ق ر دەنساۋلىق ساقتاۋ مينيسترلىگىنىڭ مەديتسينالىق جانە فارماتسيەۆتيكالىق باقىلاۋ كوميتەتى Kazinform ساۋالىنا بەرگەن جاۋابىندا دارىگەردىڭ مامان سەرتيفيكاتى تۋرالى اقپاراتتى قايدان كورۋگە بولاتىنىن ءتۇسىندىردى.
كوميتەت ءتوراعاسىنىڭ ورىنباسارى جاندوس ءادىلحاننىڭ مالىمەتىنشە، مەديتسينا قىزمەتكەرلەرىن سەرتيفيكاتتاۋ ەلەكتروندى فورماتتا eLicense پورتالى ارقىلى جۇرگىزىلەدى.
ازاماتتار مەديتسينا قىزمەتكەرى تۋرالى دەرەكتەردى وسى پورتالداعى «رۇقسات بەرۋ قۇجاتتارىن ىزدەۋ» بولىمىنەن الا الادى. ول ءۇشىن مەديتسينا قىزمەتكەرىنىڭ دەرەكتەرى قاجەت.
- مامان سەرتيفيكاتى دارىگەرگە بەلگىلى ءبىر ماماندىق نەمەسە مامانداندىرۋ بويىنشا كلينيكالىق پراكتيكامەن اينالىسۋعا مۇمكىندىك بەرەدى. قولدانىستاعى تالاپ بويىنشا، مەديتسينا قىزمەتكەرى كلينيكالىق پراكتيكاعا جىبەرىلۋ ءۇشىن ءتيىستى ماماندىق نەمەسە مامانداندىرۋ بويىنشا مامان سەرتيفيكاتىنا يە بولۋى ءتيىس، - دەدى سپيكەر.
بۇل تالاپ دارىگەر بىرنەشە مەديتسينالىق ماماندىق بويىنشا جۇمىس ىستەگەن جاعدايدا دا قولدانىلادى. كوميتەتتىڭ تۇسىندىرۋىنشە، دارىگەر ءاربىر ماماندىق بويىنشا كلينيكالىق پراكتيكامەن اينالىسۋعا رۇقسات بەرەتىن سەرتيفيكاتقا يە بولۋى كەرەك.
قازىر جاڭا ماماندىق بويىنشا مامان سەرتيفيكاتىن الۋ ءۇشىن دارىگەر سول ماماندىق بويىنشا رەزيدەنتۋرانى اياقتاعانى تۋرالى كۋالىك ۇسىنۋى قاجەت.
- ال بۇعان دەيىن، ياعني 2022-جىلعى 15-قاراشاعا دەيىن باسقا ءتارتىپ قولدانىلدى. ول كەزدە جاڭا ماماندىق بويىنشا سەرتيفيكات قايتا دايارلاۋدان وتكەنىن راستايتىن قۇجات نەگىزىندە دە بەرىلدى. مۇنداي قايتا دايارلاۋ كەمىندە 860 ساعاتتىق وقۋدى تالاپ ەتتى. سونىڭ ناتيجەسىندە كەيبىر تاجىريبەلى دارىگەرلەردە ءبىر كاسىبي بەيىنگە جاتاتىن ەكى نەمەسە ودان دا كوپ ماماندىق بويىنشا سەرتيفيكات بولۋى مۇمكىن، - دەدى كوميتەت ءتوراعاسىنىڭ ورىنباسارى.
وسىلايشا، پاتسيەنت دارىگەرگە جازىلماس بۇرىن ونىڭ ءتيىستى ماماندىق بويىنشا سەرتيفيكاتى بار-جوعىن eLicense پورتالىنان تەكسەرە الادى.