اسكەرگە كوشەدەن ەرىكسىز الىپ كەتسە، سوتقا بەرۋگە بولا ما - مينيسترلىك جاۋابى
استانا. KAZINFORM - قورعانىس ءمينيسترىنىڭ ءبىرىنشى ورىنباسارى - قازاقستان رەسپۋبليكاسى قارۋلى كۇشتەرى باس شتابىنىڭ باستىعى سۇلتان قامەلەتدينوۆ جاستاردىڭ وتان الدىنداعى بورىشىن وتەۋگە قاتىستى پىكىرىن ءبىلدىردى.
«ءبىز قۇقىقتىق مەملەكەت قۇرۋ تۋرالى ايتىپ وتىرمىز، زاڭ بار جانە بارلىق ازامات ونى ورىنداۋعا مىندەتتى. ناقتى ايتقاندا، كونستيتۋتسيانىڭ 36-بابىنا سايكەس، وتان الدىنداعى مىندەتتى وتەۋ - پارىز. ايتالىق، ازامات سالىق تولەمەسە جاۋاپقا تارتىلادى، سوندىقتان اسكەري مىندەتتى وتەۋ ماسەلەسىنە كەلگەندە قوس ستاندارت بولماۋى كەرەك. زاڭ قاتال، ءبىراق ونى ورىنداۋ قاجەت»، - دەدى سۇلتان قامەلەتدينوۆ ءماجىلىستىڭ جالپى وتىرىسى بارىسىندا.
سونداي-اق ب ا ق وكىلدەرى ءمينيستردىڭ ءبىرىنشى ورىنباسارىنا جاستاردى اسكەرگە كوشەدەن ەرىكسىز الىپ كەتۋگە قاتىستى ساۋال قويدى.
«ءسىزدىڭ نە ايتىپ تۇرعانىڭىزدى بىلمەيمىن. بىزدە ءبىر قۇجات بار - اسكەرگە شاقىرۋ قاعازى. سىزدە ناقتى فاكتى بار ما؟ سوعان جۇگىنەيىك. ءبىز قۇقىقتىق مەملەكەت قۇرىپ جاتىرمىز، ەگەر ول ونى زاڭسىز دەپ ساناسا، سوتقا جۇگىنسىن»، - دەپ ءتۇسىندىردى ءمينيستردىڭ ورىنباسارى.
تاياۋدا عانا قورعانىس مينيسترلىگىنىڭ وكىلى جاستاردى اسكەرگە كوشەدەن نەمەسە جۇمىس ورنىنان الىپ كەتۋگە قاتىستى تۇسىنىك بەرگەن ەدى. ولاردىڭ ايتۋىنشا، اسكەرگە كوشەدەن الىپ كەتۋ تۋرالى كوبىنەسە ب ا ق جانە الەۋمەتتىك جەلىلەردە تارايدى.