پوليتسيانىڭ مالىمەتىنشە، جەدەل-ىزدەستىرۋ شارالارى بارىسىندا پوليتسەيلەر ايەل باسقارعان كولىكتى توقتاتقان. كولىك سالونىن تەكسەرۋ كەزىندە جول سومكەسىنەن اق ءتۇستى ۇنتاق ءتارىزدى زات سالىنعان 20 وراما تابىلعان.
ساراپتاما ناتيجەسىندە ولاردىڭ قۇرامىندا مەفەدرون بارى انىقتالدى. جەكە ءتىنتۋ كەزىندە كۇدىكتىنىڭ وزىنەن دە وسىعان ۇقساس تاعى ءبىر وراما تاركىلەنگەن.
بۇدان بولەك، ايەل پوليتسياعا بۇعان دەيىن تاعى ءۇش وراما جاسىرىلعان ءۇش ورىندى كورسەتكەن. ول جەرلەردەن الىنعان زاتتاردىڭ دا مەفەدرون ەكەنى ساراپتامامەن راستالدى.
وسىلايشا، تاركىلەنگەن ەسىرتكىنىڭ جالپى سالماعى ءبىر كەلىدەن استى.
اتالعان فاكتى بويىنشا قىلمىستىق ءىس قوزعالىپ، قازىر تەرگەۋ جۇرگىزىلىپ جاتىر. پوليتسيا ەسىرتكىنى زاڭسىز ساقتاۋ، تاسىمالداۋ جانە وتكىزۋ قىلمىستىق جاۋاپكەرشىلىككە اكەپ سوعاتىنىن ەسكەرتتى.
ەسكە سالايىق، بۇعان دەيىن قازاقستاندا ەسىرتكى قىلمىسىنا قاتىسى بار 69 جاس ءوسپىرىم ۇستالعانىن حابارلاعان ەدىك.