اسحات شاحاروۆ 8 ادام مەرت بولعان جول اپاتى تۋرالى: قاجەتتى كومەكتىڭ ءبارى كورسەتىلەدى
اقتوبە. KAZINFORM - اقتوبە وبلىسىنىڭ اكىمى اسحات شاحاروۆ جول اپاتىنان سوڭ سوڭ الەۋمەتتىك جەلىدەگى پاراقشاسىنا جازبا قالدىردى. ءوڭىر باسشىسى جۇمىس توبى قۇرىلىپ، تەكسەرىلەتىنىن جازعان.
اقتوبە وبلىسىنداعى جول-كولىك اپاتىنا بايلانىستى تەكسەرۋ، تەرگەۋ جۇمىستارى جالعاسىپ جاتىر. العاشىندا 6 ادامنىڭ مەرت بولعانى تۋرالى حابارلاندى.
كەيىن كولىكتەن تاعى ەكى بالانىڭ دەنەسى تابىلعانى ايتىلدى.
- وڭىرىمىزدە بولعان جانتۇرشىگەرلىك وقيعا تۋرالى بارشاڭىز حاباردارسىزدار. مارقۇم بولعان جانداردىڭ جاقىندارىنا، اعايىن-تۋىستارىنا ءوزىمنىڭ جانە اقتوبە وبلىسى اكىمدىگىنىڭ اتىنان كوڭىل ايتامىن. ولارعا قاجەتتى ماتەريالدىق جانە مورالدىق كومەك كورسەتىلەدى. بۇل وقيعا ءبىلىم بەرۋ مەكەمەلەرىندەگى قاۋىپسىزدىك شارالارىنىڭ ماڭىزدىلىعىن تاعى ءبىر رەت ەسكە سالدى. ءاربىر وقۋشىنىڭ ءومىرى باعالى جانە كەز كەلگەن ءىس-شارادا ولاردىڭ قاۋىپسىزدىگى ءبىرىنشى ورىندا بولۋى ءتيىس. ورىنباسارىم جولداس باتىرحان جەتەكشىلىك ەتەتىن وبلىستىق جۇمىس توبى قۇرىلدى، قازىر ولار - وقيعا ورنىندا. وبلىستىق جۇمىس توبى، قۇزىرلى ورگاندار زاڭ اياسىندا بۇل جاعدايدى مۇقيات تەكسەرىپ، ءتيىستى شارالار قابىلدايدى. وقۋشىلاردىڭ ءومىرى مەن دەنساۋلىعىن قورعاۋ ماقساتىندا مەكتەپتەردە قاۋىپسىزدىك ەرەجەلەرىن قاتاڭ ساقتاۋ مىندەتتى. جارىستار مەن باسقا دا ءىس-شارالاردى ۇيىمداستىرۋ كەزىندە بەلگىلەنگەن الگوريتمگە سايكەس، قاۋىپسىزدىك تالاپتارى تولىقتاي ورىندالۋى ءتيىس. بۇل جاعداي - جەكە باقىلاۋىمدا، - دەپ جازدى اسحات شاحاروۆ.