ونى س. ءسادۋاقاسوۆ اتىنداعى № 78 مەكتەپ-گيمنازياسىنىڭ كوركەم ەڭبەك ءپانىنىڭ ءمۇعالىمى ءلاززات اتىباي وقۋشىلارىمەن بىرگە بەس ايدا جاساپ شىققان. ەندى تۋىندىنى الەمدىك رەكوردقا ۇسىنۋ جوسپارلانىپ وتىر. Kazinform ءتىلشىسى «ونەرمەن ورىلگەن قازاقستان» جوباسىنىڭ قالاي جۇزەگە اسقانىن كورىپ قايتتى.
قازاقستان كارتاسىن جاساۋ يدەياسى قالاي تۋدى؟
«ونەرمەن ورىلگەن قازاقستان» جوباسىنىڭ يدەياسى كوركەم ەڭبەك ساباعىندا تۋعان. ءلاززات اتىباي وقۋشىلارىنا جۇننەن شاعىن بۇيىمدار جاساۋدى ۇيرەتىپ ءجۇرىپ، بالالارمەن بىرگە اۋقىمدى تۋىندى جاساۋعا بەل بۋعان. تاڭداۋ قازاقستان كارتاسىنا تۇسكەن.
- «نەگە ءبارىمىز بىرىگىپ، ۇلكەن دۇنيە جاساماسقا؟» دەگەن وي كەلدى. ماقساتىم - اتا-بابادان كەلە جاتقان كيىز باسۋ ونەرىن دارىپتەپ، بالالارعا ۇيرەتۋ. ءسويتىپ، قازاقستان كارتاسىن جاساۋعا كىرىستىك، - دەدى ءلاززات اتىباي.
كارتانىڭ نەگىزىنە ماتا توسەلىپ، ءجۇن ارنايى ينەمەن شانشىپ وڭدەلگەن.
كارتانى جاساۋعا قانشا ءجۇن جۇمسالدى؟
تۋىندىعا 10-15 كەلى ءجۇن كەتكەن. ماتاسىمەن قوسا ەسەپتەگەندە ونىڭ جالپى سالماعى 25-30 كەلىگە جەتەدى.
ءجۇندى وڭدەۋگە ارنالعان ينەلەر وتە جىڭىشكە بولعاندىقتان، جۇمىس كەزىندە ءجيى سىنعان. جوبا بارىسىندا 2 مىڭعا جۋىق ينە جارامسىز بولعان.
كارتادا ەلىمىزدىڭ وڭىرلەرى ءتۇرلى تۇسپەن بەينەلەنگەن. اۆتوردىڭ ايتۋىنشا، رەڭكتەردى تاڭداعاندا ايماقتاردىڭ تابيعي ەرەكشەلىكتەرىن ەسكەرۋگە تىرىسقان.
- الماتى جاقتى جاسىل رەڭكتەرمەن، باتىس وڭىرلەردى سارعىش تۇستەرمەن بەردىك. تۇستەردى ءار ءوڭىردىڭ ەرەكشەلىگىنە قاراي تاڭداۋعا تىرىستىق، - دەدى ول.
وقۋشىلار جوبا بارىسىندا نەنى ۇيرەندى؟
جوباعا باستاۋىش جانە ورتا بۋىن وقۋشىلارى اتسالىسقان. مۇعالىمنىڭ ايتۋىنشا، جۇمىس كەزىندە بالالاردىڭ قىزىعۋشىلىعى قولونەرمەن شەكتەلمەي، تاريح پەن گەوگرافياعا دا اۋىسقان.
- «مەنىڭ تۋعان جەرىم قايدا؟»، «نەگە ءبىزدىڭ وبلىستىڭ اۋماعى كىشكەنتاي؟»، «نەگە قاراعاندى ۇلكەن؟ » دەپ سۇراي باستادى. سودان وزدەرى ىزدەنىپ، وڭىرلەر تۋرالى مالىمەت قارادى. وسىلايشا، كوركەم ەڭبەك ساباعى تاريح جانە گەوگرافيامەن دە بايلانىسىپ كەتتى، - دەدى ءلاززات اتىباي.
پەداگوگ بالانى قولونەرگە ەرتە جاستان باۋلىعان ءجون دەپ سانايدى. ونىڭ پىكىرىنشە، بالا كۇنىندە مەڭگەرگەن ونەر كەيىن كاسىپكە دە اينالۋى مۇمكىن.
- قىزدارعا «ەرتەڭ وسى ونەردى كاسىپكە اينالدىرۋلارىڭ مۇمكىن» دەپ ايتىپ وتىرامىن. ءوزىم دە مەكتەپتە ساباق بەرە ءجۇرىپ، بوس ۋاقىتىمدا تاپسىرىس الىپ، قولونەرمەن اينالىسامىن. بىلگەنىمدى بالالارعا ۇيرەتكىم كەلەدى، - دەدى ول.
ءجۇندى نەگە شەتەلدەن الۋعا تۋرا كەلدى؟
كارتاعا وتاندىق جانە شەتەلدىك ءجۇن پايدالانىلعان. اق ءجۇن تارازدان الىنسا، ءتۇرلى ءتۇستى ءجۇننىڭ ءبىر بولىگى رەسەي مەن تۇركيادان جەتكىزىلگەن.
ءلاززات اتىبايدىڭ سوزىنشە، قازاقستاندا قولونەرگە قاجەتتى دايىن، ساپالى بويالعان ءجۇندى تابۋ وڭاي ەمەس.
- ءوزىمىزدىڭ ءونىمدى پايدالانۋعا تىرىسامىز. ءبىراق ءتۇرلى ءتۇستى ءجۇننىڭ ءبىر بولىگىن رەسەي مەن تۇركيادان الدىق. ولاردىڭ بوياۋى سۋ تيگەندە شىقپايدى. بىزدە دە ءجۇن وڭدەۋ ءىسى دامىپ، ءونىم ساپاسى ارتا بەرسە ەكەن دەيمىن، - دەدى ول.
پەداگوگ ەلىمىزدە ءجۇن وڭدەيتىن كاسىپورىندار كوبەيسە، وتاندىق قولونەرگە دە مۇمكىندىك ارتادى دەپ ەسەپتەيدى.
- وزىمىزدە شيكىزات بار. ونى ءوزىمىز وڭدەپ، پايدالانۋعا مۇمكىندىك بولسا، وتاندىق كاسىپتى دە قولدايمىز، - دەدى ءلاززات اتىباي.
جوبا الەمدىك رەكوردقا ۇسىنىلادى
جوبا ۇستازدار كۇنىنە ارنالعان. ۇيىمداستىرۋشىلاردىڭ مالىمەتىنشە، كارتانى الەمدىك رەكوردقا تىركەۋ جونىندەگى ءوتىنىم GBR Global Best of Records ۇيىمىنا جولدانعان. ءوتىنىمنىڭ قابىلدانعانىن راستايتىن رەسمي حات الىنعان. تۋىندىنى 29 -قازاندا الەمدىك رەكوردقا ۇسىنۋ جوسپارلانىپ وتىر.
سول كۇنى ۇلتتىق قۇندىلىقتارعا ارنالعان 500 تۋىندىنى تانىستىرۋ دا كوزدەلگەن. ولاردى ەلىمىزدىڭ ءار وڭىرىندەگى مۇعالىمدەر ازىرلەپ جاتىر. كارتينالاردا قازاقستاننىڭ تابيعاتى، تاريحي ورىندارى، قۇستارى، وسىمدىكتەرى مەن ۇلتتىق مۇراسى بەينەلەنبەك.
- اتا-بابامىز وسى ونەردى بىزگە قالدىردى. ەندى ونى دارىپتەپ، بالالارعا ۇيرەتىپ، كەلەسى ۇرپاققا جەتكىزۋىمىز كەرەك. ۇستاز رەتىندە مۇنى ءوز مىندەتىم دەپ بىلەمىن، - دەدى جوبا اۆتورى.
كارتانىڭ الداعى ۋاقىتتا قايدا ساقتالاتىنى ازىرگە بەلگىسىز.
-بۇل كارتاعا قانشاما ەڭبەك جۇمسالدى. ەگەر الەمدىك رەكوردقا ەنىپ، ۇلتتىق مۋزەي الۋعا نيەت بىلدىرسە، بەرەر ەدىم. كوپشىلىك كورەتىن جەردە تۇرسا دەيمىن،- دەدى ءلاززات اتىباي.
كوركەم ەڭبەك ساباعىندا تۋعان باستاما وسىلايشا اۋقىمدى جوباعا ۇلاستى. اۆتور ءۇشىن ونىڭ باستى ناتيجەسى - بالالاردىڭ ۇلتتىق قولونەرگە قىزىعىپ، ەل وڭىرلەرىن تانىپ-بىلۋگە ۇمتىلۋى.
ۆەنەرا جولامان قىزى