اسقار اقايەۆ پارلامەنتتەن وزىنە ەكس-پرەزيدەنت مارتەبەسىن قايتارۋدى سۇرادى

استانا. قازاقپارات - قىرعىز رەسپۋبليكاسىنىڭ بۇرىنعى باسشىسى بۇگىندە رەسەيدە تۇرادى. قىرعىزستاندى 1990-2005 -جىلدارى باسقارعان اسقار اقايەۆ ەلدىڭ پارلامەنتى - جوگوركۋ كەنەشتەن وزىنە ەكس-پرەزيدەنت مارتەبەسىن قايتارۋدى ءوتىنىپ حات جازدى.

بۇل اقپاراتتى پارلامەنتتىڭ باسپا ءسوز قىزمەتى راستادى، دەپ حابارلادى 24.kg.

بۇعان دەيىن باسپا سوزدە قىرعىز دەپۋتاتى شولپان سۇلتانبەكوۆا اسقار اقايەۆتان وسى مازمۇندا حات تۇسكەنىن تۋرالى ايتقانى تۋرالى اقپارات تاراعان بولاتىن.

ونىڭ ايتۋىنشا، بۇل ماسەلە بىردەن كۇن تارتىبىنە ەنگىزىلمەيدى. الدىمەن ماسەلەنى پارلامەنت فراكسيالارى، ولاردىڭ كوشباسشىلارى مەن دەپۋتاتتارى تالقىلاۋى ءتيىس.

ەسكە سالايىق، اسقار اقايەۆ 1990-2005 -جىلدارى قىرعىزستان پرەزيدەنتى بولىپ قىزمەت اتقاردى. 2005 -جىلى ەلدە بولعان «قىزعالداق توڭكەرىسىنەن» كەيىن اقايەۆ پرەزيدەنت وتستاۆكاعا كەتىپ، كەيىن رەسەيگە كوشىپ كەتتى. رەسەيدە ول ماسكەۋ مەملەكەتتىك ۋنيۆەرسيتەتىندە پروفەسسور، رەسەي عىلىم اكادەمياسى ءتورالقاسىنىڭ باعدارلاما ۇيلەستىرۋشىسى بولىپ قىزمەت ەتتى.