اۋەجاي ماماندارىنىڭ ايتۋىنشا، قۇستار كوبىنە تاڭعى 03:00-11:00 جانە 15:00-23:00 ارالىعىندا بەلسەندى بولادى. وسى ۋاقىتتا ورنيتولوگتار اەرودروم مەن ونىڭ ماڭىن باقىلاپ، قۇستاردىڭ قوزعالىس باعىتىن قاداعالايدى.
- اەرودروم ماڭىندا شاعالا، قارعا، كوگەرشىن، ساۋىسقان جانە كۇيكەنتاي جيى كەزدەسەدى. اسىرەسە، كۇز مەزگىلىندە شاعالالارعا ەرەكشە نازار اۋدارىلادى. ولار كول مەن قاتتى تۇرمىستىق قالدىقتار پوليگونى اراسىندا توپ-توبىمەن ۇشادى. كەيبىر باعىتتارى ۇشاقتار جۇرەتىن ايماقتارعا جاقىن بولعاندىقتان، ماماندار ولاردىڭ كۇندەلىكتى قوزعالىسىن تۇراقتى باقىلاۋدا ۇستايدى، - دەلىنگەن حابارلامادا.
قۇستاردى اەرودرومنان الىستاتۋ ءۇشىن ماماندار بيواكۋستيكالىق قوندىرعىلار، مەحانيكالىق ۇركىتكىشتەر، شۋ شىعاراتىن تاپانشالار، لازەرلىك جانە وپتيكالىق قۇرىلعىلاردى قولدانادى. ارنايى اۆتوكولىك تە موبيلدى بيواكۋستيكالىق قوندىرعىمەن جابدىقتالعان.
ورنيتولوگتار تەك قۇستاردى ۇركىتىپ قانا قويماي، ولاردىڭ قايدان كەلەتىنىن، قايدا ۇشاتىنىن جانە قوزعالىس باعىتىنىڭ ماۋسىم مەن تاۋلىك ۋاقىتىنا قاراي قالاي وزگەرەتىنىن زەرتتەيدى. بۇل مالىمەتتەر ىقتيمال قاۋىپتى الدىن الا انىقتاپ، قاجەتتى شارالاردى دەر كەزىندە قابىلداۋعا مۇمكىندىك بەرەدى.
ماماندار ءۇشىن ساۋىردەن قازانعا دەيىنگى كەزەڭ ەڭ قاۋىرت ۋاقىت سانالادى. وسى ارالىقتا قۇستاردىڭ بەلسەندىلىگى ارتىپ، اەرودروم ماڭىندا جيى بايقالادى.
ەسكە سالايىق، بۇعان دەيىن 2026-جىلعى 24-قاڭتاردا FlyArystan اۋەكومپانياسىنىڭ الماتى - ورال باعىتى بويىنشا FS7167 رەيسى ۇشاق قۇستارمەن سوقتىعىسقانىن حابارلاعان ەدىك.