اسكەري سوت تۇندە قىدىرىپ جۇرگەن داۋلەت تۇرلىحانوۆتىڭ ۇلىنا قاتىستى جاعدايدى ءتۇسىندىردى

الماتى. KAZINFORM - الماتى گارنيزونىنىڭ اسكەري سوتى ق ر پارلامەنتى ءماجىلىسىنىڭ دەپۋتاتى داۋلەت تۇرلىحانوۆتىڭ ۇلى نۇراسىل بولاتقا قاتىستى ءىستىڭ ءمان-جايىن ءتۇسىندىردى.

ۆەدومستۆودان اتاپ وتكەندەي، نۇراسىل بولاتقا قاتىستى سوت اكتىسى ونىڭ تىركەلگەن جەرى بويىنشا استانا قالاسىنىڭ قىلمىستىق-اتقارۋ جۇيەسىنىڭ دەپارتامەنتىنە جولداندى.

«استانا قالاسىنىڭ بايقوڭىر اۋدانى بويىنشا پروباتسيا قىزمەتىنىڭ حاتىمەن سوتتالۋشىنىڭ مەكەنجايى ۇكىمدەگى تۇرعىلىقتى جەرىمەن سايكەس كەلمەۋىنە بايلانىستى ماتەريال ورىندالماي قايتارىلعان. وسىدان كەيىن، سوت سوتتالۋشىنىڭ ناقتى تۇرعىلىقتى جەرىن انىقتاۋ بويىنشا ءىس-شارالار جۇرگىزدى، ويتكەنى ونىڭ دەرەكتەرىن سۇراعان كەزدە ەكى قالادا ورنالاسقان ەكى مەكەنجايى كورسەتىلگەن. ق ر اسكەري سوتىنىڭ دەپارتامەنتى اتالعان ءىس جۇرگىزۋدىڭ ۇزاقتىعىنىڭ سەبەپتەرىن انىقتاۋ بويىنشا تەكسەرۋ جۇرگىزۋدە»، - دەپ اتاپ ءوتتى اسكەري سوتتان.

قازىر ءىس بويىنشا سوت اكتىسى سوتتالعاننىڭ الماتى جانە استانا قالالارىنداعى تۇراقتى جانە ۋاقىتشا تىركەۋ ورىندارى بويىنشا پروباتسيا قىزمەتىنە جىبەرىلدى.

وسىعان دەيىن الەۋمەتتىك جەلىدە ءماجىلىس دەپۋتاتى داۋلەت تۇرلىحانوۆتىڭ بوستاندىعى شەكتەلگەن ۇلى نۇراسىل بولاتتىڭ تۇنگى ۋاقىتتا ەمىن-ەركىن جۇرگەن ۆيدەوسى تاراعانى تۋرالى جازعان ەدىك.

ەسكە سالا كەتەيىك، 2023 -جىلى اقپاندا نۇراسىل بولات الماتىدا زاڭگەر اننا دميتريەۆيچ پەن ونىڭ كۇيەۋى ولەگ چەرنوۆتى سوققىعا جىققان ەدى.

كەيىن سپورت قايراتكەرى داۋلەت تۇرلىحانوۆ بالاسىنىڭ بۇزاقىلىق ارەكەتىنە بايلانىستى پىكىر ءبىلدىردى.

ودان بولەك، داۋلەت تۇرلىحانوۆ ۇلىنىڭ ىسىنە ارالاسپايتىنىن ايتتى.

ال، وتكەن جىلى 2-شىلدە كۇنى ول مەرزىمدى اسكەري بورىشىن وتەپ جاتقان جەرى - قونايەۆ گارنيزونى اسكەري بولىمدەرىنىڭ بىرىنەن قاشىپ كەتكەن بولاتىن.

كەيىن كوپ وتپەي تابىلىپ، قىزمەت اتقاراتىن ورنىنا جەتكىزىلدى.

الماتى گارنيزونى ءبولىم باستىعىنىڭ بۇيرىعىنا باعىنباعانى جانە ورىنداماعانى ءۇشىن اكىمشىلىك جاۋاپكەرشىلىككە تارتىلدى.

2023 -جىلى 9-قازاندا داۋلەت تۇرلىحانوۆتىڭ ۇلىنا سوت ۇكىمى شىقتى.

پروكۋرور سوتتالۋشى ب-عا 1 جىل 6 اي باس بوستاندىعىن شەكتەۋ تۇرىندە جازا تاعايىنداۋدى سۇرادى.

بيىل مامىردا جوعارعى سوت داۋلەت تۇرلىحانوۆتىڭ ۇلىنا كەسىلگەن ۇكىمدى وزگەرتتى. سودان سوڭ داۋلەت تۇرلىحانوۆ ۇلىنىڭ سوت ۇكىمىنە قاتىستى پىكىر ءبىلدىردى.

اۆتور
الما مۇقانوۆا