بىلتىر مامىر ايىنان باستاپ 2026 -جىلدىڭ قاڭتارىنا دەيىنگى كەزەڭدە استانا قالاسىنىڭ تۇرعىنى Instagram الەۋمەتتىك جەلىسىندە الماتى قالاسىنان تومەن باعامەن پاتەرلەر ساتىپ الۋ، ولاردى جوندەۋ جانە كەيىننەن پايدامەن ساتۋ تۋرالى كورىنەۋ جالعان اقپارات ورنالاستىرعان.
وسى سحەمانى جۇزەگە اسىرۋ ءۇشىن ول ينۆەستورلاردى تارتىپ، ولار راسىمدەگەن تاۋارلىق كرەديتتەردى تولەۋگە جانە سالىنعان قاراجات سوماسىنىڭ %5-10- ى مولشەرىندە اي سايىن بونۋس بەرۋگە ۋادە ەتكەن.
باستاپقىدا تولەمدەر باسقا جابىرلەنۋشىلەردەن تۇسكەن قاراجات ەسەبىنەن جۇرگىزىلگەن. كەيىن تولەمدەر توقتاتىلىپ، ينۆەستورلار الدىنداعى مىندەتتەمەلەر ورىندالماعان. كەلتىرىلگەن جالپى زالال 155 ميلليون تەڭگەدەن استى.
پروكۋرور كۇدىكتىگە 6 جىل 8 اي مەرزىمگە باس بوستاندىعىنان ايىرۋ جازاسىن تاعايىنداۋدى سۇرادى. اقتاۋ قالاسىنىڭ سوتى بۇرىن شىعارعان ۇكىمدى ەسكەرە وتىرىپ، قىلمىستىق قۇقىق بۇزۋشىلىقتار جيىنتىعى بويىنشا تۇپكىلىكتى جازا بەلگىلەۋ ۇسىنىلدى. سونداي-اق پروكۋرور جازانىڭ ورىندالۋىن كەيىنگە قالدىرۋدى جانە جابىرلەنۋشىلەردىڭ ازاماتتىق تالاپتارىن قاناعاتتاندىرۋدى سۇرادى.
— ايىپتالۋشى ءوز كىناسىن ءىشىنارا مويىنداپ، پاتەرلەردى قايتا ساتۋمەن اينالىسۋدى كوزدەگەنىن، الايدا بارلىق ينۆەستورلارمەن ەسەپ ايىرىسا الماعانىن ءتۇسىندىردى. جابىرلەنۋشىلەر قاراجاتتى بەرۋ جانە كرەديتتەردى راسىمدەۋ ءمان-جايلارىن راستاپ، كرەديتتەر بويىنشا بەرەشەك وسى ۋاقىتقا دەيىن وتەلمەگەنىن كورسەتتى. ولار قاتاڭ جازا تاعايىنداۋدى جانە كەلتىرىلگەن زالالدى وتەۋدى سۇرادى، — دەلىنگەن اقپاراتتا.
قىلمىستىق كودەكستىڭ 190-بابى 4-بولىگىنىڭ 2-تارماعى مۇلكىن تاركىلەي وتىرىپ، 5 جىلدان 10 جىلعا دەيىنگى مەرزىمگە باس بوستاندىعىنان ايىرۋ جازاسىن كوزدەيدى.
سوت الاياقتىڭ بۇعان دەيىن دە وسىعان ۇقساس قىلمىستار ءۇشىن سوتتالعانىن ەسكەردى. الايدا وسى ءىس بويىنشا قىلمىستار اتالعان ۇكىمدەر شىعارىلعانعا دەيىن جاسالعان.
جازانى جەڭىلدەتەتىن ءمان-جاي رەتىندە سوتتالعان ايەلدىڭ اسىراۋىندا 4 كامەلەتكە تولماعان بالانىڭ بولۋى تانىلدى. جازانى اۋىرلاتاتىن ءمان-جايلار انىقتالعان جوق. جابىرلەنۋشىلەردىڭ سانىن، وتەلمەگەن زالالدىڭ اسا ءىرى مولشەرىن جانە جابىرلەنۋشىلەردىڭ پىكىرىن ەسكەرە وتىرىپ، سوت ايىپتالۋشىنى 6 جىل 6 اي مەرزىمگە باس بوستاندىعىنان ايىرۋ جازاسىن تاعايىندادى.
— اقتاۋ قالاسى سوتىنىڭ ۇكىمىن ەسكەرە وتىرىپ، قىلمىستىق قۇقىقبۇزۋشىلىقتار جيىنتىعى بويىنشا نەعۇرلىم جەڭىل جازانى نەعۇرلىم قاتاڭ جازاعا ءسىڭىرۋ جولىمەن تۇپكىلىكتى جازا 6 جىل 6 اي مەرزىمگە باس بوستاندىعىنان ايىرۋ بولىپ بەلگىلەندى، — دەلىنگەن اقپاراتتا.
قىلمىستىق كودەكستىڭ 74-بابىنىڭ 1-بولىگى نەگىزىندە سوتتالعان ايەلدىڭ اسىراۋىندا 4 كامەلەتكە تولماعان بالانىڭ بولۋىنا بايلانىستى جازانى ورىنداۋ ەكى جىل مەرزىمگە، ياعني 2028 -جىلدىڭ 20-قازانعا دەيىن كەيىنگە قالدىرىلدى.
جابىرلەنۋشىلەردىڭ ازاماتتىق تالاپتارى ءىشىنارا قاناعاتتاندىرىلدى. ۇكىم زاڭدى كۇشىنە ەنگەن جوق.