- 2026- 2027 -جىلدارداعى ەپيدەميالىق ماۋسىمدا (2026 -جىلعى 1-قازاننان 18-قاراشاعا دەيىن) ج ر ۆ ي-دىڭ 89942 جاعدايى تىركەلدى. سىرقات تانۋ كورسەتكىشى 100 مىڭ تۇرعىنعا شاققاندا 5487 نى قۇرادى. 14 جاسقا دەيىنگى بالالار اراسىندا ج ر ۆ ي-مەن سىرقاتتانۋ ۇلەسى 57,6 پايىزدى قۇرادى، بۇل رەتتە اۋردى جۇقتىرۋ كورسەتكىشى 100 مىڭ بالاعا شاققاندا 10779,6 بولدى، - دەدى ايگۇل شاعالتايەۆا استانا قالاسى كوممۋنيكاتسيالار قىزمەتىندەگى بريفينگىدە.
ونىڭ ايتۋىنشا، سوڭعى ءبىر اپتادا قالادا ج ر ۆ ي-دىڭ 21158 جاعدايى تىركەلدى. ونىڭ ىشىندە 14 جاسقا دەيىنگى بالالاردىڭ ۇلەس سالماعى 60 پايىزدى قۇرادى. وتكەن جىلدىڭ وسى كەزەڭىمەن سالىستىرعاندا سىرقاتتانۋ دەڭگەيىنىڭ 38 پايىزعا تومەندەگەنى بايقالدى.
- كەيىنگى ءبىر اپتادا ج ر ۆ ي-گە شالدىعۋ 159 مەكتەپتە تىركەلىپ، مەكتەپكە باراتىن 2016 وقۋشى اۋىرعان. بۇل وقۋشىلاردىڭ جالپى سانىنىڭ 0,6 پايىزىن قۇرادى. مەكتەپتەردە اۋرۋعا شالدىققان وقۋشىلار سانى 20 پايىزدان اسقان جوق. وسىعان بايلانىستى كابينەتتىك وقىتۋ جۇيەسىن توقتاتۋعا جانە وقۋ پروتسەسىن ۋاقىتشا توقتاتا تۇرۋعا نەگىز جوق، - دەپ ءتۇسىندىردى دەپارتامەنت باسشىسى.
سونىمەن قاتار ول استانا قالاسىندا ج ر ۆ ي، تۇماۋ جانە COVID-19 بويىنشا ەپيدەميولوگيالىق جانە زەرتحانالىق قاداعالاۋ قالانىڭ 8 مەديتسينالىق ۇيىمىنىڭ بازاسىندا جالعاسىپ جاتقانىن ايتتى. اتالعان مەديتسينالىق ۇيىمداردا جىل بويى كلينيكالىق بەلگىلەرى تۇماۋعا ۇقساس ناۋقاستاردان ىرىكتەپ سىنامالار الىنادى. وڭ ناتيجە انىقتالعان جاعدايدا، ۆيرۋستارعا گەنەتيكالىق زەرتتەۋ جۇرگىزىلەدى. بۇل نىسانالى توپتارداعى ەپيدەميولوگيالىق جاعدايدى باعالاۋعا جانە جالپى حالىق اراسىنداعى ەپيدەميولوگيالىق احۋال تۋرالى تۇسىنىك قالىپتاستىرۋعا مۇمكىندىك بەرەدى.
- تۇماۋعا قارسى ۆاكتسيناتسيا وسى جىلدىڭ 2-قازانىندا باستالدى. ۆاكتسيناتسيا تۇماۋدى جۇقتىرۋ قاۋپى جوعارى ادامدارعا ۇسىنىلادى. ولاردىڭ قاتارىنا مەديتسينا قىزمەتكەرلەرى، سوزىلمالى اۋرۋلارى بار ادامدار، مەكتەپ وقۋشىلارى، جۇكتىلىكتىڭ II- III تريمەسترىندەگى ايەلدەر، ەگدە جاستاعى ادامدار، جابىق ۇلگىدەگى مەكەمەلەردە جانە ارناۋلى الەۋمەتتىك قىزمەتتەر كورسەتەتىن ۇيىمداردا تۇراتىن ادامدار جاتادى. 2026 -جىلعى 17-قاراشاداعى جاعداي بويىنشا 140106 ادام تۇماۋعا قارسى ەگىلدى، بۇل قالا حالقىنىڭ جالپى سانىنىڭ 8,6 پايىزىن قۇرايدى. ونىڭ ىشىندە جەرگىلىكتى بيۋدجەت قاراجاتى ەسەبىنەن 139638 ادام ەگىلدى (ۆاكتسيناتسيامەن قامتۋ كورسەتكىشى - 84,7 پايىز)، ونىڭ ىشىندە 28758 بالا جانە 110880 ەرەسەك ادام، - دەدى ايگۇل شاعالتايەۆا.