جوبا Maqsut Narikbayev University جانىنداعى حالىقارالىق جۋرناليستيكا مەكتەبىنىڭ بازاسىندا قازاقستان رەسپۋبليكاسى پرەزيدەنتىنىڭ تەلەراديوكەشەنىمەن بىرلەسىپ ۇيىمداستىرىلىپ وتىر.
جوبانىڭ اشىلۋ راسىمىنە ق ر پرەزيدەنتى تەلەراديوكەشەگى ديرەكتورىنىڭ ورىنباسارى ەركەجان كۇنتۋعان، Al Jazeera Media Institute ديرەكتورى ەمان ءال-امري، MNU باسقارما ءتوراعاسى تالعات ناريكبايەۆ، سونداي-اق ستۋدەنتتەر، لەكتورلار مەن شاقىرىلعان قوناقتار قاتىستى.
جاڭا ماۋسىم اياسىندا Al Jazeera Media Network ماماندارى قازىرگى جۋرناليستيكانىڭ نەگىزگى ماسەلەلەرى، حالىقارالىق كۇن ءتارتىبى، سيفرلىق مەديا جانە جاڭا بۋىننىڭ مازمۇندى، جاۋاپتى ءارى باسەكەگە قابىلەتتى اقپاراتتىق ورتانى قالىپتاستىرۋداعى ءرولى تۋرالى دارىستەر وتكىزەدى.
حالىقارالىق ءبىلىم بەرۋ جوباسى قازاقستاننىڭ مەديا سالاسى وكىلدەرى مەن Al Jazeera Media Network ماماندارى اراسىندا تاجىريبە الماسۋعا ارنالعان كاسىبي الاڭعا اينالىپ وتىر.
بيىلعى جوبا 28-قىركۇيەك پەن 2-قازان ارالىعىندا وتەدى. باعدارلاماعا جۋرناليستيكانىڭ وزەكتى باعىتتارى بويىنشا 7 ءبىلىم بەرۋ كۋرسى ەنگىزىلگەن. اتاپ ايتقاندا، دەرەكتەر جۋرناليستيكاسى، سيفرلىق ستوريتەللينگ، زەرتتەۋ جانە ءموبيلدى جۋرناليستيكا، فاكتچەكينگ پەن اقپاراتتى ۆەريفيكاتسيالاۋ، زاماناۋي دەرەكتى فيلم ءتۇسىرۋ جانە سۇحبات جۇرگىزۋ تەحنيكاسى قامتىلعان.
وقۋ باعدارلاماسىنا 130 دان استام باكالاۆريات ستۋدەنتى، 100 گە جۋىق مەديا سالاسىنىڭ قازىرگى مامانى، سونداي-اق ماگيسترانتتار، دوكتورانتتار جانە پروفەسسور-وقىتۋشىلار قۇرامى قاتىسادى.
جوبا اياسىنداعى وقۋ تەوريالىق جانە پراكتيكالىق ساباقتاردان تۇرادى. باعدارلاما سوڭىندا ستۋدەنتتەر ءار باعىت بويىنشا كۋرستىق جوبالارىن ازىرلەپ، قورعايدى. وقۋ ناتيجەسى بويىنشا قاتىسۋشىلارعا Al Jazeera Media Institute سەرتيفيكاتتارى تابىستالادى.
ايتا كەتەيىك، حالىقارالىق جۋرناليستيكا مەكتەبى 2023-جىلى قازاقستان رەسپۋبليكاسى پرەزيدەنتىنىڭ تەلەراديوكەشەنى مەن Maqsut Narikbayev University بىرلەسكەن جوباسى رەتىندە اشىلعان. مەكتەپتىڭ نەگىزگى ماقساتى - تالانتتى جاستاردى قولداۋ، ولاردىڭ كاسىبي بىلىكتىلىگىن ارتتىرۋ جانە قوعام مەن مەملەكەتتىڭ زاماناۋي كوممۋنيكاتسيالىق سۇرانىستارىنا جاۋاپ بەرە الاتىن بولاشاق جۋرناليستەر پۋلىن قالىپتاستىرۋ.
انىقتاما
قازاقستان رەسپۋبليكاسى پرەزيدەنتىنىڭ تەلەراديوكەشەنى - مەدياكونتەنتتى ءوندىرۋ جانە تاراتۋدىڭ بارلىق كەزەڭىن قامتيتىن قازاقستانداعى ءىرى ۆەرتيكالدى ينتەگراتسيالانعان مەدياكومپانيالاردىڭ ءبىرى.
كومپانيا قۇرامىنا قازاقستاندىق اۋديتورياعا ارنالعان Jibek Joly تەلەارناسى مەن اتتاس راديو، حالىقارالىق Silk Way, Silk Way Cinema, Silk Way Prime تەلەارنالارى، Kazinform حالىقارالىق اقپارات اگەنتتىگى، دەرەكتى كينو ورتالىعى جانە TRKLAB سيفرلىق ءبولىمى كىرەدى.
Al Jazeera تەلەارناسى 1996-جىلى كاتار ءامىرىنىڭ جارلىعىمەن قۇرىلعان. مەديا جەلى اراب جانە اعىلشىن تىلدەرىندە الەمنىڭ كوپتەگەن ەلدەرىنە حابار تاراتادى. كومپانيانىڭ الەم بويىنشا 50 دەن استام شەتەلدىك بيۋروسى بار. دەرەكتى كونتەنت Al Jazeera Documentary تەلەارناسىندا كورسەتىلەدى.