18 جاستاعى قازاقستاندىق فۋتبولشى ءبىر ايدان اسا ۋاقىت بويى الاڭعا شىقپادى، بۇعان دەيىن 3-قىركۇيەكتە ويناعان بولاتىن. بۇل ونىڭ «ميدلسبروعا» قارسى ويىندا العان جاراقاتىنا بايلانىستى بولدى.
كەشە «بەرنلي» جاتتىعۋ جيىنىنان بىرنەشە سۋرەت جاريالادى، وندا داستان ساتبايەۆ توپپەن بىرگە جاتتىعىپ جۇرگەنى كورىنەدى. باسپا ءسوز ماسليحاتىندا «بەرنلي» باپكەرى قازاقستاندىق فۋتبولشى ساپقا ورالعانىن راستادى.
«داستان ورالدى، ول تولىق دەڭگەيدە جاتتىعىپ جاتىر جانە ماتچقا قاتىسۋعا دايىن بولادى»، - دەدى مامان.
ايتا كەتەيىك، 18 جاستاعى فۋتبولشىنىڭ «چەلسيمەن» ۇزاق مەرزىمدى كەلىسىمشارتى بار، ءبىراق قازىر ول «بەرنلي» ساپىندا جالداۋ شارتىمەن ونەر كورسەتىپ ءجۇر.