اسكەردەگى بالاڭىز اقشا سۇراسا بەرمەڭىز - ءمينيستردىڭ ورىنباسارى

استانا. KAZINFORM - قورعانىس ءمينيسترىنىڭ تاربيە جانە يدەولوگيالىق جۇمىس جونىندەگى ورىنباسارى، گەنەرال-مايور شايح-حاسان جازىقبايەۆ قازاقستاندىقتاردى اسكەردەگى بالالارىنا اقشا بەرمەۋگە شاقىردى.

ونىڭ ايتۋىنشا، مەرزىمدى اسكەري قىزمەتشىلەر اتا-اناسىنان 3-2 مىڭ تەڭگە سۇرايتىن جاعدايلار بولادى.

«ءبىراق ونىڭ ءبارىن سول جەردەگى وفيتسەر نەمەسە سەرجانت الدىرىپ جاتىر دەپ ويلاۋ دۇرىس ەمەس دەپ ويلايمىن. ءيا، بىزدە ءبىر جاعداي بولعان. ءبىر وفيتسەر اسكەريدەن 3 مىڭ تەڭگە العان. قازىر سول ارەكەتى ءۇشىن وفيتسەر تەرگەۋ يزولياتورىندا وتىر. تەرگەۋ بىتكەن سوڭ قىلمىستىق كودەكس بويىنشا جاۋاپقا تارتىلادى.

جالپى اسكەرلەردەگى سارباز اتا-اناسىنان 2-3 مىڭ تەڭگە سۇراۋىنا كەلسەك، 18-19 جاستاعى جىگىت دۇكەننەن زاتتاردى ساتىپ العىسى كەلەدى. ولار اسكەري ءبولىمنىڭ جانىنداعى دۇكەندەردەن زاتتاردى ساتىپ الا الادى. مىنە، وسىدان اتا-انا بىرەۋ بالامنان اقشا سۇراپ جاتىر دەگەن وي تۋىندايدى»، - دەدى شايح-حاسان جازىقبايەۆ.

ءمينيستردىڭ ورىنباسارى اسكەردەگى ساربازدارعا اقشا بەرمەۋگە شاقىردى.

«ءاربىر مەرزىمدى اسكەري قىزمەتشىنىڭ كيىمى دە، تاماعى دا ءبارى بار. ەگەر اقشا سۇرايتىن بولسا، ونى بەرىپ كەرەك ەمەس. وزىنە كەرەك زاتتاردى ءوز جالاقىسىنا الادى. ەگەر (اقشا) سۇراۋ تاعى كوبەيىپ جاتسا، بارىڭىزدە سول اسكەري ءبولىمنىڭ كومانديرلەرىنىڭ، اسكەري پوليتسيانىڭ تەلەفون نومىرلەرى بار. بىردەن سول جەرگە حابار بەرىڭىزدەر»، - دەدى قورعانىس ءمينيسترىنىڭ وكىلى.