ول اقشانى «قۇدايدىڭ سىيى» دەپ قابىلداپ، ءبىر بولىگىن ساياحاتقا جانە ەمدەلۋگە جۇمساعان. ەندى ەر ادام جوعالعان اقشانى يەمدەنگەنى ءۇشىن سوت الدىندا جاۋاپ بەرىپ جاتىر، دەپ حابارلايدى newsdig.tbs.co.jp.
وقيعا بيىل ناۋرىزدا جاپونيانىڭ سەنداي قالاسىندا بولعان. تاكۋيا سۋەناگا ەسىمدى ەر ادام اۋرۋحانادان قايتىپ كەلە جاتقاندا كوشەدە جاتقان سومكەنى بايقايدى. ونىڭ ىشىندە كۇزەت كومپانياسى تاسىمالداۋ كەزىندە بايقاماي ءتۇسىرىپ العان ويىن-ساۋىق ورتالىعىنىڭ ءتۇسىمى بولعان.
ەر ادام سومكەنىڭ جانىنان العاشىندا ءوتىپ كەتكەنىمەن، كەيىن قايتا ورالىپ، ءىشىن تەكسەرگەن. اقشانى كورگەندە ونى «قۇدايدىڭ سىيى» دەپ ويلاعانىن سوتتا ايتقان. ونىڭ سوزىنشە، قاتەرلى ىسىگى قايتا انىقتالىپ، دارىگەرلەر ومىرىنە ەكى-ءۇش اي قالعانىن ەسكەرتكەننەن كەيىن ءۇمىتسىز كۇيگە تۇسكەن.
ءتورت جارىم ايدان كەيىن ۇستالعانعا دەيىن ول تابىلعان اقشانىڭ شامامەن 18 ميلليون يەنىن جۇمساعان. قاراجاتتىڭ ءبىر بولىگى ەمدەلۋگە، قالعانى جاپونيا ىشىندەگى جانە شەتەلدەگى ساياحاتتارعا كەتكەن. ولاردىڭ قاتارىندا ۆەتنامعا ساپار دا بولعان.
19-قازاندا سەنداي اۋداندىق سوتىندا وتكەن العاشقى تىڭداۋدا سۋەناگا ايىپتى مويىنداعان. پروكۋراتۋرا وعان ءبىر جىل باس بوستاندىعىنان ايىرۋ جازاسىن تاعايىنداۋدى سۇرادى. ال قورعاۋشى تاراپ ەر ادامنىڭ سول كەزدەگى جاعدايىن ەسكەرىپ، شارتتى جازا تاعايىنداۋدى ءوتىندى.
اقشانىڭ شىعىنىن ساقتاندىرۋ كومپانياسى وتەگەن. قازىرگى ۋاقىتتا ەر ادام ساقتاندىرۋشىعا اي سايىن 30 مىڭ يەننەن قايتارىپ وتىر. سوت ۇكىمى 6-قاراشادا جاريالانۋعا ءتيىس.
وسىلايشا، دارىگەرلەر بولجاعان مەرزىمنەن ۇزاق ءومىر سۇرگەن ەر ادام ەندى تابىلعان اقشانى زاڭدى يەسىنە قايتارۋ مىندەتىمەن بەتپە-بەت كەلدى. الايدا سوت شەشىمى ءالى شىققان جوق.
ەربۇلان قايرات