اسقار جۇمادىلدايەۆ، اقىلبەك كۇرىشبايەۆ، سەرىك اقشولاقوۆ - ۇ ع ا قۇرامىنا جاڭادان 9 عالىم ەندى
الماتى. KAZINFORM - ق ر پرەزيدەنتى جانىنداعى ۇلتتىق عىلىم اكادەمياسىنىڭ قۇرامىنا جاڭادان توعىز عالىم ەندى.
اكادەميانىڭ جاڭا مۇشەلەرىن سايلاۋ ق ر عىلىم جانە جوعارى ءبىلىم مينيسترلىگى بەكىتكەن قاعيدالارعا سايكەس، ەلدىڭ عىلىمي ۇيىمدارى مەن جوعارى وقۋ ورىندارى ۇسىنعان ۇمىتكەرلەر اراسىنان سايلاندى.
قازاقستان رەسپۋبليكاسى پرەزيدەنتىنىڭ جانىنداعى ۇلتتىق عىلىم اكادەمياسىنىڭ باسشىسى اقىلبەك كۇرىشبايەۆتىڭ سوزىنشە، ەڭ الدىمەن، قولدانىستاعى زاڭنىڭ اياسىندا ق ر ۇكىمەتىنىڭ شەشىمىنە سايكەس قۇرىلعان وتپەلى ءتورالقا ءۇش اكادەميكتى سايلادى.
«بۇدان ءارى، قازاقستان رەسپۋبليكاسى عىلىم جانە جوعارى ءبىلىم مينيسترلىگى بەكىتكەن اكادەميكتەردى سايلاۋ قاعيدالارىنا سايكەس، ەلدىڭ عىلىمي ۇيىمدارى مەن جوعارى وقۋ ورىندارى ۇسىنعان ۇمىتكەرلەر اراسىنان ءۇش كەزەڭدىك سايلاۋ وتكىزىلدى. الدىمەن ۇسىنىلعان قۇجاتتاردىڭ تولىقتىعى جانە ۇمىتكەرلەردىڭ بەلگىلەنگەن كريتەرييلەر مەن تالاپتارعا سايكەستىگى تەكسەرىلدى. كەيىن ساراپتاما كوميسسياسى ءاربىر ۇمىتكەردىڭ ساپالىق جانە ساندىق كورسەتكىشتەرى بويىنشا قورىتىندى جاسادى. ءۇشىنشى كەزەڭدە عىلىم اكادەمياسىنىڭ ءتورالقاسى ءاربىر ۇمىتكەردىڭ باعدارلاماسىنىڭ وزەكتىلىگىن، جاڭاشىلدىق دەڭگەيىن، تيىمدىلىگىن، نىسانالى كورسەتكىشتەرگە قول جەتكىزۋى مەن ونىڭ رەسۋرستىق قامتاماسىز ەتىلۋىن تىڭدادى»، - دەپ ءتۇسىندىردى اقىلبەك كۇرىشبايەۆ.
ناتيجەسىندە ۇعا قۇرامىنا عىلىمدا ەرەكشە جەتىستىكتەرى بار توعىز عالىم ەندى.
اكادەميك اتانعان 9 ادامنىڭ ىشىندە بەلگىلى ماتەماتيك اسقار جۇمادىلدايەۆ، قازاق نەيروحيرۋرگتارى اسسوتسياتسياسىنىڭ پرەزيدەنتى سەرىك اقشولاقوۆ، «PERSONA» حالىقارالىق كلينيكالىق رەپرودۋكتولوگيا ورتالىعىنىڭ جەتەكشىسى ۆياچەسلاۆ لوكشين، «نازاربايەۆ ۋنيۆەرسيتەتى» د ب ب ۇ قاۋىمداستىرىلعان پروفەسسورى سۇراعان دوربەتحان، ەنەرگەتيكا مينيسترلىگىنىڭ «يادرولىق فيزيكا ينستيتۋتى» استانا فيليالىنىڭ ديرەكتورى ماكسيم زدوروۆەتس، ءال-فارابي اتىنداعى قازاق ۇلتتىق ۋنيۆەرسيتەتىنىڭ پروفەسسورى تىلەكقابىل رامازانوۆ، «وسىمدىكتەر بيولوگياسى جانە بيوتەحنولوگياسى ينستيتۋتى» ش ج ق ر م ك مولەكۋلالىق گەنەتيكا زەرتحاناسىنىڭ مەڭگەرۋشىسى ەرلان تۇرىسپەكوۆ، «نازاربايەۆ ۋنيۆەرسيتەتى» د ب ب ۇ ۆيتسە-پرەزيدەنتى دارحان ءبىلالوۆ، قازاقستان رەسپۋبليكاسى پرەزيدەنتىنىڭ جانىنداعى قازاقستان رەسپۋبليكاسى ۇلتتىق عىلىم اكادەمياسىنىڭ باسشىسى اقىلبەك كۇرىشبايەۆ بار.
ۇلتتىق عىلىم اكادەمياسىنىڭ اكادەميكتەرىن سايلاۋدىڭ كەلەسى كەزەڭى الداعى ايلاردا وتەدى.
«ساراپتاما ناتيجەلەرى بويىنشا ەڭ كوپ بالل جيناعان، باعدارلامانى قورعاۋ ناتيجەلەرى بويىنشا ەڭ جوعارى باعالاۋ كورسەتكىشىنە يە بولعان جانە اكادەميكتەردىڭ جالپى جينالىسىنا قاتىسۋشىلاردىڭ جاسىرىن داۋىس بەرۋى ارقىلى جالپى سانىنىڭ كەمىندە ۇشتەن ەكىسى داۋىس بەرگەن ۇمىتكەرلەر عانا اكادەميكتەر بولىپ سايلاندى»، - دەدى اقىلبەك كۇرىشبايەۆ.