سونىمەن قاتار بۇل ىسكە پوليتسيا قىزمەتكەرلەرىنىڭ دە قاتىسى بارى انىقتالدى. لاۋازىمدىق وكىلەتتىكتەرىن تەرىس پايدالانۋ جانە دالەلدەمەلەردى بۇرمالاۋ دەرەكتەرى بويىنشا جەكە تەرگەۋ باستالدى. قازىرگى ۋاقىتتا ءىس بويىنشا 19 ادام كۇدىكتى دەپ تانىلىپ، ولاردىڭ توعىزى قاماۋعا الىندى. سونداي-اق كۇدىكتىلەردىڭ جالپى قۇنى 250 ميلليون تەڭگەدەن اساتىن مۇلكىنە تىيىم سالىندى.
تەرگەۋ مالىمەتتەرىنە سايكەس، «تولەندى» تۇرعىن ءۇي-قۇرىلىس كووپەراتيۆىن باسقارعان ا. بايجۇمانوۆ 1,5 مىڭ ۇلەسكەردىڭ 10 ملرد تەڭگەسىن جىمقىرۋدىڭ قىلمىستىق جولىن ۇيىمداستىرعان. وسى قىلمىسى ءۇشىن ول 2016 -جىلى 8 جىلعا باس بوستاندىعىنان ايىرىلعان بولاتىن. كەيىن استانا قالاسى اكىمدىگىنىڭ قاتىسۋىمەن تۇرعىن ۇيلەردىڭ قۇرىلىسى اياقتالدى. بۇل پاتەرلەردىڭ ءبىر بولىگى كوپبالالى وتباسىلارعا، جەتىم بالالارعا، مۇگەدەكتىگى بار ادامدارعا جانە الەۋمەتتىك جاعىنان وسال توپتاعى وزگە دە ازاماتتارعا بەرىلۋگە ءتيىس ەدى. الايدا باس بوستاندىعىنان ايىرۋ ورىندارىنان بوساپ شىققاننان كەيىن ا. بايجۇمانوۆ سىبايلاستارىمەن بىرگە اتالعان باسپانالاردى يەمدەنۋدىڭ جاڭا ايلاسىن ويلاستىرعان. ول ءۇشىن شىن مانىندە ۇلەسكەر بولماعان جانە پاتەر ساتىپ الماعان ازاماتتاردىڭ اتىنا كووپەراتيۆكە جارنا تولەۋ تۋرالى جالعان شارتتار جاسالىپ، قۇجاتتار وتكەن كۇنمەن راسىمدەلگەن.
وسى جالعان ۇلەسكەرلەردىڭ اتىنان قۇقىق قورعاۋ ورگاندارىنا الاياقتىق جاسالعانى تۋرالى ارىزدار بەرىلىپ، قىلمىستىق ىستەر قوزعالعان. قىلمىستىق توپ سوت شەشىمدەرىن پايدالانىپ، پاتەرلەردى ءوز اتتارىنا راسىمدەۋدى، كەيىن ولاردى وزگە ادامدارعا ساتىپ، تۇسكەن اقشانى ءوزارا ءبولىسۋدى كوزدەگەن. تەرگەۋ بارىسىندا بۇل قىلمىستىق ارەكەتكە 80-نەن استام جالعان ۇلەسكەردىڭ تارتىلعانى انىقتالدى. ولاردىڭ اتىنا 170 جىلجىمايتىن مۇلىك نىسانىن راسىمدەۋ جوسپارلانعان.
وسىلايشا، جالپى قۇنى 4,4 ميلليارد تەڭگەدەن اساتىن پاتەرلەردى زاڭسىز يەمدەنۋ ارەكەتىنىڭ جولى كەسىلدى. قىلمىستىق توپ مۇشەلەرىنىڭ ءارقايسىسىنا ناقتى مىندەت جۇكتەلگەن: ءبىرى جالعان ۇلەسكەرلەردى تاۋىپ، ولاردىڭ اتىنا قۇجاتتار راسىمدەسە، ەندى ءبىرى سول شارتتاردى وزگە ازاماتتارعا ساتىپ، قىلمىستىق ىستەردىڭ جۇرگىزىلۋىنە ىقپال ەتكەن. مۇنىڭ سوڭى كووپەراتيۆكە جارنا تولەۋ تۋرالى جالعان شارتتاردى ساتىپ العان ازاماتتارعا 400 ميلليون تەڭگەدەن استام شىعىن كەلتىرگەن. قارجىلىق مونيتورينگ اگەنتتىگى باس پروكۋراتۋرانىڭ ۇيلەستىرۋىمەن ۇلەستىك قۇرىلىسقا قاتىسۋ تۋرالى جالعان شارتتار ارقىلى پاتەرلەردى زاڭسىز يەمدەنۋ دەرەگى بويىنشا قىلمىستىق ءىستى تەرگەۋدى اياقتادى. سوتقا دەيىنگى تەرگەۋ اياقتالىپ، قىلمىستىق پروتسەسكە قاتىسۋشى تاراپتار ءىس ماتەريالدارىمەن تانىسۋعا كىرىستى. وزگە مالىمەتتەر قازاقستان رەسپۋبليكاسى قىلمىستىق- پروتسەستىك كودەكسىنىڭ 201-بابىنا سايكەس جاريا ەتىلمەيدى.