋ.
سيفرلىق مەديتسيناداعى تاعى ءبىر وزىق شەشىم - ينسۋلتتى اۆتوماتتى دياگنوستيكالاۋعا ارنالعان Cerebra.ai Ltd. كومپانياسىنىڭ Cerebra باعدارلامالىق جاساقتاماسىن ەنگىزۋ.
جۇيە دياگنوزدى جىلدام ءارى ءدال قويۋعا، ينسۋلتتىڭ ءتۇرى مەن قوسالقى ءتۇرىن ناقتى جىكتەۋگە مۇمكىندىك بەرەدى. سونداي-اق ۋاقىتتىڭ ءار مينۋتى ماڭىزدى بولاتىن جاعدايدا دارىگەرلەرگە شەشىم قابىلداۋعا كومەكتەسەدى.
جوبا استانا قالاسىنىڭ № 2-قالالىق كوپبەيىندى اۋرۋحاناسىندا ءساتتى پيلوتتىق سىناقتان وتكەننەن كەيىن Cerebra جۇيەسىن ەلوردانىڭ ءۇش ينسۋلت ورتالىعىنا - № 2 ق ك ا، № 1-كوپبەيىندى قالالىق اۋرۋحاناعا جانە كوپبەيىندى مەديتسينالىق ورتالىققا ەنگىزۋ تۋرالى شەشىم قابىلداندى.
ەلورداداعى سيفرلىق دەنساۋلىق ساقتاۋدى دامىتۋدىڭ كەلەسى كەزەڭى - «جەكە سۇيەمەلدەۋ جانە ونلاين- كونسۋلتاتسيالار ورتالىعى» جوباسى. ونى بيىل ىسكە قوسۋ جوسپارلانىپ وتىر.
ورتالىقتىڭ جۇمىسى مەديتسينالىق ۇيىمداردىڭ پاتسيەنتتەرمەن ءوزارا بايلانىسىن كۇشەيتۋگە، حالىقتى پروفيلاكتيكالىق ءىس-شارالارمەن قامتۋدى كەڭەيتۋگە، سونداي-اق مەديتسينالىق كومەكتىڭ ساپاسى مەن ونىڭ ناقتى قاجەتتىلىككە ساي كورسەتىلۋىن ارتتىرۋعا مۇمكىندىك بەرەدى.
سونىمەن قاتار ورتالىق بازاسىندا استانانىڭ دەنساۋلىق ساقتاۋ جۇيەسىندەگى نەگىزگى كورسەتكىشتەردى جاساندى ينتەللەكت تەحنولوگيالارى ارقىلى باقىلاۋعا ارنالعان احۋالدىق ورتالىق جۇمىس ىستەيتىن بولادى.
ايتا كەتەيىك، دارىگەرگە جۇگىنبەي-اق جاساندى ينتەللەكتپەن «كەڭەسىپ»، ءوز-ءوزىن ەمدەۋگە تىرىساتىن قازاقستاندىقتاردىڭ سانى ارتىپ كەلەدى. وسىعان بايلانىستى Kazinform ءتىلشىسى جاڭا تەحنولوگيانىڭ مەديتسينا مەن قوعام ومىرىنە دەندەۋ ۇدەرىسىن سارالادى.