بۇل تۋرالى استانا قالاسى بويىنشا ساۋدا جانە تۇتىنۋشىلاردىڭ قۇقىقتارىن قورعاۋ دەپارتامەنتىنىڭ باسشىسى ەركەبۇلان تاعاشوۆ مالىمدەدى.
دەپارتامەنت باسشىسىنىڭ ايتۋىنشا، ەلورداداعى جەتى بازار جاڭعىرتۋ جونىندەگى جول كارتاسىنا ەنگىزىلگەن. اتالعان ءۇش بازاردىڭ يەسىنە نۇسقامالاردى ورىنداماعانى ءۇشىن ايىپپۇل سالىنعان.
- ايىپپۇل سالىنعانىمەن، بازار يەلەرى جاڭعىرتۋ جۇمىستارىن اياقتاۋعا مىندەتتى. بۇعان دەيىن انىقتالعان زاڭبۇزۋشىلىقتاردى جويۋ، بازارلاردى ستاتسيونارلىق ساۋدا فورماتىنا كوشىرۋ جونىندە نۇسقاما بەرگەن ەدىك. كاسىپكەرلەرگە قايتا حابارلاما جىبەردىك،- دەدى ەركەبۇلان تاعاشوۆ استانا قالاسىنىڭ كوممۋنيكاتسيالار قىزمەتىندە وتكەن باسپا ءسوز كونفەرەنتسياسىندا.
ونىڭ سوزىنشە، زاڭ تالاپتارى تاعى بۇزىلسا، بازار يەلەرىنە قايتا ايىپپۇل سالىنادى.
- نۇسقاما قايتا ورىندالماعان جاعدايدا بازارلاردىڭ جۇمىسىن توقتاتا تۇرۋ تۋرالى سوتقا ءوتىنىشحات بەرەمىز،- دەدى دەپارتامەنت باسشىسى.
قازىر «ورتالىق بازاردا» اشىق الاڭدار مەن كونتەينەرلەردەگى ساۋدانى توقتاتۋ ماقساتىندا تەكسەرۋ جۇرگىزىلىپ جاتىر. ال «ۇلجان» بازارىنىڭ يەسى جوبالىق-سمەتالىق قۇجاتتامانى ۇسىنىپ، بازاردى تولىق جاڭارتىپ، جاڭا نىسان سالۋعا دايىن ەكەنىن بىلدىرگەن.
«التاي» جانە «شانحاي» بازارلارىندا جاڭعىرتۋ جۇمىستارى تولىق اياقتالعان. قازىر مۇندا ساۋدا ستاتسيونارلىق نىسانداردا جۇرگىزىلەدى.
ەركەبۇلان تاعاشوۆتىڭ ايتۋىنشا، بازارلاردى ستاتسيونارلىق ساۋدا فورماتىنا كوشىرۋدىڭ زاڭدا بەلگىلەنگەن مەرزىمى بيىل 1-قاڭتاردا اياقتالعان.
ەسكە سالايىق، بيىل شىلدە ايىندا استاناداعى «ۇلجان»، «التاي»، «سارىارقا»، «الاش» جانە «شارىن» بازارلارىن تەكسەرۋ كەزىندە زاڭ تالاپتارىنىڭ ساقتالماعانى انىقتالعان ەدى.