پوليتسيا دەپارتامەنتى باسپا ءسوز قىزمەتى حابارلاعانداي، وزىندىك قاۋىپسىزدىك دەپارتامەنتى جاۋاپتى لاۋازىمدى تۇلعالاردىڭ ءىس-ارەكەتىنە قىزمەتتىك تەكسەرۋ جۇرگىزدى. ونىڭ قورىتىندىسى بويىنشا ءتورت قىزمەتكەر جۇمىستان شىعارىلدى.
- قىزمەتكە نەمقۇرايلى قاراۋ فاكتىسى بويىنشا قىلمىستىق ءىس قوزعالدى. تەرگەۋ اياسىندا پوليتسيانىڭ بۇرىنعى ءتورت قىزمەتكەرى ۇستالدى، - دەپ حابارلادى باسپا ءسوز قىزمەتى.
سونىمەن قاتار بىرنەشە پوليتسيا قىزمەتكەرى لاۋازىمىنان بوساتىلدى. ولاردىڭ قاتارىندا اۋداندىق پوليتسيا باسقارمالارىنىڭ ەكى باستىعى، ولاردىڭ ورىنباسارلارى، سونداي-اق استانا قالالىق پوليتسيا دەپارتامەنتى باستىعىنىڭ ورىنباسارى بار.
قالالىق پ د باستىعى مەن ونىڭ تاعى ءبىر ورىنباسارى قاتاڭ تارتىپتىك جاۋاپكەرشىلىككە تارتىلدى.
وسى وقيعاعا قاتىستى كۇدىكتى ءىزىن سۋىتپاي ۇستالىپ، ۋاقىتشا ۇستاۋ يزولياتورىنا قامالدى. قىلمىستىق ءىستى تەرگەۋ جالعاسىپ جاتىر. جاسالعان قىلمىسى ءۇشىن ول قاتاڭ جازاعا تارتىلادى.
ەستەرىڭىزگە سالا كەتەيىك، 23-قىركۇيەك كۇنى كەشكە استانادا 30 جاستاعى ايەل پىشاق جاراقاتىنان قايتىس بولدى. پوليتسيانىڭ مالىمەتىنشە، كۇدىكتى - بۇرىنعى كۇيەۋى.
پوليتسيا سونىمەن قاتار كۇدىكتىنىڭ ىشكى ىستەر ورگاندارىنىڭ قىزمەتكەرى ەكەنى تۋرالى اقپاراتتى جوققا شىعاردى.