ارىستاعى شەگىرتكە وشاعى جويىلدى - ا ش م

استانا. KAZINFORM - اۋىل شارۋاشىلىعى مينيسترلىگى الەۋمەتتىك جەلىدە ارىستا شەگىرتكەنىڭ قاپتاۋىنا قاتىستى تۇسىنىك بەردى.

«تۇركىستان وبلىسى ارىس اۋدانى قوجاتوعاي اۋىلدىق وكرۋگىندە شەگىرتكەلەردىڭ قاپتاعانى تۋرالى ايتىلعان. بۇگىندە اۋىلدىق وكرۋگ تولىق وڭدەلدى، شەگىرتكەلەردىڭ تارالۋ وشاعى جويىلدى. اۋىل شارۋاشىلىعى داقىلدارى ەگىستىگىنىڭ زاقىمدانۋى انىقتالعان جوق. سونىمەن قاتار قازىر تۇركىستان وبلىسى اۋماعىندا ءۇيىرلى شەگىرتكە تەكتەستەرگە قارسى حيميالىق وڭدەۋ جۇمىستارى اياقتالۋدا. ەكونوميكالىق زياندىلىق شەگىنەن تومەن قونىستانعان شەگىرتكە تەكتەستەردىڭ شوعىرلانعان جەرلەرىندە تازارتۋ جۇمىستارى جۇرگىزىلىپ جاتىر»، - دەدى مينيسترلىكتىڭ رەسمي وكىلى ولجاس تىلەۋبالدين.

رەسمي وكىلدىڭ ايتۋىنشا، تۇركىستان وبلىسىندا (5-ماۋسىمداعى جاعداي بويىنشا) ماروككو شەگىرتكەسىنىڭ دەرناسىلدەرى بويىنشا 715,18 مىڭ گەكتار اۋماق زەرتتەلگەن.

«ونىڭ ىشىندە وڭدەۋگە جاتاتىن جەر كولەمى 260,4 مىڭ گەكتار، وڭدەلگەنى 259,3 مىڭ گەكتار نەمەسە � دى قۇرايدى. حيميالىق وڭدەۋ جۇمىستارىنا 6 جەرۇستى جەلدەتكىش-بۇرىككىش جۇمىلدىرىلعان. اۋىل شارۋاشىلىعى داقىلدارى زاقىمدانۋى بايقالمايدى. سونىمەن قاتار ماروككو شەگىرتكەسىنە قارسى حيميالىق وڭدەۋ جۇرگىزۋ ءۇشىن ارىس اۋدانىنا قوسىمشا 3 اەروزولدى گازوگەنەراتور جانە 1 جەرۇستى جەلدەتكىش-بۇرىككىش جىبەرىلدى. بارلىق قاجەتتى شارا قابىلدانىپ جاتىر»، - دەيدى ول.

بۇعان دەيىن ارىستى شەگىرتكە باسىپ جاتقانى تۋرالى حابارلاعان ەدىك.

اۆتور
داۋلەت ىزتىلەۋ