ارىپتەسىنە پىشاق الا جۇگىرگەن اقتوبەلىك پوليتسەي جازاسىن بوستاندىقتا وتەيدى

اقتوبە. KAZINFORM - اقتوبە قالالىق سوتىندا جەدەل ۋاكىل ساپاربەك مىرزاكەلديەۆكە قاتىستى قىلمىستىق ءىس قارالدى. ارىپتەسىنە پىشاق الا جۇگىرگەن وعان 4 جىلعا باس بوستاندىعىنان شەكتەۋ تۇرىندەگى جازا تاعايىندالدى.

قىلمىستىق وقيعا بيىل ءساۋىر ايىندا بولعان. سوت كابينەتىندەگى ءىس ماتەريالىنا سۇيەنسەك، 2024 -جىلدىڭ ناۋرىز ايىندا اقتوبە وبلىستىق پ د ەكسترەميزمگە قارسى كۇرەس باسقارماسىنىڭ جەدەل ۋاكىلى ت. رامانقۇل ق ر ءى ءى م جەدەل قىزمەت دەپارتامەنتىنىڭ اقتوبە وبلىسى بويىنشا جەدەل قىزمەت باسقارماسىنا ءبىر ازاماتقا قاتىستى ارنايى ءىس-شارالاردى جۇرگىزۋ تۋرالى تاپسىرمانى جولدايدى. ءبىرىنشى باستاماشى رەتىندە جەدەل ۋاكىل ت. رامانقۇل، ال قوسىمشا باستاماشى رەتىندە جەدەل ۋاكىل س. ميرزاكەلديەۆ كورسەتىلگەن. بيىل 5-ءساۋىر كۇنى جەدەل قىزمەت باسقارماسى باستىعىنىڭ ورىنباسارى ە. س. سەرىكبايەۆ باستاماشىلاردان كەلگەن تاپسىرمالاردى باقىلاۋعا الۋ جۋرنالىن تەكسەرىپ، جەدەل ۋاكىلدەر ت. رامانقۇل مەن س. ميرزاكەلديەۆتىڭ وزدەرى باستاپ، اياقسىز قالدىرعان تاپسىرمالارىن انىقتادى. كەيىن ول جايىندا باسشىلارعا بايانداعان. وسىدان كەيىن جەدەل ۋاكىل س. ميرزاكەلديەۆ WhatsApp ارقىلى ە. سەرىكبايەۆقا حابارلاسىپ، نارازىلىعىن بىلدىرەدى.

9-ءساۋىر كۇنى ەكەۋى اقتوبە وبلىستىق پوليتسيا دەپارتامەنتى عيماراتىنىڭ جەرتولەسىندە كەزدەسىپ قالىپ، ارادا جانجال تۋىنداعان. ال كەشكىلىك سوتتالۋشى س. ميرزاكەلديەۆ ە. سەرىكبايەۆقا قوڭىراۋ شالىپ، تۇتقانى كوتەرمەگەن سوڭ «اڭگىمەمىز اياقتالماي قالدى عوي، حابارلاسشى، نۇكتەسىن قويايىق» دەپ حابارلاما جازعان. تۇندە التىن وردا شاعىن اۋدانىنداعى مونشانىڭ الدىندا كەزدەسىپ، ەكەۋىنىڭ اراسىنداعى جانجال توبەلەسكە ۇلاسادى.

س. ميرزاكەلديەۆ ءوزى ءمىنىپ كەلگەن كولىك ەسىگىنىڭ جانىنان پىشاق الىپ، جابىرلەنۋشى ە. سەرىكبايەۆتىڭ سول جاق كەۋدەسىنە جانە سول جاق بىلەگىنە ەكى رەت سوققى جاساعان. سوتتالۋشى س. ميرزاكەلديەۆ تاعىلعان ايىپتى تولىق مويىنداپ، وكىنەتىنىن ايتىپ، سوتتان باس بوستاندىعىنان ايىرماۋدى سۇرادى. جابىرلەنۋشى ە. سەرىكبايەۆ سوتتالۋشىنى كەشىرگەنىن، وعان قويار ەشقانداي تالابى جوق ەكەنىن كورسەتىپ، وعان باس بوستاندىعىن شەكتەۋ جازاسىن تاعايىنداۋدى سۇرادى.

«ساپاربەك ميرزاكەلديەۆ قىلمىستىق كودەكستىڭ 106-بابى 1-بولىگىمەن كوزدەلگەن قىلمىستىق قۇقىق بۇزۋشىلىقتى جاساعانى ءۇشىن كىنالى دەپ تانىلسىن. وعان 4 جىل مەرزىمگە باس بوستاندىعىن شەكتەۋ جازاسى تاعايىندالسىن. قىلمىستىق كودەكستىڭ 49-بابى 1-بولىگىنە سايكەس س. ميرزاكەلديەۆ مايور ارناۋلى اتاعىنان ايىرىلسىن. س. ميرزاكەلديەۆ جازانى وتەۋ كەزىندە جىل سايىن ءجۇز ساعاتتان ءماجبۇرلى ەڭبەككە تارتىلسىن»، - دەدى سۋديا ي. يسمايلوۆا.

اۆتور
التىناي ساعىندىقوۆا