اسكەرگە شاقىرىلۋشىلاردى ىرىكتەۋ قالاي جۇرگىزىلىپ جاتىر

استانا. KAZINFORM - قورعانىس ءمينيسترىنىڭ تاربيە جانە يدەولوگيالىق جۇمىس جونىندەگى ورىنباسارى، گەنەرال-مايور اسقار مۇستابەكوۆ استانادا اسكەرگە شاقىرىلۋشىلاردى ىرىكتەۋ پروتسەسىن جانە ولارعا جاسالعان جاعدايدى تەكسەردى.

اسكەرگە شاقىرۋ ناۋقانىنىڭ قىزعان شاعىندا وتكەن تەكسەرىس بارىسىندا ەلوردالىق جيناۋ پۋنكتىندەگى جۇمىس بارىسى قارالدى. نەگىزگى نازار سيفرلىق شەشىمدەرگە اۋدارىلدى.

اتاپ ايتقاندا، «Smart-ۆوەنكومات» جانە «ە-مەدوسموتر» جوبالارى راسىمدەردى جەدەلدەتۋگە، ادام فاكتورىن ازايتۋعا جانە شاقىرۋ پروتسەسىنىڭ اشىقتىعىن قامتاماسىز ەتۋگە مۇمكىندىك بەرەتىنى ايتىلدى.

قورعانىس ىستەرى جونىندەگى دەپارتامەنت، اكىمدىك جانە ارداگەرلىك ۇيىمدار وكىلدەرىنىڭ قاتىسۋىمەن اسكەردى جاساقتاۋ جانە قۇرىلىمداردىڭ ءوزارا ءىس-قيمىلى ماسەلەلەرى تالقىلاندى. بۇل ءتاسىل ءاربىر شاقىرىلۋشى ءۇشىن جۇيەلى ءارى ناقتى ۇيىمداستىرىلعان پروتسەستى قامتاماسىز ەتەدى.

تەكسەرۋ بارىسىندا شاقىرىلۋشىلاردىڭ وزدەرىنە دە ەرەكشە نازار اۋدارىلدى. اشىق اڭگىمە كەزىندە گەنەرال-مايور ولاردىڭ كوڭىل-كۇيى، تۇرمىس جاعدايى جانە قىزمەتكە دايىندىعى تۋرالى سۇرادى.

سونداي-اق جاستارعا «سروچنيك 2.0» باعدارلاماسىنىڭ مۇمكىندىكتەرى تانىستىرىلىپ، ونىڭ اسكەري قىزمەتتەن كەيىن ەلىمىزدىڭ جەتەكشى جوعارى وقۋ ورىندارىنا تۇسۋگە جول اشاتىنى ءتۇسىندىرىلدى.

- توعىزىنشى سىنىپتان كەيىن اسكەري كوللەدجگە تۇسكىم كەلدى، ءبىراق مۇمكىندىك بولمادى. ۋنيۆەرسيتەتتى بىتىرگەن سوڭ اسكەرگە بارۋعا ناقتى شەشىم قابىلدادىم. قازىر مەديتسينالىق تەكسەرۋدەن ءوتىپ، قۇجاتتارىمدى جيناپ ءجۇرمىن، - دەدى اسكەرگە شاقىرىلۋشى التاير ساكەن.

تەكسەرۋ بارىسىندا ورنالاستىرۋ جاعدايى، تاماقتاندىرۋدىڭ ۇيىمداستىرىلۋى جانە مەديتسينالىق كوميسسيانىڭ جۇمىسى دا باعالاندى. كابينەتتەردىڭ جابدىقتالۋى مەن تەكسەرىستەردىڭ ساپاسىنا ەرەكشە نازار اۋدارىلدى.

- استانانىڭ جيناۋ پۋنكتىندەگى بارلىق پروتسەستەر قاجەتتى دەڭگەيدە ۇيىمداستىرىلعان. مۇندا اشىقتىقتى قامتاماسىز ەتەتىن جانە شاقىرۋ ناۋقانىنىڭ تيىمدىلىگىن ارتتىراتىن زاماناۋي تسيفرلىق شەشىمدەر قولدانىلىپ جاتىر. شاقىرىلۋشىلار ءۇشىن بارلىق جاعداي جاسالعان، - دەپ قورىتىندىلادى اسقار مۇستابەكوۆ.

سونىمەن قاتار مەملەكەتتىك ورگاندار مەن قوعام وكىلدەرىمەن وتكەن كەزدەسۋدە گەنەرال-مايور شاقىرىلۋشىلارعا مورالدىق قولداۋ كورسەتۋدىڭ ماڭىزىن اتاپ ءوتتى.

ونىڭ ايتۋىنشا، ارداگەرلەردىڭ قاتىسۋى جانە كۇشتىك قۇرىلىمدارمەن ءوزارا ءىس-قيمىل جاستاردىڭ اسكەري قىزمەتتىڭ العاشقى كەزەڭىنە سەنىمدى بەيىمدەلۋىنە جانە ونىڭ ماڭىزىن تۇسىنۋىنە ىقپال ەتەدى.

ايتا كەتەيىك، بۇل ماۋسىمدا شىمكەنتتەن 1200دەن استام ازامات اسكەرگە شاقىرىلادى.