بۇنداي پىكىردى Skyway تۋروپەراتورىنىڭ جەتەكشىسى اسەم قوزباعاروۆا AIMAQ پودكاستىنىڭ جاڭا شىعارىلىمىندا ايتتى.
ساراپشىنىڭ ايتۋىنشا، كوپ جىل بويى قالاعا كەلەتىن تۋريستەردىڭ باسىم بولىگىن ىسكەرلىك كەزدەسۋلەر مەن ءتۇرلى ءىس-شارالارعا قاتىسۋشىلار قۇراعان. الايدا قازىر ساياحاتشىلاردىڭ قىزىعۋشىلىعى وزگەرىپ، استانانى ارنايى ارالاپ كورۋگە نيەتتى قوناقتار كوبەيىپ كەلەدى.
- قازىردىڭ وزىندە تۋريستەردىڭ قىزىعۋشىلىعى وزگەرىپ جاتقانىن بايقاپ وتىرمىز. قالانى ءوز كوزىمەن كورگىسى كەلەتىن ساياحاتشىلار كوبەيىپ كەلەدى. سەبەبى استانا ءوزىنىڭ ەرەكشە ساۋلەتىمەن شىنىمەن دە تاڭعالدىرادى، - دەدى اسەم قوزباعاروۆا.
بۇدان بولەك، تانىمال ونەر يەلەرىنىڭ كونتسەرتتەرى مەن ءتۇرلى سپورتتىق جارىستار دا تۋريستەردىڭ قىزىعۋشىلىعىن ارتتىرىپ وتىر. تۋروپەراتور جەتەكشىسىنىڭ ايتۋىنشا، مۇنداي ءىس-شارالارعا قازاقستان ازاماتتارىمەن قاتار، شەتەلدەن دە قوناقتار ارنايى كەلەدى.
جازعى جانە قىسقى استانا - ەكى ءتۇرلى تۋريستىك باعىت
قىسقى تۋريزم دە استانا ءۇشىن جاڭا مۇمكىندىكتەردىڭ بىرىنە اينالىپ كەلەدى. قىس مەزگىلىندە تۋريستەر سانى ازايعانىمەن، ساراپشى مۇنى قىسى قارسىز وتەتىن ەلدەردىڭ تۇرعىندارىنا ەلوردانى تانىستىرۋعا جاقسى مۇمكىندىك دەپ سانايدى.
- جازعى جانە قىسقى استانا - ەكى ءتۇرلى تۋريستىك باعىت. سوندىقتان ءبىز ەلوردانى جازدا دا، قىستا دا وزىندىك ەرەكشەلىگى بار ەكى بولەك باعىت رەتىندە تانىستىرىپ، ناسيحاتتاي الامىز، ياعني، تۋريستەر استاناعا جىلىنا ەكى رەت كەلىپ، ءار مەزگىلدە قالانىڭ وزگەشە كەلبەتىن تاماشالاي الادى، - دەيدى اسەم قوزباعاروۆا.
جاز مەزگىلىندە تۋريستەرگە قالانىڭ ساۋلەتىمەن، اشىق قوعامدىق كەڭىستىكتەرىمەن تانىسۋ، فەستيۆالدەر مەن سپورتتىق ءىس-شارالارعا قاتىسۋ ۇسىنىلادى. ال قىستا قار باسقان قالانىڭ كورىنىسى، ءتۇرلى ويىن-ساۋىق تۇرلەرى مەن مادەني باعدارلامالارعا باسىمدىق بەرىلەدى.
اسەم قوزباعاروۆانىڭ ايتۋىنشا، جاز مەزگىلىندە اتپەن سەرۋەندەۋ جانە اتپەن ۇيىمداستىرىلاتىن ەكسكۋرسيالارعا دا سۇرانىس ارتىپ كەلەدى. ويتكەنى شەتەلدىك ساياحاتشىلاردىڭ كوپشىلىگى قازاقستاندى جىلقى مادەنيەتىمەن بايلانىستىرادى. سوندىقتان بۇل باعىت ەلدىڭ تۋريستىك تارتىمدىلىعىن ارتتىراتىن قوسىمشا ارتىقشىلىق بولا الادى.
ايتا كەتەيىك، ىشكى تۋريزم 84,4 پايىزعا ءوستى.