اسسامبلەيا بىرلىك پەن تەڭدىكتىڭ، تۇراقتىلىق پەن تىنىشتىقتىڭ سيمۆولىنا اينالدى - پرەزيدەنت
استانا. KAZINFORM - اسسامبلەيا بىرلىك پەن تەڭدىكتىڭ، تۇراقتىلىق پەن تىنىشتىقتىڭ سيمۆولىنا اينالدى. بۇل تۋرالى قازاقستان حالقى اسسامبلەياسىنىڭ سەسسياسىندا مەملەكەت باسشىسى قاسىم-جومارت توقايەۆ ايتتى.
- بۇگىنگى باسقوسۋدىڭ تاريحي ءمان-ماڭىزى ايرىقشا. بيىل قازاقستان حالقى اسسامبلەياسىنىڭ قۇرىلعانىنا 30 جىل تولىپ وتىر. بارشاڭىزعا قۇتتى بولسىن! بۇل - بۇكىل قازاقستان ءۇشىن ايتۋلى وقيعا. وسى ۋاقىت ىشىندە اسسامبلەيا قوعامداعى تۇراقتىلىق پەن كەلىسىمدى نىعايتۋعا ولشەۋسىز ۇلەس قوستى. ەلىمىزدەگى بىرلىك پەن تەڭدىكتىڭ، تۇراقتىلىق پەن تىنىشتىقتىڭ سيمۆولىنا اينالدى. ەتنوسارالىق قاتىناس سالاسىنداعى تەڭدەسسىز قوعامدىق ينستيتۋت رەتىندە تانىلدى. سونىڭ ارقاسىندا قازاقستاندا بەيبىتشىلىك پەن كەلىسىمنىڭ قايتالانباس ۇلگىسى قالىپتاستى. اسسامبلەيا تاريحى ەلىمىزدىڭ ەگەمەندىك جىلناماسىمەن تىعىز استاسىپ جاتىر. ۇيىم 1995-جىلى قازاقستاننىڭ تۇڭعىش پرەزيدەنتى نۇرسۇلتان نازاربايەۆتىڭ باستاماسىمەن قۇرىلعانىن بىلەسىزدەر. بۇل باستاما قازاق مەملەكەتتىلىگى قالىپتاسىپ جاتقان قيىن كەزەڭدە تەرەڭ ساياسي مانگە يە بولدى، - دەدى مەملەكەت باسشىسى.
پرەزيدەنت كونسۋلتاتيۆتىك-كەڭەستىك ورگان رەتىندە جاساقتالعان اسسامبلەياعا 2007 -جىلى كونستيتۋتسيالىق مارتەبە بەرىلىپ، ۇيىم جالپى ۇلتتىق بىرلىكتىڭ نەگىزگى مودەلىنە اينالعانىن ايتتى.
- ەلىمىزدە سوڭعى جىلدارى اتقارىلعان اۋقىمدى وزگەرىستەردىڭ ارقاسىندا اسسامبلەيا قىزمەتى جاسامپازدىقتىڭ جاڭا سيپاتىنا كوتەرىلدى. سەناتتىڭ بەس دەپۋتاتىن اسسامبلەيا كەڭەسىنىڭ ۇسىنىسىمەن پرەزيدەنت تاعايىندايدى. بۇل قادام زاڭنامالىق دەڭگەيدە بارلىق ەتنوستىڭ مۇددەسىن قورعاۋ مۇمكىندىگىن ەداۋىر ارتتىردى. وعان قوسا، قازاقستان پارلامەنتاريزمى تاريحىندا العاش رەت «ءبىر ەل - ءبىر مۇددە» اتتى پالاتاارالىق دەپۋتاتتار توبى قۇرىلدى. بۇل توپ قوعامدىق كەلىسىمدى نىعايتۋ ماسەلەلەرىمەن اينالىسادى. قازىر مەملەكەتتىك ورگاندار تۇگەل اسسامبلەيا جۇمىسىنا اتسالىسادى. مينيسترلىكتەردەن، وبلىس اكىمدىكتەرى مەن بارلىق دەڭگەيدەگى ءماسليحاتتاردان باستاپ اۋىل اكىمدىكتەرىنە دەيىن ودان شەت قالمايدى، - دەدى قاسىم-جومارت توقايەۆ.