ارىستا اسىل تۇقىمدى قوشقارلاردىڭ كورمە-سايىسى ءوتتى
تۇركىستان. KAZINFORM - ارىس قالاسىندا تۇقىمى سيرەك كەزدەسەتىن قوشقارلاردىڭ كورمە سايىسى ۇيىمداستىرىلدى.
قالالىق ورتالىق ستاديوندا وتكەن شاراعا قوي باعىپ، قوشقار باپتاعان شارۋالار 200 دەن اسا قوشقار اكەلىپ، ءوزارا باق سىناستى.
كورمەنى ارىستىق كاسىپكەر الماز شۇكىربەكوۆ پەن قالانىڭ بەلسەندى شارۋا قوجالىقتارى ۇيىمداستىردى. شارانىڭ اشىلۋ سالتاناتىنا قالا اكىمى گۇلجان قۇرمانبەكوۆا قاتىسىپ، كورمەنىڭ ماڭىزدىلىعىنا توقتالدى. يگى ءىستى ۇيىمداستىرۋشىلار مەن مال باسىن اسىلداندىرۋ باعىتىندا ەڭبەك ەتىپ جاتقان شارۋالارعا ساتتىلىك تىلەدى.
«ەلىمىزدىڭ ازىق- تۇلىك قاۋىپسىزدىگىن قامتاماسىز ەتۋ، اۋىل حالقىنىڭ الەۋمەتتىك- تۇرمىستىق جاعدايىن جاقسارتۋ مەن مال شارۋاشىلىعىنىڭ ەكسپورتتىق الەۋەتىن ارتتىرۋدا ءداستۇرلى سالا - قوي شارۋاشىلىعىن وركەندەتۋدىڭ ماڭىزى ەرەكشە. ەندەشە، شارۋالارىمىزدىڭ ءىسى بەرەكەلى بولسىن»، - دەدى گۇلجان قۇرمانبەكوۆا.
كورمەگە الىستان ارنايى كەلگەن قۇرمەتتى قوناقتار، اسىلتۇقىمدى قوي ءوسىرۋشى شوپاندار مەن ءىرى شارۋاقوجالىقتار قاتىستى. قۇيرىقتى قىلشىق ءجۇندى، قيسارى جانە اراشان قوي تۇقىمدارى كورمەگە قويىلدى.
سايىستىڭ ەرەجەسى بويىنشا قازىلار القاسى قويلاردىڭ سالماعى مەن بويىنا جانە ەكستەرەرىنە قاراي باعا بەردى.
قورىتىندىسىندا بەرىك سۇلتان ەسىمدى قاتىسۋشىنىڭ 144 كەلىلىك «ءمۇسىن» قوشقارى ەڭ جوعارعى سالماق كورسەتتى. بەلگىلى ارىستىق قويبەگى اقىلبەك ءالجاننىڭ «گەكتار» اتتى قوشقارى 105,5 س م بويدى كورسەتىپ، بيىكتىك بويىنشا چەمپيون اتاندى. ال ابسوليۋتتى سالماقتا باقبەرگەن ءالجانوۆتىڭ «كۋبا» اتتى قوشقارى ەكستەرەر بويىنشا ۇزدىك بولدى.
شىمكەنتتەن كەلگەن باقتيار بالاجاننىڭ «تۇران» قوشقارى 195 كەلىمەن جەڭىمپاز بولىپ تانىلدى. قازىلار القاسىنىڭ شەشىمىمەن سالماعى، بويى جانە كەلبەتى ەسكەرىلىپ، ۇزدىك قوشقار يەلەرىنە العىس حاتتار مەن چەمپيوندىق بەلبەۋ جانە كۋبوكتار تابىستالدى.