ارىستاعى اپات، سەمەي ورمانى، تاسقىن، اڭداماي سويلەگەن ەلشى: پرەزيدەنتتەن كىمدەر سوگىس الدى
استانا. KAZINFORM - مەملەكەت باسشىسى پرەزيدەنت وكىلەتىن قولعا العاننان بىرنەشە مينيستر مەن وبلىس اكىمىنە سوگىس بەرگەن. قاراعاندى وبلىسىنىڭ اكىمى ەرماعانبەت بولەكبايەۆتىڭ ساران قالاسىن قىسقا دۇرىس دايىنداماعانى ءۇشىن العان سوگىسى وسىعان دەيىن اقوردادان سوگىس العان شەنەۋنىكتەرى تۋرالى ءسوز قوزعاۋىمىزعا تۇرتكى بولدى.
ارىس تراگەدياسى
2019-جىلدىڭ جازىندا تۇركىستان وبلىسىنىڭ ارىس قالاسىندا ورنالاسقان قارۋ-جاراق قويماسىندا دۇركىن-دۇركىن جارىلىس بولىپ، بۇكىل ەل ءبىر دۇرلىككەن. رەسمي مالىمەت بويىنشا، جارىلىس سالدارىنان ءبىر ادام قازا تاۋىپ، ونداعان ادام جاراقات الدى. وسىعان بايلانىستى 12-ماۋسىم ازا تۇتۋ كۇنى دەپ جاريالاندى.
ارىستاعى اپاتقا جول بەرگەنى ءۇشىن بىرنەشە لاۋازىمدى تۇلعا جازالاندى. پرەزيدەنت وكىمىمەن بۇرىنعى قورعانىس ءمينيسترى ساكەن جاسۇزاقوۆ قارۋلى كۇشتەر جۇيەسىنەن شىعارىلسا، قارۋ-جاراق پەن وق-دارىلەردى ساقتاۋ وبەكتىلەرىن كوشىرۋ جانە ورنالاستىرۋ باعدارلاماسىن ىسكە اسىرۋ كەزىندەگى ەلەۋلى كەمشىلىكتەرگە جول بەرگەن قورعانىس ءمينيستىرىنىڭ ءبىرىنشى ورىنباسارى جانە قارۋلى كۇشتەرى باس شتابىنىڭ باستىعى مۇرات بەكتانوۆقا، بۇرىن ءبىرىنشى ۆيتسە-مينيستر بولعان مۇرات مايكەيەۆكە، ءتۇرلى جىلدارى قورعانىس ءمينيسترىنىڭ ورىنباسارى بولعان تالعات جانجۇمەنوۆكە قاتاڭ سوگىس جاريالاندى
كوكتوبەنىڭ جاسىل جەلەگى
الماتى قالاسىنا ءىس-ساپارمەن كەلگەن پرەزيدەنت قالا اكىمىنىڭ ءبىرىنشى ورىنباسارى ەرلان قوجاعاپانوۆقا كوك-توبەدەگى كەسىلگەن اعاشتار ءۇشىن سوگىس جاريالادى.
«شۆەيتساريادا ءۇش جىل جۇمىس ىستەدىم. وندا اعاشتاردى زاڭسىز كەسۋ، ءتىپتى ءبىر اعاشتى كەسىپ تاستاۋ اۋىر قىلمىس بولىپ سانالادى. سەبەبى، ول - بۇكىل حالىقتىڭ ورتاق مۇلىگى.
كوك-توبەدەگى الما كوشەتتەرى سىن كوتەرمەيدى. وسىعان بايلانىستى اكىمنىڭ ءبىرىنشى ورىنباسارى ەرلان قوجاعاپانوۆقا سوگىس جاريالايمىن. يگى ءىستى جوق قىلدىڭىزدار»، - دەدى قاسىم-جومارت توقايەۆ.
كوروناۆيرۋس
مەملەكەت باسشىسى كوروناۆيرۋس ىندەتىنىڭ تارالۋىنا قارسى شارالار قابىلداۋ جونىندەگى كەڭەستە وزدەرىنە جۇكتەلگەن مىندەتتەردى شالا ورىنداعان ءبىرقاتار شەنەۋنىكتىڭ جۇمىسىن سىنعا الدى.
وسىلايشا جۇمىسىنا سالعىرت قاراعانى ءۇشىن شىمكەنت قالاسىنىڭ اكىمى بولعان مۇرات ايتەنوۆكە، اقتوبە وبلىسىنىڭ اكىمى بولعان وڭداسىن ورازالينگە، پاۆلودار وبلىسىنىڭ اكىمى بولعان ءابىلقايىر سقاقوۆقا جانە ۆەدومستۆوارالىق كوميسسيانىڭ ءتوراعاسى، پرەمەر-ءمينيستردىڭ ورىنباسارى بولعان ەرالى توعجانوۆقا سوگىس جاريالاندى.
قازاقستاندىقتار ءالى دە كوروناۆيرۋس جۇقتىرىپ جاتىر
ال سول كەزدەگى ەلوردا اكىمى التاي كولگىنوۆكە، الماتى قالاسىنىڭ اكىمى باقىتجان ساعىنتايەۆقا، سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى اسقار جۇماعاليەۆكە ەسكەرتۋ جاسالدى.
قايتا كەلگەن شەنەۋنىك
2021-جىلدىڭ تامىز ايىندا مەملەكەت باسشىسى سول كەزدەگى جامبىل وبلىسىنىڭ اكىمىنە سوگىس جاريالادى. بەردىبەك ساپاربايەۆ 2019-جىلى پرەزيدەنت تاپسىرماسىمەن قىزمەتتەن بوساتىلعان شەنەۋنىكتى جاۋاپتى قىزمەتكە تاعايىنداعان بولىپ شىقتى. ىلە-شالا بەردىبەك ساپاربايەۆ وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ باسشىسى قايرات دوسايەۆتى قىزمەتىنەن بوساتتى. بۇل ادام 2019-جىلدىڭ قاراشا ايىندا قالا مەكتەپتەرىنىڭ بىرىندە 12 جاستاعى قىزدى زورلاۋ وقيعاسىنا بايلانىستى تاراز قالاسىنىڭ اكىمى قىزمەتىنەن بوساتىلعان ەدى.
ادەپ بۇزعان ەلشى
پرەزيدەنت توقايەۆ بۇل كەزدە مىسىرداعى ەلشى قايرات لاما شاريفكە سوگىس جاريالادى.
«پرەزيدەنت قاسىم-جومارت توقايەۆ قازاقستاننىڭ ەگيپەت اراب رەسپۋبليكاسىنداعى توتەنشە جانە وكىلەتتى ەلشىسى قايرات قايىربەك ۇلى لاما شاريفكە ق ر مەملەكەتتىك قىزمەتشىلەرىنىڭ ادەپ كودەكسىنىڭ 9-تارماعىنىڭ تالاپتارىن ساقتاماعانى ءۇشىن سوگىس جاريالادى»، - دەپ جازدى بورت 1» Telegram-ارناسى (قازىر اتاۋى Aqorda).
لاما شاريف ءوزىنىڭ Facebook پاراقشاسىنا نۇر-سۇلتان قالاسىنا بۇرىنعى استانا اتاۋىن قايتارۋ تۋرالى، قازاقستاندى قازاقيا دەپ وزگەرتۋ تۋرالى ءوز ويىن جازعان ەدى.
قانت جانە كيىك
ۇكىمەتتىڭ كەڭەيتىلگەن وتىرىسىندا مەملەكەت باسشىسى ساۋدا جانە ينتەگراتسيا ءمينيسترى باقىت سۇلتانوۆ پەن اۋىل شارۋاشىلىعى ءمينيسترى ەربول قاراشوكەيەۆكە قانت تاپشىلىعىن رەتتەي الماعانى ءۇشىن، ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشيەۆكە كيىك سانىن رەتتەۋ جۇمىستارىن دۇربەلەڭگە اينالدىرعانى ءۇشىن سوگىس جاريالادى.
سەمەي ورمانى
اباي وبلىسىنداعى ورمان ءورتى قايتا قۇرىلعان ءوڭىردىڭ جاڭا اكىمىن قىزمەتتەن الىپ تۇسە جازداعانى ەل ەسىندە. الاپات ءورت 15 ادامنىڭ ءومىرىن اكەتكەنى رەسمي حابارلانعان ەدى.
قاسىم-جومارت توقايەۆ اباي وبلىسىنىڭ اكىمى نۇرلان ۇرانحايەۆقا سەمەي ورمانىنداعى ورتكە بايلانىستى ءوز مىندەتىن ءتيىستى دەڭگەيدە اتقارماعانى ءۇشىن سوگىس جاريالادى.
ورمان ءورتى
«تۇسىنەمىن، وبلىس ەندى قۇرىلدى، ءسىز - جاڭا اكىمسىز. وسى سەبەپتى عانا سىزگە سوگىس جاريالايمىن. نەگىزى، مۇنداي قاتەلىك ءۇشىن بىردەن قىزمەتتەن بوساتۋ كەرەك. 14 ادامنان ايىرىلىپ قالدىق. بۇل نە سىزگە، ويىنشىق پا؟» - دەدى پرەزيدەنت سوگىس جاريالاي وتىرىپ.
تاسقىن
بيىلعى تاسقىندار ەلدىڭ بىرنەشە وڭىرىنە جايىلىپ، 100 مىڭنان استام قازاقستاندىقتىڭ ومىرىنە كەسىرىن تيگىزدى.
پرەزيدەنت تابيعي اپاتقا قارسى ۋاقتىلى شارا قابىلداماعانى ءۇشىن پرەمەر-ءمينيستردىڭ ءبىرىنشى ورىنباسارى رومان سكليارعا، سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆكە قاتاڭ سوگىس جاريالادى. ال اقتوبە، قوستاناي، باتىس قازاقستان وبلىستارىنىڭ اكىمدەرىنە قاتاڭ سوگىس جانە قىزمەتتىك مىندەتتەرىنە تولىق ساي كەلمەۋىنە بايلانىستى ەسكەرتۋ بەردى. اتىراۋ، اقمولا، الماتى، پاۆلودار جانە اباي وبلىستارىنىڭ اكىمدەرىنە قاتاڭ سوگىس جاريالاندى.