ءا. زەينەلدىڭ ايتۋىنشا، 2025 -جىلعى 19-قاراشادا، ۇلدانا مىرزۋاندى جەرلەگەننەن كەيىن ونى مارقۇمنىڭ تۋعان اپكەسى اقنۇرمەن بىرگە استانا اكىمدىگىنە شاقىرعان. كەزدەسۋگە قالا اكىمى، ونىڭ ورىنباسارى جانە ءماسليحات دەپۋتاتى قاتىسقان.
وتباسىنا 20 ميلليون تەڭگە كولەمىندە قولما-قول اقشا بەرىلگەن. ادىلەتتىڭ ايتۋىنشا، اقشانى العانى تۋرالى ەشقانداي قولحات نەمەسە وزگە قۇجاتقا قول قويماعان.
جابىرلەنۋشىنىڭ ايتۋىنشا، كەيىن بۇل قاراجات بىرنەشە ماقساتقا جۇمسالعان. شامامەن 9,2 ميلليون تەڭگە اۆتوكولىك نەسيەسىن وتەۋگە باعىتتالعان. بانكتىڭ الدىن الا مالىمەتى بويىنشا، تاعى 4,3 ميلليون تەڭگە ۇلدانانىڭ نەسيە بويىنشا مىندەتتەمەلەرىن وتەۋگە جۇمسالعان. بۇدان بولەك، 4,5 ميلليون تەڭگە ونىڭ اناسىنا بەرىلگەن. قالعان قاراجات ءتۇرلى شىعىندارعا، سونىڭ ىشىندە قايىرىمدىلىققا جۇمسالعان.
سونىمەن بىرگە، سوت وتىرىسىندا ادىلەت زەينەلدىڭ جابىرلەنۋشى مارتەبەسىنەن باس تارتقانى دا بەلگىلى بولدى. سۋديا ونىڭ مۇنداي شەشىمگە نە سەبەپ بولعانىن سۇرادى.
ءا. زەينەل قايعىلى وقيعادان كەيىن جاڭا ءومىر باستاعانىن جانە بۇدان بىلاي ۇلدانانىڭ مۇددەسىن ونىڭ اناسى قورعاعانىن قالايتىنىن جەتكىزدى.
- مەن جاڭا ءومىر باستادىم، ۇيلەندىم. بۇدان ءارى ۇلدانانىڭ مۇددەسىن ونىڭ اناسى قورعاعانىن قالايمىن. ءوزى دە بۇعان دەيىن ب ا ق-قا بەرگەن سۇحباتىندا دا جابىرلەنۋشى مارتەبەسىنەن باس تارتۋىمدى ايتقان بولاتىن، - دەپ ءتۇسىندىردى ادىلەت زەينەل.
سۋديا ادىلەتتىڭ جابىرلەنۋشى مارتەبەسىنەن ءوز ەركىمەن باس تارتقان-باس تارتپاعانىن دا ناقتىلادى. جابىرلەنۋشى بۇل مارتەبەدە ءوز ەركىمەن بولعانىن جانە ودان باس تارتۋدى جوسپارلاماعانىن راستادى.